Fa’afitauli o lo’o feagai ma se tamā

Tusia Deidre Tautua-Fanene ,

150 Hits

Tamā ia Ropeti Apulufonofili i le toe faaleleia o lona maota.

Tamā ia Ropeti Apulufonofili i le toe faaleleia o lona maota. (Photo: Misiona Simo)

O le nonofo ai ise fale e le saogalemu ma le le leai o se suavai  o se olaga faigata tele mo le tama ia Ropeti Apulufonofili.

Ae ui i lea e leo faavaivai ai lava lea tama ma o loo iai pea lona faamoemoe e iai le aso e faaeaina ai mai nei mafatiaga uma.

O lenei tama e le faigaluega ae mai le afioaga o Faleasiu.

I lana saunoaga I le Fofga o Samoa sa ia taua le faigata tele o le soifuaga o loo ola ai aemaise lava le vaai alofa I lona aiga ma lana fanau e toafa.

Sa ia taua foi o le tele o ona mafatiaga e mafua mai I le faaleagaina lea o latou meatotino e faalavelave faalenatura.

Sa maua atu e le vaega o le Fofga o Samoa lenei tama o loo galue I lana faatoaga koko samoa I le timuga.

Sa ia faaalia foi lona loto mafatia pe a vaaiatu isi ona afafine o Suni o loo tausia nai ona tei laiti a’o feagai ai ia ma galuega.

“Ua leva tele ona matou nonofo iinei.

“O le vaitaimi o le afa o Eveni o se taimi matautia lea ma le faigata.

“Sa faaleagaina uma le matou fale ona o lenei afa.

“O mea uma ia e te tagai mai ai ma le matou fale o mea ia sa taumafai lava ina ia toe fonofono ma faaleleia.

“O le taualuga o le matou fale sa talaina mai ae fausia ai le matou fale lea ua iai I le taimi nei a vaavaai mai ai tagata e pei o se umukuka le matou fale.

“O le umukuka o loo I tua ma o loo matou faaaogaina e fai ai meaai ma matou aai ai.

“O nei mea uma sa taumafai lava mai mea o loo  maua I lima faapea ai nai seleni e maua mai i le faatoaga.”

O se vaaiga alofa i nisi o alo o le tamā ia Ropeti Apulufonofili o Faleasiu.
O se vaaiga alofa i nisi o alo o le tamā ia Ropeti Apulufonofili o Faleasiu.

Sa faaalia foi e lea tama o loo feluafesasi lava lona mafaufau poo fea o le a fai poo le alu e faigaluega ina ia maua ai se latou nofoaga lelei poo le nofo I le fale ma galue I le faatoaga.

“Soo se mea lava matou te maua I matou lima o mea ia matou te faaaoigaina.

“O le taimi nei o loo matou faaaogaina launiu e ato ai le taualuga o le matou fale.

“ o le tapoleni ia e fesoasoani etele I le taliina o le timu pe a pisi mai I totonu o le fale.

“O le tasi faafitauli o loo matou feagai nei o le fola o le matou fale.

“E fola laupapa uma le fale ae peitai e fai si vaivai tele o nei laupapa ma e le o iai se saogalemu o iai.

“O fala o loo ufiufi ai laupapa ma e leai foi se soifua maloloina o iai I lenei tulaga.

“Ua ova ma le 10 tausaga talu ona matou nonofo iinei ae o le mafuaaga o le matou nonofo ai pea iinei ona o le matou fanua lenei ma o I foi sa feola matou feola mai ai lea ua fai fanau o lea lava e iinei.

“O le tasi faafitauli o le leai foi lea o suavai.

“E leai se tasi o maua ma le tina o le aiga e faigaluega ae pau le tulaga e mafai ai ona maua fesoasoani I le ma fanau ma tausi ai o le faatoaga.

E faatau foi fua o faaeleeleaga ina ia maua ai se tupe e faatino ai aoga a le fanau ma totogi ai o latou pili.

O le tau o le soifuaga ua fai lava si tauagata ma ua le mafai ai ona toe fai se isi mea.

Ua taugata uma mea uma ae o totogi o tagata o loo tumau pea I le laititi.

Ae ui I lea e faafetai ai lava le Koluse Mumu mo le tane vai faapea ai le fausiaina o le fale le taua.

© Samoa Observer 2016

Developed by Samoa Observer in Apia