O le Tala Faasolopito o Samoa mai le Amataga

09 March 2016, 12:00AM

Tapena ma Tuufaatasi e Fuimaono Na’oia Fasavalu Touli F. Tupua mo le Samoa Observer. 

UA MAUA LE TO’AFILEMU

• I aso nei o lea ua ta’oto i lagotonu le malo ma ua maua le filemu i Samoa uma. O meatotino a Amerika o loo taatia lava e le’i atiina a’e, ae o loo matua sologa lelei taumafaiga a Siamani. I totonu lava ia o Samoa, ua atagia ai le mafai e Siamani ona pulea se isi atunuu, ae peitai o loo latou faaaogaina lava faiga a Peretania.

I le tofia o Kovana Solofa, o se faaiuga poto na fai e Siamani i lea itu, talu ai na amata lava lana galuega i se taumafaiga e aveese malie le tulaga feitaga’i ma le fetaua’i. Sa lelei ona ia faia tagata Samoa, e fai le amiotonu i tagata Samoa ma tagata mai fafo. A malaga Kovana Solofa i Fiti e su’esu’e i faiga faa-kolone a Peretania, o le faateleina foi lea o lona lelei. E mae’u le lelei o ana galuega.,

• O Mataafa lea o loo fai ma vaaiga a le atunuu, ua fiafia lava ona o lea lava ua i’u ina maua le Malo o Samoa, ma sa na faailoa atu lona fiafia i ona tagata. Talofa e i si Alii- o lea ua le toe i ai ni ona fili i ia aso ma o le vaaia a ona tagata ia te ia, o se tagata uiga ese lea o lona atunuu. Ua sili atu i le 70 tausaga le matua o lona soifua, ae o loo lelei pea lana silasila ma o soo se gaoioiga na te faia , o le gaoioi a le Tupu.

O lona maota o loo i Mulinuu, ma i se mamao e fa maila mai le taulaga o loo i ai le isi ona maota, o lona fausaga atoa e faa-Europa; ma o le va o ia maota e vaevae i ai lona taimi.  O tagata Samoa e soifua ma ola faatasi i totonu o nuu i lalo o le pule a o latou alii. Sa faamamalu e Siamani lea faiga a Samoa, e ala i lona pulea o tagata ae ui atu i tamalii ma failauga, ae sa faifai malie lava ona latou aoaoina tagata Samoa ina ia mafai ona latou tutū lava latou. Ua tuuina atu i tagata Samoa se ituaiga o malo e pule ai lava latou, ma ua iloa e Siamani o le ala tonu lea e taofia ai le fetaua’i o tagata. Ua tofu le nuu ma lo latou faamasino faatasi ai ma faamasino Samoa ma o latou tusiupu.

E faaopoopo atu i lea tulaga, ua i ai se fono e faalua i le tausaga ona fono. O le Palemene o tagata Samoa sa faaigoa o le Malo, na te faatinoina se matafaioi taua i upufai o Samoa i lalo o le Pulega a Malo e To’atolu, ae na toe soloia ina ua uma ona faatino laasaga tau le pulea o Samoa, sa toe faaui ese. Ona o le toatele o tamalii lauiloa sa auai i lea Palemene, sa le mafai ai ona faata’apeina i se taimi vave, ae ina ua aulia le 1905, sa mafai e le Kovana ona faataape. I lea lava taimi, na ia tofia ai ni sui usufono fou i lea Fono. 

O lenei laasaga na matua iloa ai le atiina a’e o le pulega o Samoa. O tagata Samoa o Upolu ua i lalo o le pule tuusa’o a le malo i Apia; i Savaii, sa i ai se anitimani poo se (faamasino maulalo papalagi. (E toe faaauau atu i le Aso Gafua a sau). 




09 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>