Tauvaga o sipelagā-‘upu a le Atunu’u Aoao

Tusia Deidre Fanene ma Maiava ,

172 Hits

O le asō, e amata ai le tauvaga o sipelagā-‘upu mo le atunu’u aoao, lea o le a matua lu’itauina ai mafaufau o fanau-a’oga ae maise fo’i, le maualuga ua o’o iai tulaga tau-a’oa’oga i vaega uma o le atunu’u.

O lea tauvaga o lo’o tapena ma tu’u-fa’atasia e le TV3 ma o le amata mai, i A’oga Tulaga-lua i le motu tele o Salafai.  

A’oga a Salelologa, Sapapali’i, Lano, Pu’apu’a, Asau, Papa i Sataua, o Falealupo, Falelima, Gataivai, Faia’ai, Fogatuli, o Taga, Patamea, Sale’aula ma Satupa’itea.

Na fa’aalia e le Pule o le TV3, o Verona Parker, o le fa’amoemoe ‘autu o lea taumafaiga, o le fa’atauaina atili lava o tulaga tauA’oa’oga mo fanau, i le sipelaina o ‘upu ma le faitau-tusi.

“Ua matou aga atu e fa’atino polokalame tau-a’oa’oga ma e fa’afetai tele ai lava i le vaega faiPisinisi mo le lagolagoina o lenei taumafaiga ua amata,” o lana fa’aaliga lea.

“O le faia o polokalame talafeagai ma aoga fa’apea, e fai lava si tele o lu’itau, aua a o’o loa ina ‘uti’uti le fa’asoa i tulaga tau-seleni, ona sola loa lea ma leai se naunau i vaega tau-televise e fa’atino ai ni polokalame e a’oa’oina ai a tatou fanau - lea ua matua faigofie lava ona ta’a’ina-‘ese o latou mafaufau i le tele o mau tekonolosi ua iai nei, ma ua manatu ai, ua tatau ma onomea ona fai o se polokalame fa’apea i luga o le TV mo latou.” 

Na ta’ua fo’i e Verona, o lo’o latou galulue fa’atasi lava ma le Matagaluega o A’oga, Ta’aloga ma Aganu’u, mo le filiina mai o ‘upu o lo’o i totonu o ta’iala mo a’oa’oga a fanau.

“Ua matou ‘ave le tauvaga lenei i tua, i nu’u i Savai’i ma Upolu. O le manatu ‘autu lava, o le taumafai lea e fa’aitiiti tupe e fa’aalu i feoa’iga, a’o le taimi lea e maua ai e fanau le avanoa lea, e tele lava ina saofaga iai, ma saga fiafia ai lava na o tamaiti-a’oga i Tumua nei, ae matamata-fua pea fanau i le motu-tele.

O le tauvaga, e lua vaiaso o le a fa’atino ai ma o le a vaevaeina ai a’oga i sone. Mo se fa’ata’ita’iga i Savai’i lava ia, e fa sone o le a iai, ma o le a fa’asalalauina i le TV i po o Aso Lulu ta’itasi.

“O se avanoa lelei mo fanau-a’oga, si’itia ai le agaga-naunau mo mea-lelei ma toto ai fo’i le agaga-finau, ‘aua le malu’ia-gofie i luma o tagata ae maise fo’i le fa’atupu-fiafia aua o le a va’aia o latou ata i luga o le TV,” o le fa’aaliga lea a Verona. 

“O se tauvaga e ao ona matua tapenapena lelei iai fanau-a’oga ma si’itia ai le naunau e su’esu’e ma fai mea-a’oga, e le gata i totonu o potu-a’oga, a’o totonu fo’i o aiga, ma fafo i le va’aia a le to’atele. 

“O le tala i fa’ailoga, o le a maua fa’amanuiaga tau-tupe mo fanau i le tauvaga lenei, e fa’afetaia ai le Faletupe o le Pasefika i Saute ma le anoanoa’i o kamupani lagolago mai.”

O lo’o galulue fo’i le TV3 i le taimi nei, mo le tu’u-fa’atasia o se tauvaga fa’apea mo A’oga Maualuluga uma i le atunu’u.

© Samoa Observer 2016

Developed by Samoa Observer in Apia