“O a’u na amata lo’u iloa i le lalagaina o ato, pulou, teu  e fa’aaoga ai le laufala a’o o’u aoga i le Kolisi o Papauta.” Talalelei Lemisio o Pu’apu’a i Savai’i.

O lea le amataga o le olaga lalaga o Talalelei i so’o se mea taulima a’o auai o ia i le Kolisi o Papauta.

“Ia e pei ona silafia ai o le tele lava o lou fiafia e gaosi meataulima nei na amata mai lava i le aiga ae ina ua ou alu i Papauta o i’ina la na tele lava nisi metotia na ou maua mai ai.

“Ina ua uma la’u aoga ma o’o mai lava i Savai’i nei, o i’ina loa la na pei pei na galo atu ai.

“Ua augata e lalaga vaega nei, ma se’iloga lava e mana’omia e se isi ia fa’atoā ou tago lea ua lalaga ae pei ua fa’agalogalo atu lava.

“Ia na alu a’i alu a’i taumafaiga nei, ia ua o’o le tulaga fo’i lea a lalaga a ua fai ae a leai lava ua tu’u.

O le tausaga lenei i a Aukuso na ia fa’ailoa ai loa lona taumafai e tu’u lona taimi atoa i le lalagaina o meataulima e pei ona ia fiafia muamua ai.

 “Ina ua ou toe taumafai ai la e toe amata ona toe lalaga vaega nei, na matua’i lagona lo’u fiafia ona ua ou iloa o lo’o tele lava nai senesene e maua mai ai.

“Ua le gata la ina tele tagata o lo’o ua ou iloa e a’u ia o lo’o mana’omia ae o i latou fo’i mai fafo o lo’o latou fa’atauina le tele o a’u galuega taulima nei.

“E pei o i’ina na fa’aosofia ai lava a’u e amata loa, ma e o’o mai lava i le taimi lenei, ia o lo’o ua alu ai lava.

O lona talitonuga, a fa’avaivai loa ua leai ni manuia.

“Ia o lea le tulaga lelei o lo’o i ai i le taimi lenei ua maua nai tupe fa’asili mo le tausiga o le aiga.

“E leai lava se mea e le mafai ona fai pe ā tu’u i ai le malosi atoa, e fa’atino ai...ia aua lava nei’i fa’avaivai a ia filiga i so’o se taumafaiga.

“O le agaga maualuga lava o nei taumafaiga uma, ia e mo le tausiga lava o aiga, aua a tele mai fo’i mea fai, ia ae o lo’o i ai se tupe e tapatapa i ai.“Ua le faigofie nei aso ae o le va’aiga lava i le lumana’i o le finafinau lava i mea lelei, ma e le taufesiligia fa’amanuiaga o so’o se taumafai tatou te finafinau i ai.

“O le lototele lava e fai ai so’o se mea.