Mafatia ona o le utiuti o le suavai

Tusia Vatapuia Maiava ma Ilia L Likou ,

154 Hits

Ta’amilo Sila o Fasito’o-Uta.

Ta’amilo Sila o Fasito’o-Uta.

“Ia o  le mafatiaga o lo’o i a’i matou, ua mafatia lava matou i le leai o se suāvai i le tele o aso , ia ua laki nai timuga lea ua fai ma tua i ai.” Ta’amilo Sila i le fa’atalatalanoaga ma le Fofoga o Samoa i le aso ananafi.

“Ua mafatia lava i matou i le suāvai ua tele ina leiloa le taimi sa’o e maua ai le vai i nisi o taimi ua fa’afetai o  paelo o lo’o sefe ai  ma o lo’o maua ai nai vai i le taimi lenei.

“O le tele o aso e le maua se suāvai,  o le Aso Sa atoa lea na te’a atu nei, ia matua’i leaga lava, e o si a’u fanau savavali i uta nai aiga e maua mai sina suāvai. “Ia po’o se ta’avale e asu mai sina vai ma matou ona o le mafatiaga ua i ai nei.

“Ia o nei  ia o le mea lena o lo’o mafatia ai ona o le suavai ma e matua’i mana’omia lava ona ua o tatou iloa uma o le suavai o le ola lea o le tagata.

“O  lea fa’atoā tau sua mai le vai, ae sua mai fo’i e palapalā , ia e pei lava ona tagataga’i atu ai, ia lea fa’atoā tau maua mai levai ma e matua’i le saogalemu lava mo le soifua maloloina i le tele o taimi.

“Ia aemaise lava o le fa’aeteetega mo le saogalemu o le fanau, ma ua fai si umi o feagai uta nei ma lea fa’afitauli.

“Ua fai sina leva, ina ne’i te’i sese le tali atu, ae ua fai lava si leva ona mafatia lenei pito e moni lava o lo’o maua mai nisi le sau ai le vai ae le sologa lelei ai pea i aso uma.

“E pei lava e popole lava i fa’ama’i e ono maua ai tamaiti aua e leiloa atu lava tamaiti pe a feoa’i o atu i vai, ia ma avatu ai lava le falema’i ia ma e ese’ese lava fa’amai  e mafua mai i le palapala o le suavai ma  e ono maua ai le fanau.

“ O nisi o taimi a omai nisi o le malo mo le fa’aleleia o le suāvai ia e o lava i latou i o latou aiga fai muamua ae le o’o mai tua nei le fesoasoani, e talosagaina ai lava le palemia se’i alofa mai ma fesoasoani mai i mafatiaga o lo’o ua feagai nei ma tua nei i aso uma.

© Samoa Observer 2016

Developed by Samoa Observer in Apia