E tele le sao a pulega fa’amatai i talavou

By Vatapuia Maiava ma Ilia L Likou 09 November 2016, 12:00AM

O le talitonuga o le ali’i talavou i a Bob Asomaliu, 18 tausaga o Samatau ma Nu’u-Fou  i le fa’atalatalanoaga ma le Fofoga o Samoa i le aso ananafi , ‘e sili ona pulea lelei amio a tupulaga o lo’o ola i fa’amalumaluga  o faiganu’u o lo’o pulea lelei e matai ma faipule.

O le taimi lenei e le’i leva ona nofoia e le aiga o le ali’i talavou i a Bob totonu o Nu’u-Fou ma o le mafua’aga lea o le  tu’ua o lo latou afio’aga moni, o Samatau.

“Ia o uiga o talavou ia e talu lava ona matou omai i’inei  o nisi o taimi ua faigofie lava ae o nisi e leai.

“O lo matou  aiga e omai mai Samatau, ia o le aoga ai o nei nofoaga e su’esu’e galuega ia ma tulata i le taulaga.

“O  lo’u iloa i ai e matua’i  tele lava le ese’esega o tupulaga o lo’o ola i totonu o nu’u nei ma faiganu’u i le tele o afio’aga ma nu’u i tua.

“O lo’u ia ola ai i totonu o Samatau ia e pulea lele ia o amio o tagata, ia e omai ‘i’inei ia e leai ni na mea e fai e pule lava le tagata ia i a te ia.

“Ia e pei ona outou va’ai mai fo’i i lo’u ulu , ana o tuā, ia ua leva na sala, ia o lea lava e talanoa mai matua i le ulu.

 “O nofoaga nei e pule lava le tagata ia i a te ia ma e faigata lava ona alu le isi tagata e fai i le isi tagata e tu’u le a ma le a.

“Ia o a’u ia e tutusa lava i le tele o vaega, ae o le lave i’inei e leai ni pulenu’u ma pulega a matai lea e tele ina ou iloa o lo’o fai i tuā.

“Ia e pei ona silafia o lau la’a, savali, tu, tautala, o lavalava e ofu, o le ulu, e pulea lelei lava mea uma, e leai se fa’afiapoto e faia ai i nu’u i tua.

“E iloa fo’i e tupulaga le tulaga e o’o i ai pe a tagofia le ava malosi ae leiloa ona fa’aaoga lelei le taimi e fiafia ai.

“Ia ae o lo’u iloa i ai , e pei e manaia lava nofoaga nei ae i ai faiganu’u a matai ma pulenu’u aua talu ona matou omai e leiloa po o ai le pulenu’u o lenei itu o le atunu’u.

“Ou te talitonu o lea le mafua’aga o le pule lava o le tagata ia i lana sikaili e fai.

O le taimi lenei o lo’o faigaluega o Bob i se tasi o kamupani o le taulaga, ma o lo’o fesoasoani tele fo’i mo le tausiga ai o le aiga i aso uma aemaise o ona matua.

By Vatapuia Maiava ma Ilia L Likou 09 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>