O la’u tala fo’i

139 Hits

1. Matauina i Tala Fou fai mai ua teena e le Palemia Palusalue-ma e foliga mai o lea tete’e a le Palemia –ua faaupu mai ai e faapea-“O loo latou ti’eti’e ia matou taavale. E tatau ona i ai ni a latou lava taavale-ae o la e ti’eti’e fua!

Aisea ua fai ai a latou faatosina-ae faaaoga ai a matou taumafaiga? –o le faaaliga lea a le Palemia! Ona toe aumai ai lea o le faamatalaga o la ata-O LE TAUA TAU POLOKIKI: Taitai o le Tautua Samoa Party o Palusalue Faapo II ma lona fili-Palemia o Tuilaepa Sailele Malielegaoi.

Ona aumai ai lea o se faaupuga fai mai ua tavili e le Palemia o Tuilaepa Sailele Malielegaoi ni pūpū i le fuafuga a le Tautua Samoa Party mo le faiga-palota-ma fai mai ua na o se fuafuaga  vaivai.

Na ia tuua’ia foi le Taitai o le Tautua Samoa Party ona o le kopiina o fuafuaga na faaalia e le Vaega e Puipuia Aia Tatau a Tagata. Talu ai la ona o se tala umi lea tala-e lelei la ona tuuina atu ni nai fesili ina ia atili malamalama ai le ‘aufaitau i lenei mataupu.

O le fesili la-afai ua kopi e le Tautua Party ni fuafuaga a le HRPP-o a ia fuafuaga?  O ni fuafuaga lelei e manuia ai le atunuu poo ni fuafuaga e feoti uma ai le atunuu? Afai o ni fuafuaga lelei-aisea ua tuu ai mo le Palota o loo loma nei-ae o lea ua savali le 40 tausaga o pologa faa-soloatoa le atunuu talu ai faiga pi’opi’o a le faiga-malo a le HRPP? 

Afai la ua malepelepe ma masofasofa le atunuu i faiga a le HRPP-o le a le mea ua le salamo ai nei tagata ma se’e ese filemu –ae o atu nisi tagata Samoa e alolofa moni i le atunuu-e faafoe le Malo o le atunuu!

O le mea lea ua aliali mai- ua suamalie le fia avea ma ta’ita’i-tiga lava ona faalogo atu ua malaia le atunuu talu ai le latou faiga-malo-ae fiapule lava! Aisea la ua faigata ai ona salamo nei tagata ia latou mea leaga ma faiga pi’opi’o -ma taatia loa le Malo o le atunuu e o atu ni tagata alolofa moni e faafoe? Afai la ua suamalie le lole i le mitimiti- a faapefea le atunuu lea e matelaina? O nei la upu uma e fai-e na o upu suamalie lava!

Afai la e na o finauga faa-polokiki lava mea ia e aumai- o le tiute la o le atunuu atoa ona fai le suiga e manuia ai. E toe faamanatu atu- o le atunuu poo tagata palota e faia le tonu o le mea lea e pisa soo ai le Palemia ma le Tautua Samoa Party.

O le aoga la o le tulai mai o le atunuu atoa e fai le suiga ina ia manuia ai- o le faamanatu foi lea i le Palemia ma le ‘Au Polokiki uma-o le atunuu e pule-ae le pule se Vaega Faa-Upufai. Afai la e finagalo ai le atunuu ae fai se suiga-o iina o le a maua ai le aoaoga mo le ‘au-polokiki uma! O le a le aoaoga? O le atunuu e tofia ona ta’ita’i-ae le o ta’ita’i! O le a sou taofi?

2. Matauina foi se ulutala fai mai o loo sailia e le Malo se Loia Sili fou….! O le fesili-o le a le mea ua tupu i le Loia Sili o loo i ai nei? E i ai se mea ua fesopoa’i ai le Loia Sili ma le finagalo o le Malo? A toe faaupu- e i ai se mea na finagalo ai le Malo e le’i faia e le Loia Sili?

Ae afai la ua tonu i le Loia Sili o loo i ai nei e le toe talosaga mo lea avanoa-ia atonu e mafua ona o ni ana ia lava fuafuaga-ma isi mea o i tua atu tatou te le o iloa! Ae poo le a lava- e tatau lava ona faafetaia Aumua mo lana tautua i le malo ma le atunuu atoa! Ae poo a lava fuafuaga a Aumua- matou te momoli atu le faafetai  tele mo lana tautua ia Samoa! O le a sou taofi? 

3. Matauina foi i Tala Fou fai mai ua ta’ua le igoa o Samoa i faiga pi’opi’o tau fefaatauaiga. O le faamatalaga la o lea tala fai mai e sefulu atunuu iloga i faiga pi’opi’o tau fefaatauaiga i le lalolagi atoa e aofia ai ma atunuu o atumotu o le Pasefika.

Fai mai la o Vanuatu le atunuu auito i pagatia talu ai o loo avea o ia ma ta’ifau leoleo o ia faiga na te mata’ituina le fagia o pepa o oloa tau fefaatauaiga. Ia afai la ua laumanu’ia foi le suafa o Samoa i nei faiga pi’opi’o-e aliali mai la ua na o mea leaga lava o loo ta’uta’ua ai Samoa i le taimi nei-ae ua uma le taimi sa avea ai le Malo o Samoa-ma malo sa faaaloalogia ma faata’ita’i i ai le Pasefika ma le lalolagi atoa.

O le fesili la- faamata e mafai ona toe aveeseina lea luma o Samoa-talu ai faiga pi’opi’o? O le a sou taofi?

© Samoa Observer 2016

Developed by Samoa Observer in Apia