O lo’o fa’atalitali pea se manuia mai le suavai

Tusia Aruna Lolani ma Fetalai Tuilulu’u ,

98 Hits

Mana’omia le suavai: Togia Ropati mai Vailuutai.

Mana’omia le suavai: Togia Ropati mai Vailuutai.

O le suavai e tele lona aoga i tagatam uma ma o fea lava e iai, latou te mana’omia pea.

O Togia Ropati o lo’o ia silafia lelei lava le faigata o se olaga pea le iai se suavai e tua iai.

E 60 le matua o lona soifua, o se to’alua ma se tama i tamaiti e to’atolu.

Sa taua e Togia i le Fofoga o Samoa, o le tele o aiga i Vailuutai o lo’o maua ai lenei faafitauli ma o loo manaomia se fesoasoani tele ile suavai.

“E leai se vai mautu foi lele matou te faalagolago iai ma ou te masalo ua ova atu ma le 20 tausaga talu ona tupu lea faafitauli. Ua fai tele sina umi,” o lana tala lea.

Sa taua foi e Togia, sa totogiina e latou se tupe ina ia mafai ai ona faaa’e le suavai i luga ile latou itu ae peitai ane sa faamaimauina le seleni ona o se tulaga e lei mafai.

“O le mea tonu a lea e tupu ai lea faafitauli, ona o le vai ole malo e le au mai i o matou maota.

“O lalo atu a i le ala tele e te vaaia se pamu vai, ia o le pamu vai lena lea e faaaogaina e Vailuutai ma Fasitoo-tai ae uma ifo a, e feinu lesi pito nuu ae le feinu lesi pito nuu.

“Lea la na ave ai le matou talosaga ile malo, o le mea la sa fai sa matou o faatau mai ofe ina ia faaalu ai le suavai, ae uma na toso ofo ae siaki atu e le a’e i luga le vai, ia maimau atoa lena tupe sa faaaoga mo na mea.”

Sa taua foi e Ropati sa iai se polokalame sa latou asiasi atu ile latou nuu, ma foai atu ai i nisi o aiga ni tane vai.

“O le mafuaaga la lena na e te vaai mai ai, e iai tane vai a isi aiga aua o le polokalame lea sa sau, o se polokalame foi lele e lei faapea e laugatasia uma aiga i tane vai, o le latou a ia foai mafai sa fai mo le nuu.

“E maua a la tane vai a le tele o aiga, ia ae leai se matou tane vai na maua.

“Ae matou te manaomia lava se tane vai, aua o le vai o le ola ole tagata ma e leai foi se mea e mafai ona faataunuuina pea leai se suavai.

“E manaomia foi aua le tausiga o aiga aemaise maumaga ma o se talosaga atu lena i le tatou malo mo se fesoasoani.”

© Samoa Observer 2016

Developed by Samoa Observer in Apia