Faatalalē? Faamaoni? Amiotonu?

Tusia Mata'afa Keni Lesa ma Faaliliu e Seagaitumua Tupuola ,

145 Hits

Uso e, e matua faigofie lava le mea moni. O nei upu uma mai nisi o tatou ta’ita’i e uiga i le faatalale o isi tagata, o le Atua, o le mea moni ma le amiotonu- o lona leo e foliga mai ua matua gaogao’i’ī lava. 

Ua matou fai atu faapena ona o se mafuaga faigofie lava e faapea- ua ia i tatou se malo na te ta’u atu i tagata uma ina ia faamaoni, talanoa e uiga i le amiotonu ma ta’ua le Atua i taimi uma- ae ua tatou iloa lelei lava- e itiiti lava se mea ua fai e fo’ia ai mataupu tau taupulepulega leaga ma faiga pi’opi’o i totonu o galuega a le malo ia ua matua afaina ai lava o tatou tagata matitiva. 

O nei faiga pi’opi’o o lo tau alaga mai ia i tatou ina ia fo’ia. I le taimi nei lava, Faamolemole. O le mea moni moni, o nei lava tagata-ua latou faaigoaina ua faatalalē, le faamaoni-e ese mai isi lava upu felanulanua’i. Ua lelei-atonu o i ai se itu e sa’o ai latou, ae o le itu taua. O le mafai ona latou faia!

Ia ‘aua nei o tatou taumafai ma aveese le mea o i le mata o le isi tagata ae o lena e taoto ai se ogalaau lea e tatau ona sua ese e se masini ‘bulldozer’ ina ia mafai ai ona manino le latou vaai.

O le mea moni, a tatou faatali se’i o tatou matamata i nisi o faaupuga talu ai nei lava sa fetogia’i solo e o tatou ta’ita’i, e faigata pe afai e le faailoaina atu e faapea atonu o loo i ai se metotia i totonu o lou faavalevalea.

Masalo lava o loo i ai se taumafaiga malosi e oso ese ma le ala ma liliu atu o latou mafaufau i se faiga e matua mamao ese lava mai le mea moni e faapea sa fai e tagata faigaluega o le malo ni taupulepulega leaga ina ia faaaoga sese tupe a le malo e o’o atu i se aofaiga e faitau miliona ma miliona. 

I totonu o lenei atunuu i aso nei, ua ia i tatou ni faafitauli moni lava. E matua leai lava ma se masalo i lea tulaga. O la tatou aitalafu i fafo ua lele e pei o le roketi i le vanimonimo ua oso atu i le taualuga se’ia o’o i le tulaga e tatau ai ona tatou matua popole lava. O faletupe tetele ma nisi o a tatou tagata maoa’e e maua mai ai tupe ua leva tausaga o latou tuuina mai ni lapata’iga.

O le a le isi umi tatou te faaauau ai pea ona fulitua i ia lapata’iga. O fuainumera o Oloa e Auina atu i Fafo e matua faaletonu lava, o le aofa’i o turisi o le vaaiga lea e faapopoleina ai ma o le vaega tau faatoaga na te le o mafai foi ona tuuina mai se faamoemoe e matua tele.

Ma o lea lava ua na o le faatiga i le mafaufau ona o le matua leai lava o se taumafaiga ua fai e taumafai ai ma toe faaola mai-ae taatia ia le taofia ai o ofisa o le malo ina ia mautali atu-mo le faaaoga sese o le paoa ma tulaga e pei ona tatou iloa lelei lava. O lea faaaoga sese ua alu ai le faitau miliona ma miliona a le atunuu.

I se tasi o mataupu-e sili atu i le ‘afa miliona tala na faaalu i se ofisa e leai se aoga lea ua le o toe faaaogaina i le taimi nei. O se tupe lenei sa tatau ona faaaoga e totogi ai vailaau a le falema’i, nisi foma’i faaopoopo, ni faia’oga lelei ma fesoasoani i nisi o aiga matitiva ia ua matua ola faalagolago i luga o ala tetele ina ia maua ai se talā poo se lua tala e ola ai. Afai tatou te talanoa i le faamaoni, e le o le taimi ‘ea lenei e fo’ia ai lenei faaiuga uiga faavalevalea o le  faaalu o lea tele o tupe? 

Faamata e le o le amiotonu lena? Ma afai tatou te faaauau pea ona fulitua i ai, o ai la e faatalalē? 

Tama’ita’i e ma alii, o lea matou te talanoa atu e uiga i le lē ma taofia o le faaaoga sese o loo faaalia i totonu o le lipoti a le Pule ma Su’etusi Sili-ia ua leva ona faamaonia e le Komiti a Alii Ofisa o le Palemene.

 “O molimau Faamaumauina” ua uma ona tuuina atu e faamaonia ai e faapea o le mea moni lava sa taupulepule tagata faigaluega o le malo e faaaoga sese tupe a le atunuu. O le a la le isi mea o loo latou manaomia? Atonu latou te moomia se fe’au mai le Lagi! Ia manatua lelei e faapea ua na o nisi ia o le tele o mataupu na lagā e le Komiti a Alii Ofisa o le Palemene (O.P.C.) ma le Pule ma Su’etusi Sili e tusa ai ma le faatinoina o galuega a nisi o vaega o le malo. 

 E mafai faapefea la e le Palemene ona fulitua i nei mea? Matou te toe fai atu foi, ua ia i tatou se malo o loo faaauau pea ona ia tuua’ia le lalolagi mo a tatou faafitauli se’ia o’o lava ina ‘ausia e le taaloga o le tautu’ua’i le tulaga mataga. Ae aisea ua le mafai ai ona faatali e Iloilo le tulaga faigata o nei mea o le fai o mea sese ma le faaaoga sese o a tatou tupe? 

Atonu o le taimi lenei o la tatou Palemene ma le malo e fai ai se taumafaiga malosi e fo’ia ai nei mea faatiga o loo pulato’a mai ia i tatou e aunoa ma se ‘emo o ona foliga. Tamaitai e ma alii, e le mafai ona tatou fulitua i nei mea. E matua faigata lava. 

Ia outou maua Samoa se faaiuga matagofie o le vaiaso, ma ia faamanuia atu le Atua! 

© Samoa Observer 2016

Developed by Samoa Observer in Apia