O le mau a le tinā i ā Lotolelei Lautafi Tulaga 66 tausaga mai le afioaga o Puipa’a i le lā fa’atalatalanoaga ma le Fofoga o Samoa i le aso ananafi o le aganu’u fa’asamoa ua tele ina le tagolima ai nisi o aiga.

Sa fesiligia e le Fofoga o Samoa Lotolelei pe o le ā se fofō ina ia fa’aitiitia lea fa’afitauli.

“A fa’atusatusa atu i fa’alavelave aemaise lava mea tau maliu e i ai lota ita manatu a pe a vavae ese sesi vaega o le aganu’u ina ia fa’amama avega i le to’atele o aiga.

 “E pei ua ano tele tatou i le aganu’u ae ua le atina’eina fanau i totonu o aiga ina ia maua se lumanai manuia o le fanau.

“O le tulaga fo’i lea e i ai a sau lava se fa’alavelave e tai fia afe tusaga e sue lava le tusaga lea ia maua ae a o’o i aoga a le fanau e laititi lava le vaega tupe o loo alu ai.”

Sa ia fa’ailoa mai fo’i o aso la ua mavae o le mea lava e gafatia e le tagata e fai ai le fa’alavelave a’o aso nei ua fai lava si faigata.

“Ua tele foi mea alu i lenei vaitau ona o maliu e ave tu’u i ‘aisa a’o la vaitaimi a maliu loa se tasi i le po e malama a’e le taeao teu.

“O a lava mea ua maua i lena taimi ia o mea na e fai ai lava le fa’alavelave ma e fa’amama avega fo’i i le aiga e leai se oi ona o lo’o fai ma le loto malie.

“O le mea lava ua maua i lima i lea taimi e fai ai le fa’alavelave ua lava ma totoe lea.

“A maua lava le iputi e fai ai le fa’alavelave ua lava ma totoe na a’o la e maua le fiafia ma e le pologa foi.

“Ua ano tele tatou i le aganu’u ae ua tatau ona tipi ese sesi vaega ina ia fa’amama avega i nai aiga lima vaivai.”

Sa ia fa’ailoa mai fo’i e le tatau ona toe fa’amoemoe i aiga i atunu’u mamao ona e telē le ese’esega o Samoa ma atunu’u mamao.

“O le vaitau foi lenei a aunoa foi ma nai fanau i atunu’u mamao e le maua mai ni fesoasoani ae ia tatau foi ona tatou iloa o nai fanau o lo’o aumau i fafo e tupe lava mea uma.

“A’o tatou i’inei e lelei o lea e maua le fanua e nofo fua ai, a leai se mealelei ae o lea e maua le ulu ma le fa’i e le mafai foi la ona so’ona fa’amoemoe i nai fanau i atunu’u i fafo ona e faigata foi le olaga.

“O le matou foi aiga e lima vaivai foi ae e faigaluega foi nisi o le fanau ae le gafatia lava le taugata o le soifuaga lea ua tatou i ai.

“O le aiga nei o lo’o fa’atau foi popo e fesoasoani a ii nisi meafai o le aiga aemaise ai le fanau.

“E $30 tala i le 100 popo matou te f’aatauina mai i le fanua o le ekalesia ona matou omai lea toe fa’atau atu.

“O nei la seleni ia e faaaoga e faatau ai nai mea laity e manaomia i le aiga e pei o fsaimoli, suka ma lauti a’o le’i o’o atu i le aso totogi o le fanau.

“O le fesoasoani tele lena a matou popo ia e faatau atu i totonu o si o matou nei aiga.”