E sili lava Samoa

By Sarafina Sanerivi 08 December 2016, 12:00AM

“E leai lava se nofoaga e sili atu nai lo’o Samoa.”

O lea le finagalo o le taule’ale’a ia Saipele Lam Sam, 23 tausaga mai le afioaga o Tuana’i. 

“O a’u o lo’o ou nofo nei i Ausetalia ma lo’u to’alua ma la’u fanau, ae fai lava ma asiasi mai aiga iinei Samoa,” o le fa’aaliga lea a Saipele i le Fofoga o Samoa i le aso ananafi. 

“O la’u la va’ai iai, e sili atu lava le olaga i Samoa nei pe a fa’atusatusa atu i isi atunu’u.

“O Ausetalia, e mo’i lava e to’atele nisi e fia o ma saili manuia i Ausetalia, ae ia te au lava ia, e sili lava Samoa. 

“O le mafuaaga o la’u fa’amatalaga, ona o Samoa e sa’oloto lava le nofo i lota fanua ma lota fale. 

“E maua fua foi meaai mai fa’atoaga ma laufanua o Samoa. 

“E moi foi lava i le taugata o le soifuaga ua iai nei, ae o lo’o maua lava mea e tausi ai aiga. 

“E le pei la o Ausetalia, e fa’alagolago lava mea uma i le tupe. A le faigaluega foi le tagata e leiloa poof ea e maua ai se tupe e totogi ai le fale, fanua ma totogi ai pili.”

Ae na ta’ua e Saipele, ua le’o toe tutusa foi lava le olaga o Samoa i le vaitau lenei. 

“A va’ai foi i nisi o aiga, e lagona ai lava le fa’anoanoa. E pei foi o si o matou aiga, e pei o a’u lava lea e fa’amoemoe iai si o matou aiga, aua se lumana’i manuia.

“Ua taugata lava le soifuaga i Samoa i le nei vaitau. A to’atasi la le tagata faigaluega, ua tele lava le fa’afitauli. 

“E silafia lelei foi o le to’atele o tagata i totonu o se aiga Samoa. A to’atasi la le tagata faigaluega, e faigata tele lea. 

“O le ala foi lea e galulue malosi ai lava ina ia manuia aiga. Auā tatou te manana’o lava ina ia ola fiafia ma ola manuia o tatou tagata. 

“A le tinoū la le tagata, e le mafai ona manuia lona aiga.

“Ae po’o a lava mea uma tatou te faia, a fa’alagolago lava i le Atua, tatou te mafaia lava o se mea e fa’anaunau iai le loto.”

By Sarafina Sanerivi 08 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>