Amata ona aliali mea-mataga a’o aga atu i le Palota

09 February 2016, 12:00AM

Tusia - Lanuola Tusani Tupufia

Fa’aliliu e Maiava

 

Lea ua amata ona aliali mai mea-mataga i finauga mo le nofoa o le Itumalo Tu-taulaga i Sisifo.

Ua ofoina nei e le sui-tauva o Faumuina Asi Wayne Fong, se taui e afe tala ($1,000.00) mo se fa’amatalaga e uiga i le fa’aleagaina o lana fa’ailoilo-fa’atosina o lo’o fa’atu i Sinamoga.

Ae le na o le pau lea.

E fa’aopoopo iai le isi fo’i afe tala pe a maua ma molia le tagata na fa’aleagaina ia fa’ailoilo taugata.

Na fa’ailoa mai e Faumuina i le Samoa Observer, o le isi fa’ailoilo (o laupapa e lua) na fa’aleagaina i Sinamoga, o le meatotino a ia. 

Na saunoa le sui-tauva, e fa-afe tala ($4,000.00) le tupe na fa’aalu e fa’atu ai i luga le laupapa e tasi. O le isi laupapa o lo’o i luma o lona maota i Vaigaga. 

“E iai le mafuaga na fa’atu ai i Sinamoga le laupapa lena, ona e to’atele tagata-palota ua resitala, e alala ma papaa’ao i nofoaga ia o Moamoa ma Sinamoga, mo le Nofoa o le Itumalo Tu-taulaga i Sisifo,” o lana fa’aaliga lea. 

“A o le fa’anoanoaga tele, o lea fa’atoa lima aso talu ona mae’a ona fa’atu i luga. E na o se ata lava na ‘ou sa’ilia se fa’atagana mai le pulenu’u, le Faipule lea mai Faleata i Sasa’e ma le aiga e ana le fanua na fa’atu ai.

“E leai so’u fa’amoemoe e tu’u i lalo; a o le a tu’u ai pea fa’apena.” 

O lo’o masalosalo le sui-tauva, o tupulaga o le nu’u na latou fa’aleaga le laupapa.

I le va’ava’ai atu i le laupapa, na ta’ua e Faumuina, o se gaioiga na faia lava ma le fa’amoemoe e fa’aleaga. O lo’o masalomia, na sesele e le tagata le laupapa i se naifi ma sasae-‘ese.

“E matua leai a se uiga, ma e leai fo’i se afaina o tagata-palota aua o lo’o malosi lava lagolago o lo’o tu’uina mai,” o lana fa’aopopo mai lea.

Ui i lea gaioiga fa’atiga, ae o lo’o to’a lava le tai i le finagalo o le sui-tauva ma ua sopoloa ai le silasila i tulaga lelei o le mea ua tupu.

“Ua lelei tele fo’i aua ua tele ina fesiligia ai a’u e tusitala ma vaega fa’asalalau, ona o lea mea,” o lana fa’aaliga lea. 

Ae na soisoi le ali’i ma tala-‘ata fa’apea, o le mea sili o le le-fa’aleagaina o le ata o si ona faletua, o Tuiloma Ramona Pota Fong.

Saunoa Faumuina, o le po o le Aso To’ona’i talu ai na fa’aleagaina ai le fa’ailoilo.

Na te manatua, sa aga’i i le maketi o i’a i le taeao o le Aso Sa ae ia va’aia le laupapa ua fa’aleaga.

E moni o le fa’aleagaina o le laupapa fa’ailoilo e le a’afia ai ana fuafuaga mo le palota, ae na ta’ua e Faumuina, e le tatau lava ona tu’ua ai fa’apea lea agasala ua fai.

Ua mae’a ona momoli i le Ofisa o Leoleo lana tagi.

Ae mo le taui, na ta’ua, o se fa’atosina e fesoasoani ai Leoleo i le latou sa’iliga o fai.

09 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>