O LA’U TALA FO’I

09 July 2016, 12:00AM

1. Matauina i Tala Fou-o lea fo’i ua toe lapata’ina e le Faipule o Olo Fiti Vaai le Malo! Ae ia manatua foi-sa lapata’ina muamua foi e lea lava Faipule le Malo-ae fai mai le Palemia-e faavalevalea lea Faipule. E tusa ai la ma lenei lapata’iga a Olo-fai mai –e tatau i le Palemia ona toe mafaufau lelei i suiga ia ua toe fai e lana faigamalo-i le Tulafono Toe Teuteu o Sitiseni 2014. O le lu’i la a Olo i le Palemia fai mai’-“afai e alofa moni le Palemia i le atunuu-ona toe Iloilo lelei lava lea- o lea tulafono tau faaofi.

O le faaaliga foi a Olo i le Samoa Observer-fai mai le Faipule o Salega Sisifo-e le tatau ona matua noatia le Palemia i totonu o ana taumafaiga e toe totogi le aitalafu a Samoa mai Saina. O le fautuaga la a le Sui Usufono ia Tuilaepa ma lana faigamalo-ia talanoa na o mea e manuia ai le atunuu-ae le o mea e malaia ola ai.

E tatau ona matua toe mafaufau lelei lava le Palemia  i lea tulaga-ae le o le noatia i le sailia o tupe mai pisinisi a tagata Saina-e toe totogi ai lea aitalafu-ae galo ai isi auga-tupulaga o fotua’i mai. Fai mai la Olo-o lenei tulaga-o le liua lea o tagata Asia e o mai i lo tatou atunuu! Ou te le faailoga-lanu ia i latou- ae o lea ua aliali mai-ua tatou faalagolago ia i latou mo lo tatou tamaoaiga- ma faaauau ai pea ona nonō mai e Samoa tupe mai ia i latou! Ia afai la ua faaalia le popole o lea Faipule-o lona uiga-e alofa i ona tagata ma lona itumalo-ae le o le faavalevalea e pei ona fai mai ai le Palemia!

Ae afai la o le mea noa lava lea tulaga i isi faipule-o lona uiga-o lea e fiafia i le tulaga o loo i ai nei-tusa lava pe pulea ai e Saina mai fafo Samoa! Ia manatua foi-na tulai mai loa le HRPP –faatau loa ma tatou Tusi Folau ma Sitiseni I tagata Saina-ae o lenei lava e taumafai lava le faigamalo e faifai pea! O le fesili la mo lo tatou atunuu atoa-“O se Malo ea o le HRPP le mea nei-pe o le Malo o Samoa? A saga fai lava i fea nei faiga faatautala ma le le alofa?

Afai ua matua le iloa lava e le faigamalo se faiga e faaleleia ai le tamaoaiga o le atunuu-o le fautuaga-“Tuu la le Malo o Samoa e o atu ni tagata e alolofa moni i le atunuu latou te faafoeina ma aveese lenei pologa I aso uma! Afai la o lea foi ua toe sii foi i luga le Tau o le Soifuaga-ae tuu ai pea le VAGST-o se alofa lea mea? O le a sou taofi? 

2. Matauina i Tala Fou le agalelei o se tasi Ekalesia i se isi o Aoga Tulaga-lua-i Tanugamanono. O lea a’oga fai mai -na faatonuina e le Matagaluega o le Soifua Maloloina ina ia tapuni-se’ia vagana ai ua uma ona toe faafou ma faaleleia faleui mo tamaiti.

O lea la Samaraia agalelei- o le Ekalesia o le Aupaia o Aso e Gata ai! Ia –afai la o se galuega lelei  lea ua fai e le Ekalesia lona faata’ita’iga mo i tatou uma-o lona uiga-e tatau foi ona avea i tatou ma Samaria agalelei! E le afaina pe o le a le tapuaiga poo le nuu-ae taua tele le fesoasoani mo le tagata o loo manaomia! Afai la e mafai ona tatou faatinoina lenei faata’ita’iga lelei ua fai e le Ekalesia-aisea e le faia ai? O le a sou taofi? 

3. Matauina foi i Tala Fou se tamaitai talavou ma lana Tusi-“O le Leo o se Motu”-ma o lea tamaitai o Lupeomanū Vaai- o loo i Lonetona mo le tatalaina aloa’ia o lana Tusi. O le Tusitala la-e na o le sefulu-lua tausaga le matua-ma e a’oga i le A’oga a Taupousa-ma na ia maua le Pine Auro mo lana Tala. O le igoa la o le Tusi-“Leo o se Atumotu”-o lona uiga-o “Leo o le Tala o Tupulaga Lalovaoa-e ala i se Tauvaga-Tusitala i le tausaga talu ai.

O lea la tamaitai o loo i Lonetona I le vaiaso nei, ae fai mai e tofu lava le tausaga ma le tala na te tusia-ma o se tusitala uiga ese. O se tamaitai mai Vaoala-ma o ia tusi –o le taunuuga lea o ana miti.O le a la le leaga o le avea ma tusitala? O le a sou taofi? 

4. Matauina foi i Tala Fou o loo i Niu Sila le Palemia ma lona faletua mo se Fono-ma fai ai se siakik faa-foma’i o le Palemia. O loo malaga faatasi le Palemia ma lona faletua ma le Ofisa Sili o Pulega o le Matagaluega a le Palemia-o Agafili Shem Leo. O lea fono e fai i Niu Sila. E le o iloa pe o le a lea fono-ae faapea e toe taliu mai le malaga i se taimi o lea vaiaso! O le a sou taofi? 

09 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>