O se faafitauli le taugata ole soifuaga ua iai nei

By Aruna Lolani 09 July 2017, 12:00AM

O le agai tele ai luga o le tau ole soifuaga, o le tigaina ma le mafatia tele lena o tagata e galulue malolosi aua se faamama avega i o latou aiga.

O se manatua faalia lea a Se Kalolo mai le nuu o Faleatiu ma Vaiusu.

E 64 le matua o lona soifua.

“O le taugata o le soifuaga o se mafatiaga lea o aiga,” o lana tala lea i le Fofoga o Samoa.

“A e le galue, o le mamafa tele atu lena o le tau ole soifuaga ia te oe.

“E lelei a la le  alu i le maumaga e sue mai se meaai aua e sefe ai foi le tupe toe leai se popolega e maua mai ai. 

“E sefe ai foi o tatou mafaufau mai le popolega i mea tau meaai.”

O Kalolo e toavalu lana fanau ma o nisi o latou ua fai a latou aiga. 

“Ua uma aoga a lau fanau ma o le taimi lenei, o loo tau faigaluega uma aua se lelei o le aiga.

“Ou te faafetai a au ia aua ua tau faamama avega mai le tausiga o le aiga aua o lou manuia le fanau.

“O latou a ia e maua ai le fesoasoani pea manaomia.

“Aua ua tatou iloa uma e leai ma se galuega e faigofie pea fai na o oe.”

O Kalolo fatoa foi atu mai le maumaga ina ua maua atu e le Fofoga o Samoa.

“Ia o maumaga a lea e tele ona faaaoga i meaai aua ua fai lava sina taugata o le olaga.

“E tatau foi e le malo ona fai se fuafuaga i le mea.

“Aua o tatou o Samoa,  e le tele ni o tatou tamaoaiga , o mea a e maua mai fanua ia e faaaoga.

“E moi a pule a le malo ia aua o latou lea e vaaia le atunuu ae tatau pea na latou mafaufau mai nai tagata o loo mafatia i le taugata o le soifuaga.”

By Aruna Lolani 09 July 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>