E ono avea fugala’au ma tupe

Tusia Fetalai Tuilulu’u ma Ilia L. Likou ,

77 Hits

Enoka Elia mai Afega.

Enoka Elia mai Afega. (Photo: Fetalai Tuilulu’u )

O le fa’aaogaina tatau o le lau’ele’ele o se tasi lea o vaega taua e ao ona fa’atinoina aua se tupe fa’asili i totonu o aiga.

 O lea le manatu o Enoka Elia o Afega i le fa’atalatalanoaga ma le Fofoga o Samoa i le aso ananafi.

Na ia fa’ailoa o lo latou aiga o lo’o fa’alagolago tele i le togala’au o lo’o i luma o o lo latou fale aua tupe maua.

“Ia e masalo o le va’ai a tagata o fuga o la’au ae o a’u ia o tupe mea nei ou te va’ava’ai atu ai.

“O le togala’au lenei o lo’o ua matua’i fa’alagolago tele ai lo matou aiga i le taimi lenei.

“I si o matou aiga, o si o’u tina lava o lo’o tele ina ia galuegaina le togala’au i taimi uma, ia ma ou te sau lava la ou te fesoasoani ai pe a maua lava lena o se taimi.

“Ia o e tele lava o le ‘au fa’atau latou te fa’aaogaina mo le teuteuina o falesa ia po’o nisi fo’i o vaega e tele ina o tatou fa’aaogaina ai.

“O le tele lava o le tau matou te fa’atauina ai le tele o taimi, ia e tai $5 i le fusi …ae pei lava la o aso To’ana’i e tele ai lava tupe maua, e toeititi lava a o’o i le $200 pe a lelei lava a.  

“O le taimi muamua lava fa’apea a’u ia ai ua na’o se togala’au e teuteu ai fale ae uma ane ia na fa’atinoina lava e si o’u tina aua se tupe maua ma se tupe fa’asili o si o matou aiga.

“Ia a alu lava si o’u tinā i isi fe’au mo le aso, e pei o sa’u lea galuega ou te sau fai i luma nei, e tapenapena ia ma velevele nai vao, aua ou te iloa o lea lava le tulaga o lo’o i ai, o le matua’i fesoasoani tele lava o lenei togala’au mo a’u.

Na ia ta’ua o le agaga lava o lona talavou o le nofo ai lea i le aiga, e atia’e o so’o se itu aua lava le aga’i le lumana’i.

“E pei o lea lava le tulaga na fa’ama’amulu ai ma le aoga, ona ua va’ai fo’i ua leai nisi o le aiga.

“I a te a’u , ia o lea lava ua i ai le taimi lenei.

© Samoa Observer 2016

Developed by Samoa Observer in Apia