To’oto’o fou mo se suiga fou

Tusia Admin Peršon ,

385 Hits

FINAU MALOSI MO LE TAUTUA – ‘Ili Ta’ateo Tafili, le faipule fou mo le Itumalo o Aana Alofi No.2

FINAU MALOSI MO LE TAUTUA – ‘Ili Ta’ateo Tafili, le faipule fou mo le Itumalo o Aana Alofi No.2

Ripotia e Sarafina Sanerivi

Fa’aliliu e Maiava

 

Moni na matua solipala e le HRPP le Tautua i le Aso Faraile talu ai, ae foliga mai e le o fa’avaivai ai le agaga-finau o se tasi o a latou sui-faipule fou.

Ua saunoa manino ‘Ili Ta’ateo Tafili, le faipule fou mo A’ana Alofi Numera 2, o le a fa’atino le pitola’au lea, e toe-fa’atu se vaega e agaia le malo e fa’amalosia atili ai faiga fa’aTemokalasi i le Palemene o Samoa. 

“A silasila i palota, e manatu nisi ua tulolo-sauo’o ma leai nisi o le itu-agai peita’i, o lea e iai,” o le saunoaga lea a ‘Ili i le Samoa Observer ananafi.  

“E taua tele le sao o le itu-agai i le faia o fa’ai’uga tonu ma sa’o mo se atunu’u. O matou e mautinoa e maua ai le paleni ma le sa’o o mea uma. Matou te tilotilo i itu-lelei ma itu le-lelei o so’o se fa’ai’uga e fai i le Palemene ma finau atu pe o talafegai ma fetaui mo lenei taimi pe leai.” 

E talitonu ‘Ili – lea ua pusi-nofo ai le Minisita o Tina ma Tama’ita’i, Atina’e o Nu’u ma Agafeso’oa’i, o Tolofuaivalelei Falemoe Leiataua – o le amataga lenei o se suiga fou mo le Itu-Agai. 

 

O le a fa’atasi atu i se tasi o faipule ua loa i le maota, o ‘A’e’au Peniamina Leavaise’eta ma ‘Olo Fiti Va’ai, e avea ma sui o le Vaega a le Tautua. 

“E ‘ese’ese lava manatu ma lagona o tagata ma afai ua filifilia e le to’atele e ‘au i le HRPP, o lo latou lea finagalo sa’oloto,” o le fa’aaliga lea a ‘Ili.

 “Ae mo matou, o lo’o va’ava’ai nei i le faia o se itu-agai malosi. ‘Ou te iloa e ioeina e le Ali’i Palemia le tulaga lena aua i so’o se malo fa’aTemokalasi lava, e tatau lava ona iai se itu e agaia le malo.

“Ia te a’u la, ‘ou te manatu lava e sologa lelei se mal o pe a iai o se itu-agai nai lo le alu ai fa’apea, o se malo e pulea e se vaega e tasi.” 

Ina ua toe tepa i ana lava taumafaiga sa fa’atino i le taimi o faiga-palota, na ta’ua e ‘Ili, e lagona lava le fa’agae’etia. 

“O se fa’aeaea ua faia e lo’u itumalo mo a’u ma ‘ou te matua fa’afetai tele ai,” o lana molimau lea. E 814 palota na malo ai ‘Ili ia Tolofua e na o le 556 ana palota na maua.   

 “E le o se filifiliga faigofie mo le ‘au-palota, i le va o a’u nei ma Tolofua,” o lana saunoaga lea.

“E le’i faigofie fo’i ia te a’u aua e le o se fa’amoemoe na fa’atoa tapena anapo. O se tapenaga ‘umi  ma ua fiafia ai lava ina i’u manuia.” 

Na fesiligia ‘Ili pe aisea ua mana’o ai e avea ma sui o le Vaega a le Tautua, ae saunoa, e le o se fa’ai’uga na faia na o ia.

 “O le faipule talu ai nei o le matou itumalo, o se sui o le Vaega e Puipuia Aia Tatau a Tagata. Ae na finagalo lo matou nu’u, e le o se tulaga lelei le toe iai fo’i o se isi sui-fa’atu e tamo’e o se sui o le HRPP,” o lana fa’aaliga lea.   

 “O lo’u ‘auai la i le Vaega a le Tautua, o se ‘auala talafeagai lava sa fai ai. Ae le fa’apea fo’i ua le-fiafia lo matou nu’u i le malo po’o le a lava, leai, e leai se tulaga fa’apena. 

“Ia te a’u la, sa ‘ou va’ava’ai i se ‘auala e mafai ai ona fai sa’u galuega mo lo’u itumalo. Ua manatu loa e aga’i i le Tauua e fa’aleo ai se manatu mo lo’u itumalo. Lea ua ‘aumai le fa’ai’uga ma o le mea lea e manana’o iai.” 

E leai se mea o popona i le finagalo o le sui-faipule fou.

“Ina ua fa’ailoa lo’u mana’o e tauva, na silafia uma lava e tagata, o le a ‘ou tauva i lalo o le fu’a a le Tautua. O lo’o ‘ou tumau lava i la’u fa’ai’uga ae maise le finagalo o lo matou nu’u, e avea o se sui o le Tautua, e ui ina ua leai ni sui.”

E talitonu ‘Ili, na mafua ona le-palota tagata mo sui o le Tautua, ona “e le o malamalama i le mata’utia o a’afiaga, pe a leai se itu-agai i so’o se malo.” 

 “E ogaoga lava ma mata’utia pe afai na o le tasi se vaega fa’a’Upufai i le Palemene,” o lana fa’aaliga lea. “E tatau lava ona iai se itu-agai e fesiligia a latou fa’ai’uga, ma fautuaina fo’i e silasila toto’a iai aua, o fa’ai’uga e a’afia ai le atunu’u atoa.” 

Mo le Faipule fou o A’ana Alofi Numera 2, o lana fa’amuamua lava, o le ‘ave lea o le fesoasoani i lona itumalo i so’o se ‘auala na te gafatia.

“E iai se vaega o lo’u itumalo e igoa o Vaialua ma o i latou o lo’o nonofo ai, e a’afia gofie lava i le si’isi’i o le tai ma le suasami. O la’u fa’amuamua lena mo lenei taimi. ‘Ou te mana’o ia fausia se taligalu mo le nu’u.”  

E mana’o fo’i e fa’alelei maota ma laoa ma ‘auala.

“Talu ai o le to’atele o lo’u itumalo e fa’alagolago tele i fa’ato’aga mo le tausiga o le soifua, ‘ou te mana’o ai lava e fesoasoani iai e ala i le fa’alelei o ‘auala ina ia fa’amalosia tagata e galulue i a latou fa’ato’aga.” 

O ‘Ili, o se tama-fanau a le afio’aga o Nofoali’i, ua 55 tausaga o lona soifua, ua fa’aipoipo ia Siliilagi Ta’ateo, e to’alima o la alo – to’atolu teine ma le ‘au-po’a e to’alua. 

O ia o se tama-tuai o le Kolisi o Sagato Iosefo ma le A’oga o Matata ‘Ese’ese sa i Vaivase-tai.

Na tu’ua le atunu’u mo Niu Sila i le tausaga e 1984, ma toe taliu mai i le 1991 ma amata faia’oga a ii le A’oga mo Matata ‘Ese’ese se’ia o’o i le 1993.

Mai le 1993 – 2006, sa galue ai le Pulega o Malae Va’alele ma fa’aauau pea ona avea ma faia’oga fa’aVaitaimi i le A’oga o Matata ‘Ese’ese.

O le 1998 – 2006, na galue ai o se inisinia i le Kamupani o le Vailima i Vaitele. 

© Samoa Observer 2016

Developed by Samoa Observer in Apia