TALA FAASOLOPITO O SAMOA MAI LE AMATAGA

654 Hits

Tapena ma Tuufaatasi e Fuimaono Na’oia Fasavalu Touli F. Tupua mo le Samoa Observer. 

 

O TUSITALA POO ROBERT LOUIS STEVENSON

E lē atoatoa se tala o Samoa e aunoa ma le ta’ua o Tusitala, ae ui o lea o le tusitala lenei mai Sekotilani sa nofo i Samoa nei i tausaga faai’u o lona soifua.

O Vailima lea sa ta’ua o lona nofoaga i Samoa nei, e na o le tolu maila mai le fatu o le Taulaga o Apia, i le motu o Upolu, ma o loo i ai pea e o’o mai i le asō, e ui ina tele suiga ua fai i ai, talu mai le taimi o Tusitala.

Ina ua maliu Tusitala, na faatau e Herr Gustav Kunst, o se tagata Siamani maumea lona fale, ma o lea na toe liua ai lea fale e avea ma Fale Telē, ma e leai se tagata e tafao mai i Apia e aunoa ma le malaga i Vailima talu ai le taua o lona sootaga ma atunuu mamao i aso ua alu, ona faatoa sauna ai lea e a’ea le Mauga o Vaea o loo ta’oto ai Tusitala e latalata i le tumutumu. 

I ana tusitusiga e uiga i ana malaga i atumotu ma ata tusitusia o ia malaga o loo mau i le Tusi ua faaigoaina “In the South Seas”poo “I le Vasa i le Saute”, ma o loo faamaumau ai nisi uiga ese o le soifua o tagata e pei ona tusia ai. I ana tusitusiga, fai mai Tusitala “Mo le sefulu tausaga sa ‘ou faalogoina le alu atu o lo’u malosi, ma o lea na ‘ou malaga ese ai mai lo’u atunuu moni. O lo’u talitonuga ua ‘ou taunuu i le vaega mulimuli o lo’u olaga ma ua na o le teine tausima’i ma lē vaaia a’u ou te faamoemoe i ai.

Sa fautuaina a’u e lelei ona ‘ou saili fofō i le Vasa i Saute, ona ‘ou mana’o lea ou te asiasi i ai e pei o se agaga, ma ia avatu a’u e pei o se pepe i vaaiga eseese na faatosina i ai lo’u a’o o’u itiiti lava. Sa fai loa a’u fuafuaga i le va’a folau o Dr. Merrit e igoa o le Casco e fitusefulu-lua tone lona mamafa, ma folau ese ai loa mai San Francisco i le faaiuga o Iuni 1888 ma asiasi atu i atumotu i sasa’e ma tu’u ai loa a’u i Honolulu i le amataga o le isi tausaga. Peitai, ua leai lava se malosi o totoe ia te a’u ou te toe fo’i ai i lo’u olaga tuai o le nofo i le fale a’o ma’i.

Sa ‘ou toe malaga ese i se vaa folau la’u oloa o le Ekueta, o lona mamafa e sili atu teisi i le fitusefulu tone, ma nofo ai i le fa masina i atumotu maulalo o le Atu Kilipati, ma folau atu ai i Samoa i le faaiuga o le 1889. I lea taimi, ua amata ona tosina lo’u loto i le agalelei ma le amio tausaafia o tagata o le atumotu.

Ua maua lo’u malosi uiga ese; ua maua a’u uo ma ua tele mea fou ua ‘ou aoaoina; o le taimi o a’u folauga ua mou atu e pei o aso o nuu o agaga; ma ua tonu ia te a’u o le a ‘ou nofo i Samoa. O itulau o nei tusitusiga na ‘ou tapenina mai le vasa a’o faagasolo la’u malaga lona tolu, i luga o le vaa la’uoloa o le Janet Nicoil.

Afai e toe aumai ia te a’u nisi aso se tele, o le a tuu nei tusitusiga i le nuu na ‘ou maua ai le fiafia o lo’u loto, ma o le mea uiga ese, ua uma ona faamamā e a’u tama uli le vaega-eleele o le a fai ma o’u tulagā-fale;ma o le a ‘ou a’oa’oina le faiga e fesoota’i ai ma tagata faitau, mai vaega e aupito i mamao ese o le vasa. Ina ia mafai ona ‘ou toe fetuuna’i le faaiuga a le toa  a Lord Tennyson ina ia lē sese tele e pei ona foliga mai. E to’aitiiti tagata na taunuu mai i lenei atumotu ma toe o ese ai, ua sinā o latou ulu ae talavou; o le paolo o launiu ma le agi o le la’i e tapili ai latou se’i feoti, ma faafiafiaina ai e o’o lava i le fiafia mulimuli o le asiasi mai i le aiga. 

O nisi o tusi a Tusitala na tusi i Vailima, o nisi ua tuufaatasi ma isi tusi, ma o se tuufaatasiga lea e lagona ai le faanoanoa, ona o lona faletua ma Lloyd  Osborne, lona atalii fai, sa tusi iinei. Ina ua maliu Tusitala, e lua tusi na tuua e le’i uma ona tusi, o le “Weir of Hermiston” ma le “St Ives”.

O le tusi mulimuli o loo i ai se tala malie na tusi ina ua toe atoatoa lona malosi, na toeitiiti lava uma ona tusi ma o Mataupu mulimuli na tusia mo ia e le Quiler-Couch. Ae o le “Weir of Hermiston” na avatu ai se folafolaga o ni mea e sili ona lelei ma o le toatele o tagata faitio fai mai o totonu o lea tusi, ana faapea o ola pea Tusitala, semanu ua tatou maua se tusitusiga uiga ese.

© Samoa Observer 2016

Developed by Samoa Observer in Apia