Ua mana’omia se suiga, Tiumalu

165 Hits

TIUMALU MANŌ PALU II

TIUMALU MANŌ PALU II

Tusia - Pai Mulitalo Ale 

Faaliliu e Seagaitumua Tupuola

 

Ua tauva Tiumalu Manō Palu II mo le Itumalo o Siumu e avea ma sui o le Tautua Samoa Party. E tusa ai ma Tiumalu fai mai a ia e tasi pea lava le mafuaga na malie ai e tauva mo le Faiga-Palota Lautele i le masina fou; ia sui le malo. “Ua leva ona ‘ou mana’o e sui le Malo,” o le faaaliga lea a Tiumalu. 

E talitonu Tiumalu ona pau le ala e sui ai le faigamalo o le lagolago lea o le Tautua Party. O le Sui faatu fou mo le Tautua o loo tauva ma le Faipule o le Palemene o loo i ai nei o Tu’u’u Anasii o ia lea o se sui o le Pati e Puipuia Aia Tatau a Tagata. 

O “Tu’u’u o la’u uso ae le mafai ona ia faaleoina le mea o i totonu o lo’u mafaufau ma le mea ou te iloa,” o la faaaliga lea a Tiumalu. Fai mai a ia e anoano mea e le o malie ai aemaise ai lava faaiuga na fai e le Palemia ma le Malo. 

“Ua o’o i le taimi e fai ai se suiga,” o lana faaiuga lea. Na faamalamalama e Tiumalu ni mafuaga se lua e sili ona taua-ia na te lagona e le sa’o mo tagata o Samoa.

Na talanoa o ia e uiga i le tulafono tau faaofi a le Pulega o Fela’uaiga i le Laueleele i le taimi nei-lea faatoa uma ona pasi i totonu o le palemene.

E aofia ai le tuuina atu o le paoa i le Alii Ofisa o le LTA e ave ail au taavale  pe a e le tausisia a latou tulafono, ma e te totogi se sala tue i le ofisa ona faatoa latou tatalaina mai lea o lau taavale i tua ma afai e te le o’o atu i totonu o le 30 aso ua ia i latou le pule e faatau atu ai.  “Ou te le lagolagoina lenei Tulafono Tau Faaofi,” o le faaaliga lea a Tiumalu.

Fai mai Tiumalu ua faigata tele lea faiga mo tagata talu ai –latou te totogi le anoano o tupe mo nei taavale ae o lea ua tuuina atu le paoa i le LTA e faatau atu ai ae avatu ia te oe sina vaega itiiti o lea tupe. Fai mai foi Tiumalu o le faaopoopoina o le tele o totogi e fesitala ai se suafa matai ua matua mamafa-tu  mo tatou tagata. 

“Ua latou faateleina i le 100% ma o se mea lea e le lelei,” o le faaaliga lea a Tiumalu.  “Aisea na latou le faaopoopoina ai lea aofaiga i le 10% poo le 20% ae ua fai sina maoa’, mai le $40 i le $100 e resutaka au se suafa Matai fou ua fai lava sina mamafa-tu.” 

Na ia ta’ua foi le anoano e leai ni galuega aemaise ai lava i tupulaga talavou. O le tasi lenei o mataupu e manatu o ia e tatau ona faatauaina  e le faiga-malo fou. Sa tatau ona latou una’ia tamaiti i a’oga ina ia maua le aoaina lelei ma mautinoa ai e faapea o le a mafai ona maua ni a latou galuga e lagolago ai o latou aiga. 

O loo i ai foi eleele e tatau ona faato’a ma o se tasi lea o puna o tupe maua e lagolago ai aiga. O manaoga tau galuega mo le autalavou e tatau ona una’ia e faato’a ai o latou fanau e le o faato’aina e avea ma se tasi o ala vave e maua ai se tupe mo latou aiga.

O lea alii ua 57 tausaga lona soifua o Tiumalu fai mai e toatele tagata taito’atasi mai lona nuu o loo i ai le lagona ua tatau ona sui le Malo. Fai mai a ia e to’afa i latou o loo tauva mo le nofoa o Siumu i totonu o le Palemene ae ua na o ia lava o loo tamo’e  e avea ma sui tauva o le Tautua.

© Samoa Observer 2016

Developed by Samoa Observer in Apia