Manatu o le Fa'atonu - O se tala fa’amomoiloto tele ae po’o ai fo’i le fia ma’ema’e, e matua maligi a loimata!

Tusia Gatoaitele Savea Sano Malifa ma Faaliliu e Maiava ,

365 Hits

Ua fa’afofoga muamua fo’i Samoa i lenei tala. 

Le tala i le fa’ananau pea o le malo e tutuli ‘ese i latou o lo’o soifua filemu nei i Sogi, le nofoaga tu-lalata i le sami i le Penisula o Mulinu’u, ua au-tausaga o aumau ai, a’o lea ua fa’atonu e tu’ua nei ma o-‘ese, ae tutuli i ‘ele’ele a-uta i Falelauniu. 

Na laga’ia lenei mea i le amataga o Me o le tausaga nei. Lea na maua ai e le mamalu o lo’o aumau i Sogi se tusi mai le Fa’alapotopotoga a le Malo mo ‘Ele’ele o le Atunu’u (SLC) ma lapata’ia ai fa’apea: “O le asō le aso mulimuli o le poloa’iga e 30 aso sa tu’uina atu, ia outou tu’ua ai nofoaga i Sogi.” 

Na fesiligia i lena taimi se tasi mai Sogi mo sona finagalo ae saunoa: “Mato te usita’ia le tulafono e pei ona ta’ua i le Tusi. Pau lava lea o le tala matou te fia tu’uina atu, se’ia iai se isi fa’aaliga.

Ae  na matua te’ena lava e tasi o soifua matua mai Sogi (e le mana’o e fa’alauiloa lona suafa) .

“Po’o le a lava le fa’ai’uga a le malo e o’o iai, ae o matou, matou te le o a i se isi mea,” o lana fa’aaliga lea. 

 “O lo matou fa’asinomaga lenei ma o i’inei fo’i matou te nonofo ai.” 

Na fa’aopoopo mai fo’i, e le’i o’o atu se tusi a le malo ia te ia peita’i pe alu pe le-alu, e le afaina lea ma e le-suia ai o se tali. 

“Matou te malamalama lelei i le taunu’uga e o’o iai peita’i, matou te nonofo ai lava i’inei se’i o-mai e ‘ave’ese matou.” 

O’o ane i le tina-matua o Tala Leiataua, lea na ta’ua, o lona soifuaga atoa, o Sogi, ma fa’ailoa fo’i lona finagalo, e le alu i se isi lava mea.

“Fa’amolemole, tu’u ai pea matou i le ‘ele’ele lenei,” o lana tatalo lea ma fa’amanino tonu mai lava i le Ali’i Palemia, Tuila’epa Sa’ilele Malielegaoi. 

Na toe fa’alua mai le ‘olomatua: “Fa’amolemole, tu’u ai pea matou i le nofoaga lenei. Sa pologa ai o matou matua e tanu le taufusi mo matou i taimi o pulega a Siamani, o i’inei la lo matou nofoaga. Fa’amolemole, matou te manana’o lava e nonofo i’inei.” 

Ae afai lava e manana’o pea le malo e ‘ave’ese le tina lea ma lona aiga, fai mai Tala: ‘Ou te fai i le malo, e ‘eli se lua ma lalafo uma ia matou i totonu.

 “’Ou te oti ma tanumia a’u i le ‘ele’ele a tua’a ma matua ua tofafa mai tu’ugamanu a ua fa’asolo mai ia matou ma ua matou sauni fo’i e fa’afeagai ma so’o se fa’afitauli e o’o mai, Tuila’epa.” 

O lo’o mana’o fo’i e fa’amanatu: “O le nofoaga lea ou te ola ai i lo’u olaga atoa ma o i’inei fo’i e tanu ai lo’u tagata. O lo’u nofoaga lea, le ‘ele’ele ‘ou te oti ai.”

O le lua lena o masina talu ai. 

O le vaiaso talu ai, na fa’aalia ai e se ofisa o le Fa’alapotopotoga o ‘Ele’ele a Samoa (SLC), i talanoaga ma le mamalu o lo’o nofoia Sogi, ua tele ina malilie o le a si’itia ‘ese, vagana lava se aiga e to’atasi.

E le’i mana’o le ali’i ofisa e fa’alauiloa lea aiga. 

A o le aiga e to’atasi e mautinoa e le maluelue, o le aiga o Nanai Tokuma, o se ta’ita’i iloga, o ona tua’a ua tofafa nei i tu’ugamanu, o ulua’i tagata nei sa nofoia Sogi. 

Na fesiligia mo sona finagalo, ae fa’amatala mai e Nanai le mafuaga na maua ai e lona aiga le ‘ele’ele lea ua taumafai nei le malo e tutuli

‘ese mai ai latou.

Saunoa Nanai, na tu’ua’ia lona tama i le maliu o se ali’i-faipisinisi ma ua sauni i lona fa’asalaga, e sisi.

“’Ou te manatua lelei le taimi na fa’atofa mai ai lo’u tama ia matou a ua mae’a o saisai i tua ona lima,” o lana fa’amatalaga lea.

“Ua sauni e fa’ataunu’u lona fa’asalaga, ua saisai ona lima, ua iai fo’i le maea i lona ua ma se fai-‘ie e ufiufi ai ona foliga. 

“A’o savali mai i le tulaga o le a sisi ai, ae taufetuli mai ali’i-Saina e to’alua ma ta’u i Leoleo, o la’ua na fasiotia le tamaloa faipisinisi.

Na fa’asaoina i’ina le ola o lo’u tama. Na savali mai ua sa’oloto ma loimata ua tafe-lauga’o, a’o matou va’ava’ai uma atu iai, lana fanau ma lo matou tina. O le mafuaga lena o le ofoina mai o le fanua lenei, lea matou te nonofo ai e o’o mai i le taimi nei.

“O le ‘ele’ele lea na foa’ina i lo’u tama, o Tokuma Torurae, e le ulua’i Palemia o le atunu’u lenei, o Mata’afa Faumuina Mulinu’u II. 

“O ia na faia le mea lena, na faia i lo’u tama: “Leai, o …o e nonofo i le ‘ele’ele lea ma lau fanau; e le mafai e le malo ona totogi atu lana ‘aitalafu ia te ‘Oe. O le ‘ele’ele lea mo ‘Oe e o’o i le fa’avavau.” 

O le vaiaso lava talu ai, na saunoa ai Nanai: “O le mafuaga lena o le matou nonofo ai i’inei. Mai le fia tausaga ua mavae, a’o lea ua fai mai nei le malo matou te o-’ese, a’o fea la e o iai? E leai ni matou tupe e fa’atino ai lena mea.”

O se tala fa’amomoiloto tele. E fa’anoanoa tele pe a mafaufau iai, e o’o lava i se toamanumanu, e matua maligi ai loimata. 

Fai atu ai fo’i.

© Samoa Observer 2016

Developed by Samoa Observer in Apia