Laiti mea na fa’aleagaina: Taunu’uga o su’esu’ega na fai

Tusia Ilia L. Likou ma Fa’aliliu e Maiava ,

129 Hits

The volume of diesel combusted was 182 tonnes as per discussions with the on-site reps.

The volume of diesel combusted was 182 tonnes as per discussions with the on-site reps.

E le-tele na’ua se a’afiaga o le si’osi’omaga sa iai ina ua pa ma mu se tasi o tane-suau’u i luga o le Uafu i Matautu, lea na maliu ai se tasi o le ‘aufaigaluega a le Kamupani Suau’u – le Petroleum Product Supplies Ltd. - i le amata o le tausaga nei. 

O le fa’ai’uga lena a se Vaega Fa’apitoa sa su’esu’eina a’afiaga o le si’osi’omaga mai lea fa’alavelave, na matua tētemū ai ma popole le to’atele o le atunu’u ma tapunia ai fo’i le taulaga atoa i lena aso i le masina o Aperila.  

O le Vaega Su’esu’e lea sa aofia ai sui mai le Matagaluega o Puna’oa Fa’aleNatura ma le Si’osi’omaga, le Fa’alapotopotoga o Su’esu’ega Fa’aSaienitisi a Samoa, le Vaega mo le Si’osi’omaga o le  Pasefika, le Matagaluega o Tupe fa’apea Inisinia Fa’apitoa e to’alua mai vaega-tuma’oti.

I se ata o le ripoti a le Vaega Su’esu’e lea na ‘auina atu i le Komiti Faufautua mo Fa’alavelave Fa’afuase’i - lea fo’i na fa’ao’omai i le Samoa Observer - o lo’o ta’ua ai e fa’apea, latou te le’i silasila tonu pe na fa’alogoina fo’i se nanamu o se suau’u-tiso na masa’a mai le tanu na mu. 

Moni sa matua fa’aleagaina ma mu le tino o le tane, ae leai ma se “va’aiga o se suau’u masa’a pe sisina atu i isi nofoaga tua’oi ae maise ai le nofoaga o fa’aputu iai pusa-la’u-oloa i sasa’e ma sisifo ma le tua’oi i sauté ma le sami. Sa fautuaina le ta-loka uma o tane-suau’u i le nofoaga atoa o lo’o iai tane-suau’u.”

O le fa’ai’uga la lea o le su’esu’ega, e la’iitiiti lava se a’afiaga o le si’osi’omaga na iai.

 “I le mae’a ai ona asia o le nofoaga lea na tupu ai le mu fa’apea talanoaga sa faia ma sui o le Matagaluega o Tupe, ua fa’amalieina ai le matou vaega, e le tele na’ua se a’afiaga o le si’osi’omaga na iai ae maise o nofoaga e tu-lalata iai,” o se vaega lea o le Ripoti.

“E fautuaina ai: Le leai o se isi iloiloga o a’afiaga o le si’osi’omaga e tatau ona toe faia i le nofoaga na tupu ai le mu.” 

O le Aso 04 o Aperila i le 10.00 i le taeao, na lagona ai le pa-leotele i se tasi o tane e teuina ai le suau’u i luga o le uafu i Matautu-tai.

O lea pa leotele  na tupu ai se afi, ma fa’atotope atu loa iai le ‘Au-Fui-mu a le Pulega o Mu ma ‘Aua’unaga Fa’afuase’i. Na ‘ave’esea uma e vaega-galulue mo fa’alavelave fa’afuase’i, tagata uma sa i luga o le uafu fa’apea nofoaga e taulalata iai. 

E to’atasi se tagata-faigaluega o le kamupani-suau’u sa faigaluega i le tane-suau’u lea, na maliu ai i lea fa’alavelave. O le isi sa la to’alua, na togafitia ma toe te’a i tua i le aso lava lea. 

Sa vavave ona tapunia atoa le nofoaga ‘autu mo suau’u i Sogi i le aso lea, mo le puipuiga lava o tagata-lautele, o pisinisi ma faleoloa, le taulaga atoa ma le atunu’u. 

O le fa’amoemoe ‘autu o le Vaega mo Fa’alavelave Fa’afuase’i, o le taofiofia lea o le sosolo o le afi i isi tane-suau’u e lua o lo’o tutu-fa’atasi ai i le uafu.

Ina ua silafia e le Ali’i Palemia, Tuila’epa Sa’ilele Malielegaoi le fa’alavelave lea, sa ia ta’ita’ia ai loa ma fa’atonutonu galuega a le Komiti Faufautua mo Fa’alavelave Fa’afuase’i mai le Nofoaga ‘Autu o le Vaega Tinei Mu ma ia talosagaina ai loa se fesoasoani a Malo o Ausetalia, o Niu Sila ma le Iunaite Setete o Amerika, ne’i sosolo ma tele le mu. 

(Silasila i le Damage minimal, investigation finds mo le Ripoti a le Vaega Su’esu’e na tu’uina atu i le Komiti Faufautua mo Fa’alavelave Fa’afuase’i)

© Samoa Observer 2016

Developed by Samoa Observer in Apia