Fa’ailoa le agaga fa’afetai o Rosita

09 November 2016, 12:00AM

O le a’ea ai e le tama’ita’i i a Rosita Afele o Samoa o le Mauga o Everasi, o se matati’a ua ia ausia.

O Rosita o ona tua’a o Fuimaono Pitoamoa Tuisavili ma Tima o Lotofaga Safata, Sapo’e, Salani Falealili ma Lefanoalii Safune.

Na ia fa’ailoa le agaga fa’afetai ona o le tapuaiga o e  na nofo tatalo a’o alu atu ai i le fa’amoemoe.

“Ae ou te lei taiaina Ao o Maugaloa ma ou tatala le ta’afi tualua lea na ifo ai le Aso o le aiga Sa Sa’umani, e muamua ona ou momoli lapalapa o malo i foga’a ma vi’ia ma fa’amanu le alofa ma le agalelei o le Matai Sili i le Lagi ona o lana tausiga ma lana puipuiga ua mafai ai ona a’e ma le manuia le faiva, ma ua i’u fo’i le upega a le tautua e tusa ai ma le fa’amoemoe e pei ona sa feagai ma lou tagata fa’atauva’a, Ia viia le Ali’i.

“Ae out e lei tautala i se upu e muamua lava ona ou fa’atulou i le paia maualuga o Samoa i le nofo Fa’afeagaiga, fa’apea le paia i Aiga ma Tapa’au, aemaise o to’oto’o au ma to’oto’o sinasina o le atunu’u ma le loaloa o Samoa ina nei lape le gagana ona aulu lea o tafega ae selefutia ai Vaisigano.

“E momoli la’u fa’afetai ma le fa’amalo i le tapuaiga i Susuga i Fa’afeagaiga fa’apea ia Afioga i Tama’ita’i Sa i le Nofoaga paia i Vailima, i la outou tatalo lea ua tali mai Lagi, ua mafai ona Tu Lima Tu i le Tula le Lupe sa fa’alele ae le tu’ele’ele.

“Ou te momoli fo’i le agaga o le fa’afetai ma le fa’amalo i nai o’u aiga pele la outou fa’amalosiau atoa ai ma le tapuaiga.

“O uo peleina ma e masani, sa outou tatalo ma tapua’i ma tu’i mai le mulipapaga ao alo faiva lo’u tagata e fa’ataunu’u se tasi o lu’itau i lo’u olaga. Fa’afetai tele lava!

“A’o sa’u lu’i ma se fa’amalosi i tupulaga talavou ia sasa’a ia le sa’aga, ae silafau i le pa sina aua ua fa’ana’elupe le la, ua atoa tino le masina, ua fa’alava fo’i le aniva. 

Saga’i ane la’ia e fai lou faiva. Manuia!

09 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>