Ia fa’amuamua le Atua i mea uma - o se  ta’iala fa’aauro lea na mulimulita’ia e le tama’ita’i o Soteria Sekuini a’o feagai ai o ia ma a’oa’oga mo le ono tausaga.

O le Aso Faraile na se’i mavae atu nei na fa’au’uina ai o ia fa’atasi ma le silia i le fa selau o le fanau i le Iunivesite Aoao o Samoa i le mae’a ai o le olaga a’oa’oina na feagai ai mai le tele o tausaga.

O le avea ai o ia ma foma’i o se miti na fa’ananau i ai lona loto a’o itiiti lava o ia.

Na ia fa’ailoa i le fa’atalatalanoaga ma le Samoa Observer lona agaga fa’afetai mo i latou uma na mafai ona fesoasoani i so’o se itu ua mafai ai ona i’u ma le manuia taumafaiga sa feagai ai.

O le tama’ita’i foma’i, Dr Sekuini o ia o le alo e fa’asino i a Vaele Iona Paia’aua Sekuini ma Tupuola Matimaivasa Sekuini, ma o le ulumatua o le fanau e to’afa,  to’atolu uso ma le tuagane e to’atasi.

O ia na avea ma Sili Aoao o le Fa’atufugaga  o Su’esu’ega Fa’afoma’i i le Iunivesite o Samoa, 2018.

Na a’oa’oina o ia i le Aoga Tulaga Lua a Sagata Malia i Savalalo ma fa’asolo atu ai lava i le Kolisi i Vaimoso.

Na fa’amanuiaina taumafaiga mo le Iunivesite Aoao o Samoa ma maua ai le avanoa sikolasipi e tu’ua ai le atunu’u mo le Aoga Fa’afoma’i i Fiti, ae le’i mafai ona fa’aauauina ona o le fa’afaigata mo ia ona tu’ua lona aiga aemaise matua mo se taimi uma, ae fa’asilisili ai o le le feso’ota’i o vaega uma ona o le taimi  muamua lea ua alu ese atu ai ma le atunu’u.

O lea na ia filifili ai loa e toe fo’i mai e fa’aauauina lona ola taumafai i Samoa ma a’oga ai loa i le Aoga Fa’afomai (O.U.M) i Samoa nei se’ia o’o mai lava i le taimi lenei lea ua i’u manuia ai ana taumafaiga uma ma le manuia.

Sa ia fa’ailoa le le faigofie o le olaga a’oa’oina ona o le tele o lu’itau ese’ese na feagai ai fo’i, aepeita’i na mafaia mea uma i le fesoasoani mai o le Atua.

O le Susuga i le Tama’ita’i Fomai i a Soteria Sekuini e mai afioaga, Matavai Safune, Sa’aga Siumu ma Vaitele Uta.

O ia fo’i o se faiaoga Aso Sa ma se tagata-lotu o le Ekalesia Fa’apotopotoga Kerisiano i Samoa, Vaitele-Uta.

Sa ia fa’afetaia i latou uma na mafai ona fesoasoani, faufautua i so’o se itu ina i’u ma le manuia taumafaiga uma.

“E fa’afetai atu i le Fa’aulu o le Aoga Fa’afoma’i  , Le Mamea Limbo, Dr. Malama Tafunai, Dr. Dyxon Hansell, Dr. Ben Matalavea, Dr. Faitasi Gaee, Veronica Wong, Matila ma Tina ma i latou uma na fesoasoani.

“E le gata i lea o la matou vasega atoa na o matou galulue fa’atasi mai le ono o tausaga, fa’afetai tele lava, malo le tau.

“E le gata i lea o le au faigaluega atoa o le Soifua Maloloina, ua fa’amalo!

“Mo nai o’u matua, Paiaaua Iona ma Matimaiava Sekuini, o matua o o’u matua,  Paiaaua Vaivaa Sekuini ,  Tuunasoli Tuliese, Iula Pasia o le tinā i a  Sauimoana Itula, Utaileuo Tui Itula ma Taofi Teo, fa’afetai fautua, la outou pule lea!

“E le fa’agaloina o’u Tamā  Fa’aleagaga o le E.F.K.S. Vaitele-Uta,   Susuga i a Rev. Foma’i Lafaiali’i ua ua fai-i-lagi-le-folauga aemaise Rev. Muao Fagasua, fa’afetai tatalo e le fa’agaloina fo’i Rev. Lauititi i Matavai Safune, o a outou talosaga molia ua mafai ai pea ona maua le malosi fa’afouina mai lea taimi i lea taimi, ma ua i’u ai lava le manuia o le taumafai vaivai.

Sa avea fo’i Dr. Sekuini ma saunoaga autu o le aso  e fai ma sui o le ‘Au Fa’au’u e momoli le fa’afetai tele i a’i latou uma na lagolagosua i a latou taumafaiga uma.

“Ou te muai fa’apoipoi lili’a fa’aalofisa o tupu nai le malae o le Vavau, aua le aso ua tautupu ma tautamali’i. 

“I le susu o lau Susuga i le Ta’ita’I o le sauniga, fa’atulou i paia Faale-malo, afio o lau Afioga i le Ao Mamalu o le Malo ma lau Masiofo.

“Afio  lau Afioga i le Sui o le fono a Suitofia, le afioga  i le Alii Palemia, Minisita o le Kapeneta, le susu o lau Afioga i le Ao ma le Fa’aAo o le Iunivesite o Samoa, lau afioga i le Tapa’au , fa’apea le vasega o matua o faiva o Faatufugaga Eseese o le Iunivesite. 

“Tulou le paia o Matua, ma le mamalu o le au vala’aulia. 

“ O o outou Paia ma o outou mamalu o lea nu’unu’u atu  fa’atini o tausala aua o Samoa o le atunu’u ua uma ona tofi. tulou tulou tulouna lava!

“Ua ou tulai atu i le ava ma le fa’aaloalo tele, e fai ai lou leo faatauva’a ma fofoga o le au fa’au’u o lenei tausaga 2018. 

“E muamua ai ona si’i le viiga ma le fa’afetai i le Atua, aua ana leai Lona Alofa, tatou te le aulia mai lenei aso matagofie.

“Faafetai atu i lau afioga le Alii Palemia ma le faigamalo mo lo outou sao taua, e ala i le fa’atupeina o aoga a le toatele oi matou le fanau, aua,  e le taitai lava tupe a nai o matou matua.

“Faafetai i le galuega tatalo a Au’auna a le Atua i soo se Fata-faitaulaga i totonu o Samoa, sa lagona ai le mafanafana o le Atua, sa fa’aosofia ai lo matou loto tetele e fa’atino le ola tauivi.

“Faafetai i le Ao ma le Fa’aAo, le Tapaau,  fa’apea le vasega o faiaoga, ma s’oo se Fa’atufugaga i totonu o le Iunivesite.

“O le mea moni, e le fo’i fua le sailiga ma le asamoga aua ua outou tatala magavai eseese, e ala i lo outou   tomai ma le poto ua faameaalofaina ai outou e le Atua. 

“Malo le alofa, malo le fa’asoa, fa’afetai saumolia. 

“O la matou tatalo ia saga utupupuina e le Atua o manatu, la outou tofā saili, ma foai atu le malosi e fa’aauau ai o outou faiva.

“E fa’afetai fa’apitoa i le tapuaiga o nai o matou matua, malo saili, malo le onosai, e ao foi ona matou faapea atu, malo le ote, aua ana le malosi la outou ote, faapenei matou te le auai mai  i lenei faauuga.

“ E to atu o matou pulou ia te outou. 

“Ae aua tou te popole, o le a avatu uma tupe o o matou totogi pe a maua matou galuega e pule ai outou, ma la matou tatalo, Ia faamanuia le Atua ia te outou.

“Mo le ‘Au Fa’auu o lenei Tausaga, Malo le tau, Malo le Tauivi. 

“Oa taleni ma meaalofa ua fa’asoa mai e le Atua mo i tatou, ia tatou faaaoga tatau, oa foi galuega o le a galulue ai i totonu o le malo, kamupani ma soo se faalapotopotoga, poo totonu foi o aiga. 

“Ia faia ma le alofa, ia faia foi ma le faamaoni, aua se manuia o si o tatou Atunuu o Samoa.