O fanau o le lumana’i

By Sarafina Sanerivi 08 December 2016, 12:00AM

Ua tatou iai nei i le vaitau o le seleselega o fua o galuega a le fanau i lenei foi tausaga fa’aleaoaoga. 

O le vaitau e iloa ai le tagata sa tinoū i ana meaaoga o le tausaga atoa, fa’apea foi le matua sa faia ma le fa’amaoni lana pitola’au o le una’ia lea o fanau i le aoga. 

O le vaitau foi e fiafia ai ma fa’amanatu ai le taua o le a’oa’oina o fanau, auā o le lumana’i lea o aiga ma nu’u o le fanau. 

O lea foi le finagalo o le tama ia Lemalie Nauma, e 40 tausaga mai le afioaga o Afega.

“E ese foi le taua o lenei vaitau i le olaga o so’o se taimititi aoga,” o lana fa’aaliga lea. 

“O le taimi lenei e iloa ai le tamaititi sa tinoū i ana meaaoga ma to’aga i le aoga i le tausaga atoa. 

“E va’aia ai foi nai matua sa faia ma fa’atino lelei a latou pitola’au i le una’ia lea o fanau ina ia fa’amaoni i a latou meaaoga. 

“O so’o se laugatogi lava, e vaaia ai le lolofi iai o tagata e molimauina fa’aiuga o a’oa’oga a le fanau, auā o fanau o le lumana’i lea o Samoa. 

“O le vaitau lenei, e fa’amanatu mai ai ia i tatou le taua o le a’oa’oina o le fanau mo le lumana’i. E pei foi la ona iai lenei aso, o lo’o molimauina le laugatogi ma le tolaulauina o le fa’aiuga o galuega a le fanau.”

Na ta’ua e Lemalie, o le a’oa’oina o fanau mo le lumana’i, o se galuega faifa’atasi lea a tagata uma, e le na’o faiaoga. 

“O le mea lea e tatau ona manatua e tatou uma lava, o le a’oa’oina o fanau o se galue e tausoa fa’atasi. 

“E iai le vaega a matua e fa’atino, o faifeau, o le nu’u aemaise o faiaoga. A galulue fa’atasi la vaega uma ia, o le a le taumate le fa’aeaina o le fanau.

“O la’u fautuaga lea i le fanau, a fia manuia le tamaititi, o le aoga lava e maua ai manuia. O le tamaititi lava e fa’alogo ma usita’i i matua, o ia na e na te maua le mea lelei. 

“O le vaitau foi lenei, o lo’o fai lava si saoasaoa o le olaga. Ua tele suiga e ono aafia ai le ola aoaoina o le fanau, ae a fa’amaoni ma alofa le tamaititi i ona matua, o le tamaititi lena e fa’aiuina ma le manuia lona taumafai.

“O upu lava a le tusi, a’oa’o le tama e tusa ma ona ala, a oo ina matua e le toe te’a ese ai. 

“A tatou galulue fa’atasi, e mautinoa ai le maua o lumana’i manuia e le gata o aiga, ae fa’apea foi nuu ma le atunuu.”

Na taea foi i le fa’atalatalanoaga ma le tama ia Lemalie, le momomo ai o le loto pe a vaai i fanau o lo’o feoai i le taulaga e fa’atau oloa ae le o ini aoga. 

“E to’atele lava matua ua famai o le leai o se tupe e fa’aaoga ai fanau o le ala lea ua le avea ai fanau i le aoga. 

“Ae o lea ua taoto le tulafono a le malo, ina ia aooga fua le fanau. 

“O lo’o maua ai foi le fesoasoani mai le nu’u ma isi aiga ina ia fa’aaooga ai a tatou fanau.”

By Sarafina Sanerivi 08 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>