“Na o a’u o se ‘au’auna, ae le o a’u o se toa”

By Pai Mulitalo Ale 09 April 2016, 12:00AM

Matua tete’e mai o, e le ta’ita’i o fui-mu loto-tetele ia na matua pipi’i lava i le tane-suau’u leana mu i le uafu i Matautu i le Aso Gafua, le mau-vi’iga na o-atu fa’atasi ma fa’afetai ma le anoano o fa’amalo, ona o lo latou loto-tetele. 

Na tuli-‘aupu e le Samoa Observer se finagalo fa’aalia o le Susuga a Aleaga Fuafiva, le Ta’ita’i o le Osofa’iga, lea na fa’apea mai, o le fa’atinoga lava o le galuega ua totofi latou e fai. 

 “O le Vi’iga lava ia o Le Ali’i,” o lana fa’amanatu mai lea. “O Ia lea na malu ai ma saogalemu Samoa ma ‘ou te fai atu ai, ‘ou te le-ta’ua a’u o se toa, ua na o a’u lava o se ‘au’auna sa fa’atino le mea e tatau ona ‘ou fai.” 

Peita’i, e le ‘auai uma ai finagalo o le atunu’u lautele. 

E tele ma anoanoa’i vi’iga ma fa’afetai ona o le galuega lelei sa feagai ma Aleaga ma le Vaega, ma fa’afetai ai lo latou totoa i le fa’atinoga o a latou galuega. O nisi, na matua o’o-o’o lava o latou mana’oga i le malo, ina ia aloa’ia lelei le galuega a fui-mu nei, i se fa’ailoga fa’apitoa mo le loto-totoa. 

Ae faigofie lava ona iloa ma malamalama i le mafuaga. A’o taufai taufetuli-‘ese le to’atele i nofoaga mo le saogalemu, ae tamomo’e atu Aleaga ma lana Vaega Fui-mu aga’i i le tane o lo’o sasao malosi le afi, fa’atasi ma nai a latou fa’aga’au ma mea-faigaluega e le taitai ona gafatia le fa’alavelave.

Ina ua toe to-manatu i le mu i le Aso Gafua, na ta’ua e Aleaga, e matua leai lava se taimi na tau mafaufau ai i so latou lava saogalemu.

“Ua iai le galuega e fa’atino, ma na matou iloa lava, e leai lava se isi tagata e fa’amoemoe iai vagana matou ma a leai loa, o le a matua afaina soifua o le mamalu o le atunu’u,” o lana fa’aaliga lea.  

Ua 25 tausaga o Aleaga i le galuega lea, ae na ia ta’ua, o le mu lea i le Aso Gafua, o le afi aupito faigata lea ua latou feagai.

“Sa faigata tele ia matou ona fa’alatalata tele iai, ona o le vevela tele,” o lana fa’aaliga lea.

“O le mea moni lava na ‘ou matua fefe, na ‘ou popole tele, peita’i, e le mafai lava ona ‘ave’esea lo’u mafaufau mai la’u galuega sa fai i lena taimi aua, o le soifua o tagata fa’apea ola o a’u tama sa fa’alagolago uma ia te a’u.” 

E le ‘auai lona finagalo i tala fa’apea, o le mu lea sa, e le ono lamatia ai le soifua o le atunu’u lautele.

“E moni, na lamatia le soifua o tagata. E matua tele ma anono le mau fale e ao ona fa’asaoina e aofia ai ma meatotino a le malo. E matua to’etele naunau soifua e ono afaina.”

O lana saunoaga, o le taimi lava na taunu’u ai i le mu, sa taumafai ai e puipui isi tane e lua. Na ia fa’amaonia fo’i, na matua ‘umi se taimi o tau tape le afi ona e le’i iai sa latou fana-‘oa i le taimi lea.

“I ituaiga fa’alavelave fa’apea, pau lava lea o le fai o le mea e gafatia ma fa’aaoga mea-faigaluega ua iai.”

Na fa’afetaia e Aleaga le lagolago mai le Kamupani Suau’u, le PPS, o a latou pa’aga-fuimu mai le malae-va’alele lea na fesoasoani ma fa’asoa mai le latou loli-‘oa, ae maise i latou uma sa fai lo latou sao i lea aso.   

“’Ou te fa’afetai i Le Atua, ua mafai ona matou tapeina le afi i totonu o le fa (4) itula,” o lana saunoaga lea.

“O se tala-pelo pe a ‘ou fa’apea atu, ‘ou te le’i fefe. Ae fa’afetai i Le Atua ua Ia fa’asaoina matou uma. 

O Aleaga – ua 45 tausaga, o se ali’i fui-mu i lona soifuaga atoa. Na amata i le 1992 ma i nei tausaga e tele, na saunoa, e ui i le tele o lu’itau ma fa’afitauli, e o’o atu lava e fa’atino la latou galuega, o le puipuia lea o Samoa ma ana meatotino.

Mo le aga’i i luma, na ioeina e Aleaga fa’amatalaga fa’apea, o se fagufagu le fa’alavelave na tupu i le Aso Gafua.  

I le va’ai a le ‘Au’aunaga Fa’aTineiMu, e matua mo’omia lava nisi a’oa’oga fa’apitoa mo le fo’ia o ituaiga fa’alavelave  fa’apea.

E talitonu fo’i si ali’i, ma’umau e, atonu e sili atu le ‘au’aunaga pe a fa’aleleia atili mea-faigaluega.

“O le fa’alavelave i le Aso Gafua, na tu’u iai le iloa ma le malosi e gata ai. Ia a’u lava ia, e leai se mea e ono mitamita ai fua ae mo lo tatou atunu’u, e ao  ona tatou momoli le fa’afetai i Le Atua ona o Lana puipuiga.” 

O Aleaga, e mai afio’aga o Matautu i Falealili ma Papauta. Leva ona fa’aipoipo ua matutua fo’i le fanau e to’alima. 

Malo Toa! Malo Loto Tele!

By Pai Mulitalo Ale 09 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>