Ia poto le fa’asoasoa
O le molimau a le tinā i a Felorita Lefa o Lefaga, o le tupe mai le ma’umaga o lo’o galue ai le tamā o le aiga i aso uma e sili mamao nai lo lona totogi o lo’o maua.
O Felorita o lo’o faiaoga i se tasi o Aoga Tulaga Lua i lea fo’i vaega o le atunu’u.
“Ia o lo’o maua lava totogi ae o la’u ia lea tala e fai ona e le taitai ona fa’atusalia ai tupe o lo’o maua mai talo nei mai le ma’umaga pe ā ave e fa’atau.
“Ia o le tele lava o taimi ou te alu ou te faigaluega ae pei o le tamā lava o le aiga o lo’o nofo i le fale ma fai ai lava lana ma’umaga.
“Ia e pei la a maua mai le totogi ia e vave ona uma atu ona o le tele o vaega e alu i ai, ae a talo e fa’atau atu, ia e tusa e $400 e maua mai i le aso e tasi.
“O se tupe tele lea mo a’u ma le tamā o le aiga, ia ona aumai ai loa lea ua fesoasoani i le aiga i le tele o mea fai.
“E le gata i lena o nu’u ma le ekalesia.
“Ia o fa’afitauli masani lava o lo’o feagai ai ma’i matou nei i le tele o aso ia ae a leai la ni vaega nei e tua ai i le tele o taimi ia o lona uiga ua fa’aletonu fo’i.
“Ia o talo nei, a o’o i le taimi e ave ai e fa’atau ia e tusa e maua lava le $400 i le aso e tasi, e pei o le tasi mafua’aga lea o lo’u ia taofi e tele atu tupe maua mai ma’umaga nai lo totogi.
“O le laki lava o lo’o i ai i le tele o taimi aua o lo’u iloa i ai ia ua le faigofie nei aso, o le poto lava o le fa’asoa o le ā sologa lelei ai le tausiga o le aiga.
“Ia e pei o le tali lava lea o le galue malosi lava ma ia aua ne’i fiu gofie.