O LA’U TALA FO’I

08 July 2016, 12:00AM

1. Matauina i Tala Fou se alii ma se tamaitai mai fafo- na malaga mai i Samoa nei-e tafafao. Fai mai na o ma ni a la uo Samoa e tafafao -ma fai ai ni nai a latou mea inu i se tasi po-ae fai mai- pe o le ‘afa o le sefulu i le po lava lea- na faatoa iloa ai-ua leiloa le la ato. Fai mai o lea ato-sa i lalo lava o vae o lea tamaitai.

Fai mai o lana iPhone 6 plus sa i totonu o lea ‘ato-o lona tusi folau-pepa tala tupe se lua-mea pu’eata o le FujiXT10-mata tioata ma le tino-i-tupe e $130 tala sa i ai……! Fai mai ua le mafai lava ona toe maua le la ‘ato-ma o le taimi lava lea na matua lagona ai lo la popole….!

Ia-afai la o nei tagata-o ni tagata tafafao mai fafo-o le fesili-“O le a la le tala-‘ave o le a toe fo’i ma i la’ua e uiga ia Samoa? Afai la o mana’omia e le faigamalo le faa-to’ateleina o tagata tafafao e o mai i Samoa-o le fesili-“E faapefea ona fia o mai tagata tafafao i Samoa pe afai ona pau lea o le mea e maua atu i Samoa- o le gaoia o a latou meatotino?

Faamata ua tatau ma talafeagai-ona fai e le faigamalo se lapata’iga i faletalimalo uma-ina ia lapata’ina turisi-ina ia ‘aua lava nei latalata i tagata faapenei? E mafua se manatu ona afai e tele ni manuia o Samoa e maua mai le Turisi-ae o mai turisi fai faapenei i Samoa-o ai la le turisi valea na te faamaumau le tele o ana tupe e totogi ai lona pasese i Samoa nei-pe afai e toe taliu atu na o le mea e pipi’i i lona tino? O le a sou taofi?

2. Matauina foi i Tala Fou le faaauauina pea o su’esu’ega a Leoleo i le maliu o se tama’ita’i penisione. O lea la su’esu’ega i le maliu o Leuma Fesola’i- o loo ta’ita’ia e le alii ofisa su’esu’e o Soliali’i Paito Leifi-ma o lana faamatalaga i luma o le Faamasinoga e faapea-na maua lea tina e lona uso i le Aso Faraile-22 Ianuari 2016. E tusa ai la ma su’esu’ega-o le maliu o lea tina-e mafua mai ni gaoioiga soli-tulafono-na fai e se tagata.

E tusa ai ma le lipoti a foma’i-na maua e fomai ua gau se ivi o lona ua- ma o lona uiga-na saisai o ia! Ae fai mai o le Aso Lua ma le Aso Lulu o le vaiaso talu ai-na latou maua ai ni faamatalaga fou-ma o loo faia i ai ni suesuega! O le a sou taofi?

3. Matauina foi i Tala Fou fai mai ua faasala se tama taalo o le Toa Samoa ma le Rabbitohs- o Kirisome mai le NRL ina ua mae’a ni suesuega ma faamaonia ai lona faaaogaina o fualaau faasaina! O ia suesuega sa faatino lava e le NRL i le tolu masina talu ai- ma o taunuuga e pei ona tuuina atu i le kalapu ma le tama taalo e aafia ai.

Sa faamalolo lea tama taalo iloga a le Rabbitohs mo le 22 vaiaso i le tausaga talu ai-ina ua mae’a ona ia ioeina lona nofosala i moliaga tau sauaga i aiga. O lea la alii Samoa o Auvaa-na ia sainia se feagaiga ma le Rabbitohs i le faaiuga o le 2015. O Aperila na faaalia ai e Auvaa lona naunau e avea ma amapasa mo sauaga i aiga!

Ia –atonu o nei mea o fualaau faasaina ma le ‘ava malosi-ua fai ma mea e afaina ai olaga o alo ma fanau a le atunuu i fafo ma Samoa nei! E tiga lava ona logologoā i lea matata ma lea matata ma maua ai manuia mo aiga-ae faalālā atu loa e le Fili le ‘ava malosi ma le marijuana-sese loa ma le mafaufau! O le a la se tatou fuafuaga e tatau ona fai mo nei faafitauli-aua o lea ua i Samoa nei? O le a sou taofi?

08 July 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>