Tele tupe maua mai ma’umaga

Tusia Vatapuia Maiava ma Ilia L Likou ,

194 Hits

Seti Faumoe o Savaia Lefaga.

Seti Faumoe o Savaia Lefaga.

“Ia o lenei ma’umaga tele o lo’o ua i ai, ia o lo’o fa’amoemoe tele ai le tausiga o le aiga i le taimi lenei.” Le tinā i a Seti Faumoe o Savaia i Lefaga i le fa’atalatalanoaga ma le Fofoga o Samoa.

O lea le fa’amoemoega tele o lo’o i lona aiga aemaise o le mafua’aga o le ma’umaga e pei ona ia ta’ua.

“E le gata ina tua i ai i le tele o taimi, ae o lo’o ua fa’aititia ai le tele o tupe alu i mea’ai mo aso ta’itasi.

“O lo matou aiga e tele lava ina fa’alagolago i vaega nei mo le tausiga i aso ta’itasi.

“E moni lava o lo’o i ai tagata faigaluega ae o la’u ia molimau e sili mamao le tupe o lo’o maua i le fa’atau atu o talo i aso uma.

Na fa’ailoa e Seti o le tele lava o aso o le tamā lava o le aiga o lo’o usua’i i le ma’umaga.

“Ia ona o lo’o alu atu i le fono i le taimi lenei , e pei o lea le mafua’aga ua maua mai ai na’o a’u i’inei ma le fanau.

“Ae pei o ia lava o lo’o gafa ma le galueaina o le ma’umaga i le tele o aso ma e tele lava ina tau le maua se malologa i nisi o taimi.

“Ia o nei le taeao o lo’o ua fo’i mai tamaiti ma le isi uilipaelo lea na uta ai  le tele o talo i gauta ma fola ai aua le fa’atauina atu aua se mea’ai o le aiga.

“Ia ma e le fou  lea tulaga i si o matou nu’u nei, o le tu’u atoa ai lava o le malosi e fa’atau atu le tele o talo i le mamalu o le atunu’u.

Sa ia fa’ailoa fo’i ua leva ona o latou galueaina le fanua mo le ma’umaga aua lava se tupe maua o le aiga.

 “Ua fai si leva ona matou faia le ma’umaga nei, ma na ola mai ai lava, ia a tele lava ua la’u i lumā e fa’atau ai ae o le tele lava o fa’amoemoega e mo le tausiga o le aiga.

“O le itu lelei lava o le maua o le tupe i taimi uma, ia o nisi o taimi ua taofi le tōtōina ona e ao lava ona tu’u se avanoa i le palapala ia na toe amata fo’i lea.

 “O lo matou aiga ia e faigofie lava ma o lo’o i ai i latou o lo’o faigaluega e pei o lo’u tuagane ma le to’alua.

 “Ia e pei lava ona ou ta’ua muamua e pei e sili tupe e maua i le ma’umaga nai lo le faigaluega.

 “Ia aua e mafai ona fa’atau atu solo i so’o se itu ma tele ai lava tupe a le tagata i le tele o taimi.

© Samoa Observer 2016

Developed by Samoa Observer in Apia