O tiute fa’asamoa o le galuega fai fa’atasi

Tusia Vatapuia Maiava ma Deidre Fanene ,

106 Hits

Talaitaū Filipo Auna’i.

Talaitaū Filipo Auna’i.

I le fa’atalatalanoaga a le Fofoga o Samoa ma le tamā i ā Talaitaū Filipo Auna’i, mai le afioaga o Faleula sa ia fa’ailoa ai ua mou māie atu le tu ma le aganu’u fa’asamoa, ma o le galuega faifa’atasi a le tagātanu’u a Samoa le fa’atumauina lea o ana tu ma ana aganu’u.

E āfea e le Fofoga o Samoa Talaitaū o lo’o lalagaina ana pola e ato ai le fale Samoa o lo’o tu auala auā leoleoga a le nu’u.

Sa ia fa’ailoa mai fo’i o feau masani fa’asamoa ua pei ua le amanaia e tagata ae o le tasi lea o vaega e pito sili ona tāua i le olaga o le tagata Samoa.

“O galuega nei e pei o le lalagaina o pola, o le su’iina o lau e ato ai fale, o le lalagaina o fala male tele o isi galuega fa’asamoa e lē faapitoaugafa i na’o tinā po’o teine, leai o le galuega pe tinā, tamā, teine po’o le tama o feau e tatau ona iloa uma e tatou.

“O feau ia ua masani ai tatou mai aso anamua e tatau fo’i la ona tatou fa’aauauina pea ona o le olaga lava lea o le Samoa.”

Sa fa’aalia foi e le tamā o le to’atele o tupulaga talavou o lo’o ua i ai i lenei vaitaimi ua galo i ā i latou le olaga fa’asamoa.

“Ua na o lo’u va’ai alofa i le tupulaga o lo’o i ai i lenei vaitau.

“Ua malosi le tū ma le aga fa’apapalagi ae galo ai le mea e tatau ona fai.

“Ua manana’o e nonofo i fale papalagi ma fale apa ae galo ai le mea na fa’avae mai ai le olaga o le falesamoa lava.

“Ua le fia nonofo i ni falesamoa ona ua malosi le tu ma le aga fa’apapalagi i nei onapo.”

O le fautuaga a le tamā ia aua ne’i galo le fa’avae o le olaga fa’asamoa.

“O tatou tu ma aganu’u ia e iloa ai le tagata Samoa.

“O la’u fautuaga i matua ia a’oa’o ma a’oa’i le tamaititi Samoa i tiute ma galuega fa’asamoa auā o le fa’avae lea o tatou.”

© Samoa Observer 2016

Developed by Samoa Observer in Apia