Ua a’apa atu a’ao agalelei o le Iunivesete Aoao o Samoa, e ofo atu lana lagolago mo le mamalu lautele o le atunu’u o Fiti, sa a’afia i le ma’ema’e o le afa o Uinisitone.

I nai vaiaso ua mavae atu, sa alo ai ta’ita’i ma le ‘aufaigaluega, o le ‘au-a’o’oga fa’apea le mamalu o Samoa alolofa e sa’ili-tupe ma fa’amaopopo lavalava mo nai aiga sa a’afia i le afa.

O le Aso Lulu, na fa’ailoa mai ai e le Iunivesete, le aofa’iga e fa-afe, toluselau-luasefulu ma le fa tala ma sene e tolusefulu ($4,324.30) le tupe ma le tele o pusa-lavalava sa maua. 

Ma fa’afetaia e le Tapa’au o le Iunivesete, Porofesa Fui Asofou So’o le Komiti Sa’ili-tupe fa’apea tamaiti-a’o’oga uma sa tu’u-fa’atasia ma agalelei atu i lea fa’amoemoe lelei.

Na fa’aopopo mai fo’i, ua tonu I le Komiti, o le a ‘auala atu meaalofa nei mo Fiti, i sui o le latou aufaigaluega e to’aono, o lo’o iai o latou aiga i Fiti. O le to’atele o latou nei, sa matua afaina lava o latou aiga o lo’o i nofoaga sa iloga ona fa’aleagaina. 

O latou nei e aofia ai Seumanu Gauna Wong, Ateca Silatolu, Susau Solomona, Porofesa Silafau Sina Va’ai, Chris Gounder ma Lineta Tamanikaiyaroi.

O le faletua o Lineta, na saunoa fa’afetai e tali atu i le Tapa’au ma le Iunivesete ona o le agalelei ma le ma’au ua foa’ina. Na ia ta’ua, o le a latou fa’ao’o lava nei meaalofa mo tagata i Fiti fa’atasi ma mo’omo’oga alofa ae maise o fa’amanuiaga mo le toe vave fa’aleleia o mea uma o lo’o fa’amoemoe iai le soifua i aso ta’itasi.

E fa’apea fo’i le alaga fa’afetai na fa’ailoa e Ateca Silatolu, o se tama-o le-‘ele’ele mai Rakiraki, lea na ta’ua, o nei fesoasoani uma, o le a talia ma le agaga fa’afetai e o latou aiga uma i Fiti.