Fa’asinomia e maua ai Fa’asinomaga

117 Hits

Toe manatu tasi lava… i le ali’i o James Macie na fanau mai o se tama-a le-po. O le fa’anoanoaga, ua avea lea tulaga ma ona ila i lona olaga atoa – o se tagata-nu’u sa soifua mai ae le’i aloa’ia o se tagata-nu’u o Egelani i le Vaitau o le Seneturi Lona 18.

Ui o lona tama-moni o le Perenise o Northumberland, ae sa le-fa’atagaina James e fa’aaoga le fa’ai’u o lona tama. Sa taumafai malosi si ona tina ina ia aloa’ia-lelei e tagata le tulaga o lana tama, peita’i sa te’ena malosi e le Malo o Peretania, ma i’u ai lava ina te’ena ai ma ana aia-tatau fa’aleTagata, pei fo’i o aia a isi tagata-nu’u lautele. E le mafai ona ‘auai pe avea o ia o se sui o le Palemene a Peretania, pe umia fo’i se tofiga aloa’ia o le malo, pe faigaluega fo’i i so’o se matagaluega a le malo. E le mafai ona ‘auai i le Vaega’au a le Ami, i fitafita o le Lau’ele’ele po’o le Sami fo’i.    

E le’i leva talu ona fa’au’u James mai le Kolisi o Pembroke, ae finau loa ma amata galue i lana matata-fa’aSaienisi. O fa’ai’uga o le tele o ana su’esu’ega ma galuega fa’atino, sa fa’asalalauina fa’alaua’itele ma avea ai o ia, o se saienitisi ta’uta’ua ma aloa’ia. A o le fa’alavelave lava lea, sa le-taliaina lava ma aloa’ia e le malo o Peretania, e le pei o isi saienitisi uma, talu ai lava lona tagata ma lona fanau mai. E le’i fa’aipoipo James i lona olaga atoa, ona ua na  silafia lelei, e ono te’ena fo’i e lona atunu’u sana fanau pe a maua, talu ai lava ia. Ui la i lea, ae sa tele pea ona sao aoga mo soifua o isi tagata. E maliu ane i le 1829, ua matua tele lona tamaoaiga ma o se tasi o tagata mauoloa. Ae sa ia le-tu’uina atu lona tamaoaiga lea mo lona atunu’u, ae sa tu’u atu uma ana tupe i le Iunaite Setete o Amerika. Sa ia le-aloa’ia ma ta’ua Egelani o sona atunu’u, pei fo’i ona latou le-aloa’ia o ia.  

I lana uili sa fai, na fa’atonu ai e James ina ia fa’aaoga ana tupe e amata ai se a’oga tele e fa’aauau ai su’esu’ega ma fa’alautele ai le malamalama o tagata-soifua uma. Pau tu’utu’uga sa mana’o ai, ia fa’aaogaina le igoa, le fa’ai’u o lona aiga sa ‘ave-e’sea mai ia te ia, i le taimi na fa’atoa fanau ai. O le igoa sa ia fa’aaoga mulimuli ane i lona soifuaga atoa, o Smithson.  O le asō, o le Maota o Smithson, le mata’aga a le fale-su’esu’e aupito tele i le lalolagi. E 19 fale-mata’aga o iai, e 9 fale-su’esu’e tetele ma le silia i le 140 isi ona lala fa’apea i isi atunu’u ‘ese’ese o le lalolagi, o lo’o aga’i iai le miliona ma miliona o tagata o le lalolagi mo su’esu’ega ma maimoaga o tu ma aganu’u, o tala-fa’asolopito fa’apea su’esu’ega ma fa’amatalaga fa’aSaienitisi. 

Na fa’aaoga e James le “te’ena o ia e maua ai lona fa’asinomaga” i vaega e fa’aaoga iai lona taimi, ana taleni ma ana ‘oa, e fa’aleleia atili ai lenei lalolagi ina ia soifua manuia ai. E le fa’apea o le fa’asinosino-lima, tu’ulafoa’ina  ma te’ena o ‘Oe e tagata, o le a le-aoga ai lou ola ma leai ai sou fa’amoemoe. O le isi itu, a e tatalo ma le agaga maulalo i lo tatou Fa’aola e pulea e Ia lou fatu, le agaga ma lou tagata atoa, o le a fa’aali atu e Iesu Keriso – Le Na te le-te’ena lava ‘Oe – Ana fuafuaga ma le fa’amoemoe lelei mo lou ola…mai lea aso i lea aso. Toe mafaufau tasi lava…                                                                        (Fa’aliliu e Maiava)

© Samoa Observer 2016

Developed by Samoa Observer in Apia