O LA’U TALA FO’I

102 Hits

1. Matauina i Tala Fou se ulutala fai mai “Ua teena e le Minisita se tuua’iga….” O lea la ulutala e faasino i le Minisita o le Matagaluega o Tupe Maua o Tiālavea Tionisio Seigafolava.

O lea la tuuaiga e faapea ua totogi e tagata totogi lafoga se $80,000 mo se taavale o le Ford Everest 2016 -na ia faaaogaina i le amataga o le paeaiga a le Palemene…! Fai mai sa manaomia e le Minisita se taavale ona ua alu le Minisita muamua o le Matagaluega o Tupe Maua-ma ave le taavale mo Minisita-ina ua mae’a lona taimi ia Mati.

I se talanoaga la ma le Samoa Observer-na faamaonia ai e Tiālavea le faatauina o lea taavale o le Ford Everest 2016-lea sa fuafua e avea ma taavale a le Minisita.

Ae ui o lea-sa mulimuli ane ona toe faafo’i atu i le Ford Samoa-ae ona faaaogaina le taavale a le Ofisa Sili o Pulega-o le Pikiapu Toyota double cab….! “O le faamatalaga la a le Minisita e faapea- ina ua avea o ia ma Minisita-sa leai se taavale aloa’ia na te faaaogaina-ona ua alu le Minisita muamua ma ave le taavale…!

Ia o se tala umi lenei tala-ae peitai-e le o mautinoa tonu pe o le a tonu lava le faiga masani poo le faiga faavae a le Malo-pe a le toe avea se tasi ma Minisita! O lona uiga o le manatu-“Pe o se faiga masani lea a le Malo-le alu o se Minisita pe a uma lona taimi-ma ave ma ia le taavale a le Matagaluega na faatau i tupe o le afu maligi o tagata totogi lafoga o le atunuu!

O le itu taua la o lenei mataupu-ia silafia lelei e le mamalu totogi lafoga o le atunuu -pe o le a tonu lava le faiga masani a le Malo mai le amataga-pe a uma le taimi o se Minisita! O le uiga o le manatu-pe o se faiga masani lea pe leai! Afai o se faiga masani lea-o ai le Palemia muamua ma le faigamalo na faia? O le a sou taofi? 

2. Matauina foi i Tala Fou se ulutala fai mai –“Ua tagofia e se Sauniga le mataupu tau fualaau faasaina ma kegi-ma o lea tulaga e peiseai na faatino i le faagasologa o se sauniga a Tupulaga Talavou-lea ua matauina ai le toatele o le atunuu sa auai.

O  lea la sauniga o se Sauniga Tele-atoa ma le toatele o le atunuu na auai-e afua mai le ‘au-matutua e o’o lava i tupulaga talavou… Ia-afai la ua tagofia i le faagasologa o lea sauniga ia faafitauli matuiā o loo feagai nei ma le atunuu-ia faafetai i le Atua ua maualafia lea faamoemoe-aua o le upu moni-o lenei faafitauli o fualaau faasaina-ua leva ona i totonu o Samoa, ae le o matua manino mai se taumafaiga malosi ua faata’oto- e fo’ia ai.

E ui lava la i le isi faafitauli lea ua tulai mai o faiga-vaega poo kegi a tupulaga talavou-ae ua na o se mea fou faatoa tula’i mai. Matou te le o fai atu la- o se mea lelei lea, ae masalo a silasila lelei lava i le ‘auga o nei mea uma ua tutupu mai-afai ua lima tētē isi e pei ona vaaia i sauaga i totonu o aiga-e i ai le manatu- e mafua mai ona o fualaau faasaina.

O lona uiga la-e le o se mataupu e tatau ona tatou manatu māmā i ai-leaga o le upu a le atunuu-“O le po’u e avea ma papala-ae o le papala e avea ma mala….! Afai la o lea-faafetai ona o lea ua ta’iala lea Sauniga-ia tatou taumafaiga e tineia nei mea leaga ma le afaina ai o le atunuu! Afai la e afaina le atunuu-ia manatua la- e sili atu ai ona afaina ona tagata! O le a sou taofi?

3. Ua faaalia foi i se tasi o ulutala o Tala Fou e faapea e to’alima ni talavou ua saisai e Leoleo..ma na molia i le vaiaso talu ai. E le o iloa pe o fea e o mai ai nei tupulaga talavou-se’ia vagana ai e faapea- e o mai i le nuu e tasi. Ua molia nei i latou i le amio le taupulea pe a potopoto….! O le faasalaga la mo ia moliaga-o lona tapulaa o le 12 masina i le falepuipui pe a faamaonia e nofosala. O ia la tupulaga talavou e i le va o le 16 ma le 18 tausaga le matutua-ma o le a tulai i latou ia i luma o le Faamasioga i le aso 23 o Aokuso 2016. Ia-o lea la ua tino mai-e moni lava o lea ua i ai kegi a tupulaga talavou i totonu o Samoa….!

O le fesili la-e faapefea pe afai o le a faateleina le aofa’i o nei kegi i totonu o Samoa? E mafai ona toe taofi le solitulafono o soo se ituaiga? Ae o le fesili taua lava-aisea ua faapenei ai nei tamaiti? O i ai ni o latou matua pe ua matua-oti? O fea matai o latou aiga? Afai o tupulaga talavou o Samoa e faalagolago i ai le lumana’i o le atunuu-o le a la le ituaiga o lumana’i pe afai o le a faateteleina nei mea o kegi i totoniu o nuu? Faamata e le o se itu lenei e tatau ona tuu mai i ai le aao malosi o nuu ma afioaga? Ae a Ekalesia? O le a sou taofi?

© Samoa Observer 2016

Developed by Samoa Observer in Apia