Mana’omia se fesoasoani!

By Vatapuia Maiava ma Ilia L Likou 09 September 2016, 12:00AM

O le taunu’u atu ai o le Fofoga o Samoa i le aso ananafi i le afioaga o Faleasi’u-Uta na  maua ai se fa’atalatalanoaga ma le tinā i a Puaga Siaosi.

O le tamā o le aiga o lo’o galue i se tasi o galuega leoleopo i Malifa ma na’o le $100 le tupe o lo’o ia maua mai i lona totogi mo le tausiaina o le fanau e to’avalu ma le aiga i vaiaso uma.

Na fa’ailoa mai e Puaga, o lea seleni e le taitai ona lava mo le tausia ai o le aiga.

“Ua taugatā tele le soifuaga ua sau le totogi ua laititi ae leiloa pe a fa’afefea ona fa’asoa.

“E to’avalu le fanau ae o lo’o galue le tamā leoleopo i Malifa…ia ma e  maua mai  le totogi o le tamā, e selau talū le tupe maua mai , ma e taitai lava ona a’ua’u.

“E to’alua la’u fanau lea ua savali nei i le tausaga talu ona le toe fo’i i le aoga, o le matua (tama teine) e tatau ona Tausaga 9 i le tausaga lenei, ae o le isi ua 7 tausaga, e tatau ona i le Tausaga 2.

“O le mea mautinoa lava, ua le mafai ona fa’aauauina aoga ona o le lē tagolima ma le lē lava o le fa’asoa.

“O le fanau matutua e to’alua o lo’o fa’aauau pea a la aoga, o le matua o lo’o i le Tausaga 13 ae o le tama’ita’i ei lalo mai , o lo’o i le Tausaga 10.

 “Ia ma na’o aso e mafai ona maua ai le tupe e o ai i le aoga, ae a leai lava, ua le o fo’i.

Na fa’ailoa e Puaga i le Fofoga o Samoa o lo latou aiga e fou le nonofo ai i Faleasi’u-Uta e pei ona aumau ai i le taimi lenei.

“O i matou e fou mai Faleasi’u-Uta nei , ia e matou te omai, ia e lelei nisi o aiga o lo’o i ai a latou tane vai ae o matou e leai, o lo’o o matou  fa’aaogaina  mai le tane o le lotu (o lo’o tafatafa ane) ae a leai se vai e tatalo lava  le Alii e maua mai ai se timu.

 “Ia o lo’o fai fai (tōtō) lava nai fuala’au ‘aina (fa’ato’aga).

 “O Me na amata ai tamā i lana galuega o lo’o galue ai nei, o le tele o aso e alualu le a’o’oga ai o tamaiti , ia nonofo ua  le lava le pasese.

“ Ia ua tele a alu le tamā  e faigaluega i nisi o aso, ua fa’amolemole  i le avepase se’i totogi le aso Faraile totogi lona pasese. 

I le taimi ae le’i maua le galuega o le tamā a le aiga, o ai na fa’alagolago i ai?

“E i ai se tasi o o’u tuafafine i Ausetalia, a vili atu lava e alofa mai, ae a leai ia ua  alu i aiga iinei lava i Faleasiu e maua ai sina galuega, maua mai lea o se tupe  pe $20 i le aso e fa’atau ai se suka…ma e fa’atatau lava mo tamaiti aoga.

“A le o lenā fo’i, ua ou alu i nisi o aiga lata mai e velevelevao ai ina ia tau maua mai ai sina tupe, ma  maua mai se tupe e fesoasoani mai ai.

O le aiga o le tinā i a Puaga o lo’o matua mana’omia lava se tanevai aemaise o se fale-e-aga’i-i-ai.

“Ua leva ona taumafai se fuafuga mo nei vaega uma, ae paga lea, ua matua’i le mafai ona faia o se mea ona o le taugatā o le tau o le soifuaga ma ua utiuti lava le fa’asoa.

By Vatapuia Maiava ma Ilia L Likou 09 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>