LAUGA - “A o le Fesoasoani, o le Agaga Paia lea…o ia lava na te a’oa’o ia te outou i mea uma lava….”

Tusia Rev. Petaia Setu ,

2513 Hits

Rev. Petaia Setu

Rev. Petaia Setu

(Ioane.14:26)

E le faigofie i aiga potopoto poo faiga nuu, i ekalesia foi ma faalapotopotoga eseese, ona talia pe faagaloina le aveesea o sē, sa fai ma poutū ia i latou i upu fai o le va i fale, ma le va i fafo.

Sa fai ma malosiaga ma olataga mo latou. Sa mapu iai i aso leaga. Sa fai ma sulufa’iga i taimi o puapuagā. Sa tautala ma galue mo lo latou manuia ma so latou lelei. Sa ia tuu lona ola i lona lima e auauna ma tautua ai mo se sa’olotoga ma so latou manuia. A! ua pule le Atua! E lē ia a sa’afi upu a le atunuu e opogi le tagi talatala a le tupu o Isaraelu (II Sam.1:27) ‘Talosia ia pa’ū se toa ae tula’i se toa’ ia poo le momoo, ‘ia soo le fau ma le fau!

Na silafia lelei e Iesu le femēmēa’i ma atugaluga ua i loto o le au soo. Fai mai Iesu, “e foaiina mai ia te outou le tasi Fesoasoani. ‘A o le Fesoasoani, o le Agaga Paia lea, e auina mai e le Tama i lo’u igoa, o ia lava na te a’oa’o ia te outou i mea uma lava….”

E lua ni matafaioi taua a le Agaga Paia e tatou te vaavaai iai:

(i) O le Fesoasoani o Taimi uma:

O le lesoni lenei, o le amataga lea o se vaega taūa tele o le tu faa- matagi ’olo o le Faaola, e sufi loto, ma faalaei’au i le faatuatua ma le loto ia talitonu o le ausoo, ina ia tulai mai o ni puni matagi mo le galuega faaola. Ua i si’ui le mafanafana o le nonofo faatasi. Ua toe o se aga ona oo lea o Iesu i ona mamalu (tiga o le oti). Ua sufi le loto palaai. Ua faamafanafana i le loto ua vaivai. Ua masalo le ausoo i le tuua ia tama. A o Iesu, ua tautala i le Fesoasoani e tumau e oo i le gataaga (f.16). E tolu tausaga la latou mafutaga; a o le Agaga Paia, o le Fesoasoani lea o taimi uma lava o le olaga. E le faapito pe faaitu’au; e le faatilotilo pe toe feāu. Ae mafanafana lava lana fe’au. O lana galuega lavea’i, o le puipui ma le faasaoina lea o tagata uma mai ala leaga a Satani, i le ma le faasalaga e faavavau i le afi.

 Samoa e, o fea o loo e faalagolago iai? O sa’o le leo o loo e mulimuli ai? Fai mai le tupu o Tavita, ‘O e faalagolago ia Ieova, e faapei o le mauga o Siona. E le faagaeetia ae tumau e faavavau’ (Sal.125:1). O le malosi e faatusa i le mauga.

E le maluelueina. E mausalī. O le malosi foi lea o loo taulai pea iai le ola o lenei tupu tauleleia (Sal.121:1-2). Lea lava o loo pese ai pea lenei taitai faamaoni ma le mata’u i le Atua. ‘E moni, e mulimuli mai ia te a’u le agalelei ma le alofa i aso uma o lo’u ola, ou te nofo foi i le fale o Ieova i aso e tele lava.’ (Sal.23:6) Ioe, o le olaga atoa. Samoa, tatou te le ‘o vaai tino i le Atua ma lona Alo o Iesu Keriso.

O o tatou tupulaga, o loo ua fegai ma le Agaga o le Atua, o le Fesoasoani lea o taimi uma. O loo ia te oe ma a’u i taimi uma, ae e te le o lagonaina. O loo tatou faataliga tuli pea lava ma faasaga ese mai le Agaga o le Alofa tunoa. Ae o loo tu pea i lou olaga ma puipui atu lou loto ina ia faaavanoa mo ia, ae ua tatou le iloa (Faali.3:20). Maifea ona e le iloa? Talofa e, ua galo ia te oe le tautinoga a lo tatou Alii; ‘Ou te le tuua outou o matua oti, ou te sau ia te outou’ O tatou, a aumai loa le tofa i le matuatala, o lena! O saunoaga a Iesu e le tuulafoa’ia. Ua le o ni upu tau ina faalele. A ‘ua fai mai loa e toe sau, o lena! E toe sau.

A ‘ua saunoa mai e auina mai le Fesoasoani e mafuta ma tatou e faavavau, o lena. Vaai Samoa, ua fai lou tino. Ua maua lou malosi. Ua e ’ai ma ’e ma’ona; ua e maua le poto ma le tamaoaiga. Ona fai mai lea, semanu le faatoaga a si toeaina; semanu le vaa fagota…semanu galuega a tamaiti…semanu le faleoloa; le pisinisi; atiina’e! Semanu lava taavale…semanu le lotto; semanu lava le Digicel/Bluesky…semanu le tulai mai o le HRPP/Labour/Democratic? Semanu lava  Saina/Ausetalia/NZ? Semanu e a? A’o afea e iloa ai e lou gutu  faapea ane, semanu le Fesoasoani a le Agaga o le Atua…? E te silafia Samoa, pau lava lea o le ituaiga tagata na lafo iai e Iesu le upu, ‘vale’ ‘Oe na le vale….’ (Luk.12:20) A o le upu lea, e le talia e Iesu (Mata.5:22).

Ua lafo e Iesu i le tagata ua faalagolago lona ola i mea e mavae. Ua faamoemoe i le poto, i le malosi, i pulega faale lalolagi. Ua fai le lalolagi ma ona fesoasoani. Ioe, e te fiafia ai, e te saoloto ai, e te manuia ai, ae lelei puupuu! E gata mai. E mavae; e iai lona muta’aga. Peitai o le Agaga o le Atua Samoa, o le Agaga Faaola. O le tiute lea a le Fesoasoani ua tautino e Iesu i ona soo. ’Aua le atuatuvale, ’aua le popole, ’aua le faalotolotolua. E foaiina mai ia te outou le Malosi, le Mana, le Fesoasoani, o le Agaga Paia lea. “Auā o le mea o iai le Agaga o le Alii, o iai le saolotoga” (II Koei.3:17)

 

(ii) O le Faiaoga o Aso uma:

Fai mai Iesu, o le Agaga Paia, na te a’oa’o ia te outou i mea uma lava. O mea lelei uma ua silafia ma ua mautinoa e le Alii tatou te saoloto ma ola manuia ai i lo tatou faaolaina, o le galuega faaauau lena a le Agaga Paia. Na te faatonu, faasino, taitai, ma aoaoina ai tatou. A oo ina tuua ia tama, e au ina galo mea uma lava. O vaaiga na i le le mautonu o le au soo. O aso faapea, e onomea lava le toa.

E tatau le fau i le fau. Ia le su’e alofivae, a ia solisoli mulivae. Ia le see ese ma le faavae. “E faamanatu mai foi o ia (Agaga Paia) ia te outou i mea uma ua ou fai atu ai ia te outou” E ’uti’uti aso o mafutaga. A o le faavae tumau lea, ua faataoto ai le mafutaga ma le Faiaoga o aso uma, ia tumau i la le Agaga.

“Auā o e i la le tino, e loto atu i latou i mea a le tino; a o e i la le Agaga, e loto atu i mea a le Agaga (Rom.8:5; Ioa.3:6). E le tauilo fanau a le Agaga. O ē ua a’oa’oina ma taitaiina e le Agaga. E le siligia lo latou tamaliiaga. E iloa i le amio ma uiga o o latou olaga. E mautinoa foi le tu malo ai o le galuega faafaiaoga a le Agaga.

O moomooga ia o le Alii Faaola; ia talia le Agaga Paia e fai ma ou Faiaoga. Auā e malamalama i le natura o mea taitasi o le foafoaga. Sa iai, a o le i faia se mea e tasi i le amataga. Na te faatoafilemuina le atuatuvale. Na te faamalamalamaina ou ala. Na te taitai oe i manuia atalī. Na te faasino oe i le ola e faavavau. O lona uiga la, o le vale foi le tagata na te misia lenei avanoa.

Samoa e, o a’oa’oga a le Agaga Paia, o le a’oa’oga i lou faaolaina ia Keriso Iesu, e ala i le galuega faatino a le Agaga, o le Faiaoga o aso uma o lou ola. “Auā e a’oa’o le Agaga Paia ia te outou… i upu e tatau ona fai atu ai” (Luk.12:12).

Afai e te le o lagonaina sou saolotoga moni ia Keriso Iesu, o lona uiga, e sesē le faiaoga lena e te taumulimuli ai. Ou te toe fai atu, vaai lelei. E tasi lava le leo e te faalogo iai ma fai ai lau faaiuga, o le Agaga Paia. Faato’a e saoloto lava pe a e maua le Agaga o le Atua (II Koei.3:17). Ua faapea le upu a se tasi faifeau iloga o le Talalelei, “Look for the church where the Spirit of God is moving” Ua toatele le au tala’i; o taitai ma faifeau ma lotu eseese.

Ua faiaoga lava le tagata ia poo le lotu foi i ona mana’o. A loto lava e toso i sasa’e, ua o i sasa’e. A mana’o e fai mea ia e faapea ma faapea, e fai lava e le popole poo ai e afaina ai. E pasese ia Keriso, ae fai mai Paulo, ua matua tumu le Atua i le inoino (Rom.8:8).

E le soona saafi gagana a le atunuu mo se lelei faaauau pea. Auā a soo le fau ma le fau, e mautinoa le malosi tumau. E le siligia le lelei faaauau. E manino le amiotonu faifaipea. Ioe, o le ala lea e tagi fauo ai i se toa sui toa. Auā e tumau ai le malamalamama, le manuia; le pa’ia tausia; le moni tuu oti. Ua faapea le sa’i a se tasi tamā sa fai ma taitai o le ekalesia i le fono a faifeau i le lua sefulu tausaga ua mavae, ‘Talofa e, i le ekalesia pe a uma atu matou!’

O toeaiina sa a’oa’oina ma taitaiina e le Agaga o le Atua. Fai mai isi, E le o iai foi Tuivalea. Ioe, e le o iai Tuivalea, ae o loo tupu pea le tele o mea faavalevalea. Ua manatu isi, o loo iai pea Mose ma le au perofeta. E sa’o lava, a o perofeta foi i aso nei ua tatou vaai tino ai i le toatele o le lafumamoe ua tautevateva!

Le ekalesia e, faalogologo mai ia. O Iesu Keriso, o le Ulu o le Ekalesia. O le Agaga Paia, o le Fesoasoani lea mo oe i taimi uma. O le tatou Faiaoga ia o aso uma. “Na te a’oa’o ia te outou i mea uma lava; e faamanatu mai foi o ia ia te outou i mea uma ua ou fai atu ai ia te outou.”

 

Amene

7737063/7783782

© Samoa Observer 2016

Developed by Samoa Observer in Apia