20 Tausaga fa’atoa ea le pologa o Uafato

09 January 2016, 12:00AM

Fa’aliliu e Maiava

 

Ua silia i le 20 tausaga e le maua lava e le afio’aga o Uafato i Fagaloa ni feso’ota’iga e fa’aaogaina ai telefoni-fe’avea’i.

A fia fai o se telefoni, e savavali i se nofoaga mamao e sa’ili se tulaga lelei ma maualuga e mafai ona maua ai ni feso’ota’iga.

O le aso ananafi, na ea ai le pologa o lea afio’aga, ina ua tatala alo’aia le nofoaga fou e fa’apitoa mo lea ‘au’aunaga i Uafato, aua le tautuaina o lea vaega o le atunu’u.

Sa ‘auai i lea fa’amoemoe le Minisita mo Feso’ota’iga ma Fa’amatalaga Tau Tekonolosi, o Tuisugaletaua Sofara Aveau, le Faipule o le Itumalo o Va’a o Fonoti, Ti’alavea Seigafolava Hunt, le Ofisa Sili o le Magagaluega o Feso’ota’iga, Tuaimalo Asamu Ah Sam, le Ofisa Sili o le Bluesky, Sanjeewa Perera, le pulega ma le ‘aufaigaluega a le Bluesky fa’apea Ali’i ma Faipule, o tina ma tama matutua ma le afio’aga atoa o Uafato, sa fa’atasi e molimauina ma fa’amanatu fiafia lea tulaga mata’ina i tala-fa’asolopito o feso’ota’iga i Samoa nei. 

 “O lenei nofoaga e le taugofie lona fa’atinoga e le Bluesky, a ‘ou te talitonu, e sili atu fa’amanuiaga o le a maua mai ai i le lumana’i,” o le fa’aaliga lea a Tuisuga.

“O le fa’ai’uga o Oketopa i le tausaga talu ai, na tatala ai se nofoaga fou lea ua feso’ota’i ai le mamalu o le atunu’u i afio’aga o Sauano ma Saletele, o afio’aga e le’i mafai ona maua ai feso’ota’iga tau telefoni-fe’avea’i, a ua fa’afiafiaina tele, ona ua mafai nei fo’i ona aofia ai le Atu Fagaloa atoa, aua o lea ua feso’ota’i ai fo’i ma le afio’aga o Uafato.

“Fai ai a’u ma sui o le malo ae maise fo’i le mamalu o le afio’aga o Uafato, ‘ou te momoli atu ai le fa’afetai tele i le pulega ma le ‘aufaigaluehga a le Bluesky ona o le manatu mai i le mamalu o le atunu’u o lo’o afifio ma papa-a’ao i lenei itu o le atunu’u, ua fa’afaigofieina ai feso’ota’iga mo latou.” 

O le nofoaga lea i Uafato, o le fa’aauauina lea o se poloketi o lo’o fa’atinoina e le Bluesky, o lo’o aofia ai afio’aga ma alalafaga uma i tua o le atunu’u e le o o’o iai le malosi o feso’ota’iga tau-telefoni fe’avea’i.

09 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>