LAUGA - “E tupu pea lava le Atua ia”

By Rev. Petaia Setu 09 July 2017, 12:00AM

(Ioane 3:25-31)


O le tauvaga pese o le Mafutaga a faifeau i se tasi tausaga, na sili ai le pese a le auaiga o le faifeau toeaina sa faamasino i le tauvaga lea. Ua faasua nei ina ua uma o le laugatogi, na ’ata le toeaina ma faapea ane i nisi o le aufaigaluega.

Sole, a’e! ua fiu e kau kaokao ifo i lalo le mea e sili a, e alu a’e a ia i luga i le sili! A tautala failauga o le atunuu i le pule ma le silisili ese o le Atua ona faapea lea, E leai sē e taumāsina ma le Atua. A ua uma ona faailoa e Ioane i ona soo, “ O loo mulimuli mai le tasi, e silisili o ia te au….”(Mare.1:7). E ao ina tupu pea o ia; auā o lē maliu mai mai le lagi, e sili o ia i mea uma lava.

E le faigofie ona talia e o tatou lagona faa Samoa lea ituaiga loto ua tautala ai le atalii o Sakaria. O tatou e le fia toilalo a ea? E musu tele ae onoono a’e i luga le isi. E le manao lava tatou ia sili a’e lava se isi i lo oe a? Tainane a e  le o se mea a oe, e le fetaui ma oe; pe le faapitoa na o oe, a ua e tausili lava ma faualuga i mea uma. O lagona na sa toilalo ai soo o Ioane.

Ua fefinaua’i ma Iutaia! Ua fuā i le galuega fai a Iesu! Ua talatala vale i le papatisoga! Ua tautala mai le loto tiga! Ua ō faatasi le lē malamalama ma le gagana foi lea a tatou o le fia tagata! O lagona ia e mafi ai le Samoa ua saofai mai luga. Ua u’u le pule. Ua ave iai le faaeaea, ona toso loa lea e le faavalevalea. Faalogo foi ia Ioane, E le mafai ona e avea se mea e le i avatua e le Atua ia te oe (f.27). E le o sau mea! O le a lau tautoga? O ’e iloa le siomaga o lou olaga e gata mai ai lou saolotoga? E le o le Keriso a’u nei (f.28). Ua iai le tuaoi o o tatou tiute fai.

O vae ma lima tatou e faalauleleia loto ma le soifua tutupu a’e o o tatou tagata. Ae iai lē sili. Sole, ’aua le fia sili. O le mea sili lenā ona inoino iai le Atua. O upu tomua na o le lauga a Iesu, o faamanuiaga o le tagata na te iloa pule lona loto (Mat.5:3). Malamalama lelei le tama lea i le tuaoi o lana tautua. E eseese matafaioi ua totofi ai tatou e le Atua. O ai sē a lē mitamita pe a malamalama lelei i ou faiva alofilima? O le ala foi lea o le mitamita o Ioane (f.29). Ua faamemelo i lana aiaiuli i lona Matai. Fai mai a ia “a o lē mulimuli mai, e sili o ia i mea uma lava” (f.31).

Samoa e, o mea o iai le fiafia mamā, o mea mai lugā. A o mea mai lugā, o mea sa’o ma le tonu na. O le taūa ia o upu a Nelson Mandela e faapea, “A man who steals another person’s freedom is a prisoner of hatred” A o upu a se tasi tamā mătua ua mavae atu o le ekalesia, “Aua nei avea lo tatou naunau ia lelei se mea ua tatou manatu iai ma ala e galo ai, o loo iai faatasi ma lo tatou sesē.

E tupu lava le mea moni ia. E le mafai e se malosi faale lalolagi ona taofia. O mea a le lalolagi e faavae gau ma tuta’ia; a o lē maliu mai mai le lagi, e sili o ia i ou manatu, ma a tatou pulega, ma mea uma lava. E le i nefu le pito lea i le vaai a Ioane. O lana tautinoga, E ao ina tupu pea o ia; a o oe ma a’u, e saasaa lo tatou iloa. E gata lo tatou malosi. E le taumāsina sa tatou tofā ma le amiotonu mai lugā. O faiva o le Atua, o faiva lava o le Atua. E te le iloa loa i le pouliuli o ou manatu, ona tatou vaaia loa lea o le silisili ese o le Atua ma lona mamalu. E gase loa lou malosi, ona faapupula lea o ou mata e le Atua i lana amiotonu ma lona faamaoni. Aisea? E tupu pea lava le Atua ia.

Samoa pele e, o oe o le pule ua uma ona tofi. Mai le Atua Soifua o loo e taulagi i aso uma o le faavae o Samoa. O le Atua na faia le lagi ma le lalolagi; o le atulaulau foi ma oe  o loo ta’ua o le tagata aumau. Ua iloga a tā fe’au. O la’u ma lau. Ne’i ō tā faōa le pule a le Atua, a o lana pule e ā le tu a le tu lava (Sal.33:11).

Le ekalesia e, e tasi lo tatou faiva. E tasi le faatuatuaga. E tasi lo tatou Alii, o le Ao ia e toatasi o le Ekalesia i le lalolagi. Soia le fuā i le galuega tala’i. O fea e fetaaloloa’i ai le lafu a Keriso, tatalo ia ola. Ia le tausolomua oe i le fai pona. Poo fea le pito o le tovine e atia’e ai Keriso, e le afaina lea; auā e tupu pea lava le Atua ia. O le galuega a le Atua. Faigaluega oe, faigaluega a’u.

A ia e manatua, e tauau ina itiiti o oe ma a’u, auā ua fua pau o ta faiva, e lē ā’u. O lē mai luga ua sili o ia i mea uma lava. Fai mai Ioane, O outou o a’u molimau na ou fai atu, E le o Keriso a’u. Pe se ā lou faiva? Fagota oe mo agaga. O le pule, taoto i le Atua o le foafoaga. Auā e tupu pea lava le Atua, e oo i le gataaga. Ioe, e fiu a e tāotao i lalo, e tupu a le Atua ia.

 

Amene

7737063/7783782

By Rev. Petaia Setu 09 July 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>