E silia i le tolusefulu aiga ua tausaga o papaa’ao i Sogi, o le a ‘ave’ese fa’amalosi e le malo, ona ua tele tausaga na fautuaina ai e fa’ase’e atu i lo latou nofoaga fou ua saunia, i Falelauniu, ae latou te’ena. 

Na fa’amaonia mai lea tulaga i le Samoa Observer, e se tasi o le ‘aufaigaluega a le Fa’alapotopotoga mo ‘Ele’ele a Samoa (SLC), e le mana’o e fa’alauiloa lona suafa e fa’apea, ua tu’uina atu nei le lapata’iga mulimuli mo aiga nei, ina ia tu’ua loa lea nofoaga lea ae aga’i i fanua ua mae’a ona saunia mo latou, a’o le’i o’o i se tulaga e ‘ave’esea fa’amalosia ai loa.

“E le’i iloa la se aso e ‘ave’esea ai aiga nei, ae mafai ona fa’apea atu, e le o toe mamao lava,” o le fa’amatalaga lea a le tagata-faigaluega.

“Leai a se si e mana’o e tuli-‘ese se tagata, a ona ua leai lava se si matou mea e toe mafai, talu ai, ua fia nei tausaga. Ua leva ona lapata’ia a’iga nei ma ua 

ave fo’i i ai fa’amanuiaga o fanua e si’itia i ai i Falelauniu.

“A o le fa’anoanoaga tele lea, o le to’atele lava o latou nei o lo’o nonofo pea i fanua nei ua tatau ona tu’ua.”

Na ulua’i fa’alauiloaina i le 2011 le fa’ai’uga lea a le malo, ina ia fa’ase’e uma ‘ese i latou o lo’o nonofo i Sogi. O le taimi fo’i lea na ofoina atu ai e le malo, fanua e ta’i-kuata-eka i Falelauniu mo aiga uma nei latou te lisiina i le taimi nei (ma avea ai ma o latou fanua-totino) i le tau e i luga atu teisi o le tolusefulu-afe tala fa’atasi ma le tolu-afe e tapena ai i Falelauniu. 

O le tele lava o aiga ua latou talia lea fuafuaga na ofoina e le malo.

Peita’i, e matua tete’e lava isi.

Na fa’ailoa mai e se tasi o latou nei (o Panifolo) i le Samoa Observer, latou te le’i maua lava se tusi mai le SLC, e ‘ave’esea ai latou. 

 “Pau le taimi na matou iloa ai le fa’afitauli lea i le va o matou ma le malo, o le tausaga e 2013,” o le talatala lea a Panifolo.

“Ua ‘ou matua le fiafia lava ona o lea la ua iloa nei, e au ina fa’amalosia matou e o-‘ese. Ua leai se fa’amoemoe. Ua leai se isi mea e toe o iai pe afai o le mana’o lea o le malo.” 

Na ta’ua fo’i e se isi mafine o latou nei, na te le’i iloa lava se fuafuaga fa’apea a le malo mai le amataga. 

 “E sa’o, na fai mai i le amata lava, e ‘uma loa le falesa fou i Falelauniu, o le taimi fo’i lea e uma ai matou ma le nofoaga lenei.

“Ae na matou iloa, e sese tele lea mea. Ua tele tupe na fa’aalu i le fausia o o matou fale nei ma aiga i le fia tausaga ua alu.” 

Na fa’aalia fo’i e fa’apea, o le tolu-afe tala lea na ‘aumai e tapena ai, e matua le-lava a.

“E matua fa’atiga-loto lava,” o lana fa’aaliga lea, “pe a fua i le tele o le tigaina na tapena ai ma atina’e o matou aiga i le fia tausaga ua mavae.

“E o’o mai i le aso, ua silia i le tolusefulu aiga o lo’o nonofo ai pea i Sogi. ‘Ou te iloa, e na o le to’aono lava aiga ua o-‘ese.” 

 “O se fa’anoanoa tele lea mo matou i’inei. O le a matou afaina uma ona o fa’ai’uga a le malo.

Ae ‘ese mamao ai le silasila a le malo i le tulaga lea.

O le fa’aaliga manino a le Ali’i Palemia, Tuila’epa Sa’ilele Malielegaoi, o le a sili atu ona manuia tagata o lo’o i Sogi, pe a se’e i se isi nofoaga. 

I nai tausaga ua mavae, na saunoa ai, o le a si’itia ai tulaga o le soifua mo latou o lo’o nonofo i Sogi, pe a se’e ‘ese atu i Falelauniu. 

“E le taitai lava fanua e toto ai ni fa’ato’aga e fa’alagolago iai aiga nei,” o le saunoaga lea a Tuila’epa i lena taimi. 

 “Pau lava le aoga o fanua nei e i totonu o le taulaga (pei o Sogi), o le faigofie o femalaga’iga.” 

E sili atu i le 10 ‘eka ua tu’uina atu mo aiga e 33 i Sogi e se’e iai, e ta’i-kuata-‘eka a le aiga e fa’atau, o le fa’aaliga lea a le Palemia i lena taimi.

E le’i maua se avanoa e ‘aumai ai se fa’aaliga mai le Ofisa Sili o le SLC, Afoa Arasi Tiotio i le aso ananafi. 

Ae sa ia fa’aalia i le nusipepa o le Savali i le lua tausaga talu ai, o lo’o taumafai lava e galulue so’o-so’o-tau’aua ma aiga uma ia.

 “Lea lava e taumafai atu i aga fa’aleAganu’u, e pei o le ava-fatafata lava o lo’o fai ai nei mea, ina ia mafai ona galulue fa’atasi ma aiga nei, ui e tete’e pea nisi o aiga.”

Na ta’ua fo’i e Afoa i lena taimi, o lo’o taumafai le malo i se tulaga e taufai malilie uma iai itu e lua, e maua ai se fa’ai’uga manuia mo lenei fa’amoemoe.

O nisi o lo’o te’ena pea lea fuafuaga a le malo, ona o le latou talitonu fa’aleLotu ma ua mae’a la ona fa’atino e le malo lea tulaga, fa’atasi ma le Ekalesia Fa’apotopotoga Kerisiano Samoa (EFKS).