Manatu o le Fa’atonu - Ki o le Faatiga mo Rio

180 Hits

Tusia - Mata’afa Keni Lesa

Faaliliu e Seagaitumua Tupuola

 

O se itu e tatau ona faailoa atu. O le matamata i le Manu Samoa Ta’ito’afitu talu ai nei o se matua avega mamafa-tu lava. O se galuega e matua faigata lava. E ui lava i le ttele o lo tatou mana’o ia tulaga lelei ma le faamoemoe atonu o le a mafai lava ona latou te faasa’oina, ae peitai e leai se mea faapena na tula’i mai. E na o le tasi le latou laasaga i luma ma le anoano o laassaga i tua-ma o lea itu sa avea ma mea faatiga. 

O le mea moni e faapea afai e le o popole le vaega o faia’oga i le taimi nei a’o latou tilotilo atu i Monaco mo lea avanoa mulimulu e sima ai se nofoaga i totonu o Taaloga o le Olimepeka, ua tatau loa lava ona latou faatinoina i le taimi nei. 

E ui lava ina matua maulalo le tulaga o le tauvaga i Monaco i lo le mea ua uma ona tatou vaaia mo nai vaiaso ua mavae i le Taamilosaga o le Taitoafitu a le Lakapi a le Lalolagi, ae te le fia tuuina atu ni au tupe i lenei ‘au mo le faatinoina o lea galuega. O nisi o tama taalo e tilotilo i fafo mai le latou ‘au ma i taimi e sili ona leaga, e aliali mai lo latou matua faaletonu lava. O se tulaga lea e faanoanoa ai. 

E tusa ai ma ona tulaga uma, tatou te le o faamoemoe o le a latou faia ni vavega. Matou te ioe e tatau ona tuuina atu se taimi i le vaega o faia’oga fou e faamaopoopo ai ma o le vaega toatele o le ‘au o tama taaalo fou ia o loo taumafai e saili ni o latou tulaga lelei. Matou te ioe atoatoa i lena tulaga. 

Ae peitai-o le faifai pea o faatinoga le lelei o le taaloga o le isi lea tala. Ma a le mafai ona tatou manumalo i se mea e o’o lava i le Tanoa, ona avea loa ma mea faatiga i nofoaga sese uma. I lenei la taimi, e pau lava o le mea e mafai e se tasi ona mafaufau i ai o lea avanoa uiga ese mulimuli e faigata ona maua mo Rio-lea o le a taufao i le ogatotonu o lenei tausaga. 

E toatele tagata o loo manatu e faapea o le a maua e Samoa lea tulaga. Ua ia i latou se mafuaga tatau mo lo latou mautinoa o lea tulaga.

Ae peitai- a tatou tilotilo i le faatinoga o le taalo a le ‘au talu ai nei,  o loo i ai se mafuaga e tatau ai ona tatou faanoanoa. Ma e matua tatau i le aufaigaluega faia’oga ona mautinoa ua oomi le ki o mea tiga pe a latou toe taliu mai Sini. Ua leai se filifiliga ae mo le Iuni Lakapi a Samoa ina ia fai mea uma e tusa ai ma lona malosi e aumai ai nisi o a tatou taaalo e sili ona poto faapitoa e una’ia o tatou avanoa i Monaco.

O le taimi mulimuli na tatou maua ai le avanoa e ta’u-agavaa ai mo le Olimepeka i Aukilani, e leai se tulaga na maua e Tonga ae na ia aveeseina tatou mai le tauvaga. Ona o lena la faatinoga o le taaloga, ‘aua la ne’i o tatou faapea ua malolo lelei lava Tonga i le tulaga o loo i ai. I Monaco, o le a latou aumaia se ‘au e sili atu ona malosi ma o le a latou matua mautinoa le toe faia o le mea lava e tasi ia Samoa

Ia manatua lelei o Tonga ua na o se tasi lea o le tele o ‘au e tatau ona tatou popole i ai. O loo i ai isi malo tetele e taalo lakapi ia foi o le a faaaogaina nei taamilosaga e avea ma toomaga mulimuli e saili ai se pepa i Rio. O le a latou aumaia a latou ‘au e sili ona lelei ma latou te le toe taofia soo se tupe alu mo lea taualumaga. 

Ua leva ona tatou talanoa i le Olimepeka mo se taimi umi e o’o mai i le taimi nei ae o le itu e sili ona le manuia mo Samoa e faapea o lea avanoa e aliali mai e peiseai o loo se’ese’e malie ese atu i soo se tauvaga tatou te taaalo ai. Tatou te le’i vaaia lva soo se mea mai le vaega fou o tama taalo e faa-talitonu ai tatou e faapea ua ia i latou mea uma e manaomia mo le faamoemoe. Ma i le taimi nei ua tatau ona avea lea itu ma mea e matua popole ai. 

Pau lava o le mea tou te faia o le maimoa i le Taamilosaga o le Lakapi a le Lalolagi ona iloa ai lea o le lelei o isi ‘au ma iloa ai le mamao i tua o le mea ua tatou pa’ū i ai. I aso ia ua leva, o taaloga e faasaga i le Iunaite Setete, Ausetalia ma Kenya –ua na o se savalivali i totonu o le Paka mo Samoa. Ae se’i faauta i le vaega ona sui o mea.

Ma- ae faapefea le Taitoafitu malosi a Niu Sila? 

O le upu moni o i latou o se vaega e uiga ese i le matamata. Ma pe tusa o le ‘afa o le ‘au o tama taalo e i ai sootaga ma Samoa, e le o se mea faigata la ona e fiafia ia i latou. Alii e pei o Akira ma Rieko Ioane o le upu moni ua avea ma igoa tausi i totonu o aiga i le taimi nei, ae le o ta’ua ai Ben Lam, Ardie Savea aemaise ai foi o Sonny Bill Williams. A tatou matamata ia Niu Sila o taaalo, e gatete le tuasivi. O i latou o se masini, e matua lelei lava i soo se mea latou te faia. O le vaega e sili ona lelei e uiga i lea ‘au o lo lato  loto mautinoa, tutumau ma latou te faatuatuaina a latou faiga. Ua latou iloa ona fai se ‘au siamupiki, o se ‘au lea-vagana ai ua vave ona faata’ita’i i ai isi ‘au-e ono savali ese mai le auro i Rio. 

O isi ‘au e le o mamao tele i tua. A tilotilo i le latalata tele o Ausetalia i le po o le Aso Sa i le faatuina o se matati’a? Ma ia ‘aua nei galo ia i tatou Aferika i Saute, Fiti, Amerika, Egelani ma le tele o isi ‘au ia o loo taotao tua mai lava i le si’usi’u o Niu Sila. Ma ia ‘aua ne’i galo ia i tatou. O gafea la o iina o faataatia ai Samoa? 

E leai se masalo e anoano galuega a Damien McGrath ma lana vaega e tatau ona fai. Ae mo le taimi nei-atonu latou te manaomia nisi mea e tele atu nai lo le na koleni, taalo ma le tatalo. 

Llatou te mantua mana’omia le Iuni Lakapi a Samoa-ma atonu e faapena ma le malo pe afai e mafai ona ia togi i totonu sina tupe lelei e faatosina mai ai nisi o fetu o le 15 e toe foi mai mo le toe tulei mulimuli lava ina ia maua ai lea avanoa i Rio. O le a sou taofi?   

© Samoa Observer 2016

Developed by Samoa Observer in Apia