Tatala aloa’ia le tusi ‘Leo o se Motu’ a se teineitiiti-a’oga alualu

158 Hits

Lupeoaunu’u Va’ai

Lupeoaunu’u Va’ai

Na manumalo le tama’ita’i o Lupeoaunu’u Va’ai, 12 tausaga o le A’oga a Sagata Maria i Savalalo, i se fa’ailoga o le Pine ‘Auro mo lana tala sa tusia, “O le Leo o se Motu” i le tauvaga o tusiga-tala pupu’u a fanau-laiti lea sa fa’aigoaina ‘O Leo o Tupulaga o le Lumana’i” i le tausaga talu ai. 

O le vaiaso nei, o lo’o iai Lupeoaunu’u i Lonetona mo le fa’alauiloaina aloa’ia o lana tusi ma o le avea ai fo’i o se Leo o Tupulaga mo le Lumana’i, ua fa’ananau ai mo le fa’aauauina pea o lana tusi, ia avea o se vaega fa’asolo, e tusia ai tala ta’itasi i tausaga uma se’ia aulia le 2020.  

E le o aso uma e fa’apea mai ai se tusitala-alualu, a-mea ua mae’a ona tusia sana tusi ma ua uma fo’i ona fa’alauiloaina,  a o le a fa’aauau ai fo’i ona tusia nisi ana tala i le isi lima tausaga o muamua. Ae mo Lupeoaunu’u mai Vaoala, o lana miti lea ua taunu’u. 

“Ua ‘ou fiafia ai lava; aua e leai so’u manatu o le a o’o se mea fa’apea ia te a’u,” o lana fa’aaliga lea. 

O le 11 o ona tausaga, na ‘auai ai i le tauvaga o tusiga-tala i le 2015 – lea na tatala atu ai avanoa mo tala mai fanau laiti – o tusitala talavou mai so’o se vaega o le kelope, ma manumalo ai i se Pine ‘Auro ona o lana tala sa tusia, e fa’a’autu i se teine talavou e igoa ia Katalina.   

O le Tusi o Tala Fa’asolo a Tupulaga Laiti - O Leo o Tupulaga o le Lumana’i, sa amata i se faiga-fa’aPa’aga ma Malo ‘Aufa’atasi ma na fuafuaina e fefa’asoaa’i ai leo ma lagona o tupulaga laiti mai i itu-‘ese’ese o le lalolagi, i lu’itau e manatu o le a latou feagai i le lumana’i, ae maise fo’i o ni fofo e manatu, e mafai ona tapatapa iai. 

O lea taumafaiga, o lo’o o-gatusa ai ma le tuli’aupuina o Fa’amoemoe TauAtina’e Gafa-taulimaina ma le Maliega mo Fesuia’iga o le Tau na sainia i Pale i Farani, ma aloa’ia ai fo’i le Maliega a Malo ‘Aufa’atasi mo Aia-Tatau a le Tamaitiiti.

O Lupe e pei ona lauiloa ai, o se tasi o le to’alua mai Motu o le Pasefika na manumalo i Pine ‘Auro. O le isi Pine ‘Auro o Tyra Sioni mai Papua Niu Kini.

“Na ‘ou te’i ina ua iloa ua ‘ou manumalo i se pine ‘auro ona o la’u tusi! Na tusia lava la’u tala i mea sa ‘ou lagona, o ‘ou lagona ma mea sa fa’alogo iai mai lo’u tina-matua (tina-o le-tina), ma sa faigofie lava aua o mea na sau mai lo’u fatu,” o le tala lea a Lupe. “Talosia o fiafia iai nisi ma iai fo’i se aoga e fesoasoani e fa’asao ai lo tatou atunu’u ma lenei paneta.” 

O Lupe e a’oga i le Tulagalua a Sagata Maria, o mata’upu e fiafia iai e aofia ai le Matematika, Igilisi, Mea e Tutupu i le Lalolagi nei ma le fa’aSaienisi. E fiafia lava i mata’upu o le si’osi’omaga ma ua fa’atuina fo’i sa latou vaega mo le si’osi’omaga i le a’oga. 

O le vaiaso nei, o lo’o i Lonetona e ‘auai i nisi o polokalame fa’ata’atitia mo tupulaga talavou o lo’o talimalo ai le Leo o Tupulaga o le Lumana’i ma le Vaega o le Mary Robinson Foundation – Climate Justice. 

E fa aso o lea fa’amoemoe – mai le Aso 07 – 10 o Iulai, e aofia ai le amataina aloa’ia o faiga-fa’aPa’aga fa’ava-o-malo i le va o le Leo o Tupulaga o le Lumana’i ma le vaega o le Bloomsbury Publishing, lea o le lolomia tusi a tupulaga talavou nei, ma tatalaina ai fo’i o tusi uma nei, i Maota o le Palemene. O le a tatala aloa’ia ai fo’i ma le tusi a Lupe a’o ‘auai i talanoaina o le faia ai, ma se fiafia mo latou ua mau-fa’ailoga.

O le aso lona tolu, o se mafutaga fa’aleA’oa’oga mo Tusiga-ata a Tupulaga ma Tusitala ‘ese’ese e faia i lotoa o le Iunivesete o Cambridge fa’apea ma se asiasiga i le fanua ma ‘ele’ele fa’asaoina e fa’a‘autu mo le puipuiga o meaola, i le aso mulimuli. 

 “Ua matua ‘ou fiafia lava ma fa’ate’ia i lenei mea, ona o le taimi muamua lea o le a malaga ai mo se taimi umi i luga o se va’alele, e alu i Lonetona,” o le fa’amatalaga lea a Lupe. “’Ou te talotalo e fa’auo ma tamaiti fo’i mai isi atunu’u ma iloa ai fo’i fa’afitauli ‘ese’ese o feagai ma latou ae maise ‘auala e manatu e mafai ona fo’ia ai; o se tulaga e mafai fo’i e tatou ona fai.” 

O le Leo o se Motu, o lo’o aofia ai vaega o le suiga o le tau, o le malu-puipuia o la’au ma meaola ma tulaga tau-a’oga. Talu ai o so’otaga nei, o le a fai ai se tautalaga a Lupe e uiga i Fa’amoemoega o Atina’e Fa’aauau i Fesuia’iga o le Tau, o Meaola uma ma le Puipuiga, o le Malosi’aga ma Fuafuaga mo le lumana’i, i aso e fa o lea fa’amoemoe. 

O le a fa’amaumauina ma tusitusia e Lupe vaega uma o lana malaga, lea o lo’o lagolagoina e le Vaega mo le Puipuiga o le Si’osi’omaga o le Pasefika (SPREP), le Matagaluega o Puna’oa ma le Si’osi’omaga, le Kamupani a le SSAB ma le Pule, Faia’oga ma Tamaiti-a’oga uma o le A’oga  a Sagata Maria i Savalalo. 

© Samoa Observer 2016

Developed by Samoa Observer in Apia