“O le taimi lenei e leai sa matou paipa ma e le’i tosoa fo’i se moli.” Le tamā i a Sa’ena Auano o Falelauniu i le fa’atalatalanoaga ma le Fofoga o Samoa i le aso ananafi.

E afea le aiga i le aso ananafi, ma o latou fa’ailoa ai le tulaga e pei ona fa’ailoa muamua atu ma o le taimi lenei ua savali i le lima masina talu ona nofoia e le tamā , le to’alua ma le fanau e to’afa o lo’o a’o’oga lea fanua.

Na fa’ailoa e Sa’ena o le fanua e le’o sa latou fanua, ae o latou o lo’o nonofo ai i le taimi lenei.

“Ia o le nofoia ai o lenei fanua ona ua tausa’ilia se fasi fanua e o i ai, ma o lea ua mafua ai ona nofoia le fanua lenei.

“Sa taumafai lava e toso se paipa, ia na talosaga fo’i le ofisa o le suavai ae sau le tali e le mafai se’i vagana ua aumai le tusi  fa’ataga o lē ana le fanua.

“Ae pei o a’u lava ia, ia mo lenei taimi aua ua leiloa se mea e su’e mai ai se suāvai, e fa’afetai o lo’o i ai si aiga o lo’o o matou fesaga’i o lo’o fesoasoani mai i le tele o taimai.

“Ia e taumafai fo’i e tau fa’atali sina vai mai le timu ae o le fa’alavelave, ia e leaga ma elea apa o le fale nei, o lona uiga a timu e leaga le vai e maua mai ona o le fa’aletonu o apa.

“E pei o lea le popolega i le taimi lenei aemaise o se mana’oga i se tanevai.

“Ia  o lea lava e tosotoso lava i le moli fagu ma  o si aiga lea tuaoi lea o lo’o fesoasoani tele mai lava.

“O nisi o taimi a o’o ina taofi le aiga le paipa e leai se mea e mafai atu ai ae e pei o lea lava le agaga maualuga e fia maua ai se suavai o si o matou aiga aemaise o si a ma fanau ona o lea e a’o’oga ma laiti.

“ I ā  a’u ia e tu’aia lava le moli latou pe moli fagu, moli ga’o ua lava lena ae na o se suavai o lo’o fia maua ai se auala e mafai ona maua ai si o matou aiga.

“O  le isi vaega o lo’o titilo atu i ai ia o le fia maua o sina fasi fanua lisi , ma si a’u fanau e atia’e ai tamaiti i le aoga, ou te iloa o fanua nei ia  a omai tagata e ave’ese matou , ia a sau lava le fa’aiuga e o ese, ia e o ese lava e le taofia e matou seb fa’atonuga.

“O le tupe o lo’o maua le taimi lenei a le aiga ia na’o lo’u to’alua lava o lo’o faigaluega ia na’o le $120 i le vaiaso ma e le taitai ona lava le fa’asoa, ona o le tele o vaega e alu i ai le totogi, o fanau i le aoga, tausiga o le aiga.

Na ta’ua e le tamā o lo’o i ai lana moavao e alu lava fai fai ana galuega, ma e fesoasoani i nisi o taimi aua se tupe maua a le aiga.

“Ia o lo’o maua lava le malosi e tapenapena ai nai fanua o nai isi tagata pe fa’amāmā fo’i ia ona maua ai lea o sina tupe.