(Mai le Tusi o le Suaga a le Vaatele)

O Tagaloa o le atua e nofo i le vanimonimo; na ia faia mea uma-ma ua na o ia lava, ae leai se Lagi, e leai se nu’u; ae ua na ona fealualua’i mai o ia i le vanimonimo; e leai foi se sami, ma se laueleele, ae o le mea na ia tu ai-na tupu a’e ai le papa.

O Tagaloa Faatupunuu foi lona igoa; na fai e ia mea uma lava, e le’i faia le Lagi ma mea uma lava; a ua tupu ai le Papa i le mea na tu ai o ia. Ona fai atu lea o Tagaloa i le Papa, “Mavae ia,” ona fanau ai lea o le papa-ta’oto; toe fanau o papa sosolo, toe fanau le Papa-lau-a’au; toe fanau le Papa-ano-ano; toe fanau o le Papa-‘ele; toe fanau o le Papa-tu; toe fanau o le Papa ‘amu’amu; ona gata ai lea.

A’o Tagaloa-sa tu faasaga i Sisifo ma tautala ia Papa. Ona ta lea e Tagaloa i lona lima taumatau, ona mavae ai lea o le Papa i le itu taumatau. Ona fanau ai lea o le “Eleele (o le matua lea o tagata uma o le lalolagi); na fanau ai foi ma le sami. Ona ufitia ai lea o Papa-sosolo.

Ona fai atu lea o Papa-nofo ia Papa –sosolo, “Amuia oe i lou Tai.” Ona fai mai lea o Papa sosolo-“Aua e te faa-‘amu’ia mai, e o’o lava le Tai ia te oe.” Ua faapea papa uma ona faa-‘amu’iaina. Ona tu faasaga lea o Tagaloa i le itu taumatau, ona tupu a’e ai lea o le Vai. Ona toe tautala lea o Tagaloa i le Papa, ona fanau ai lea o “Tui-te’elagi. Ona fanau ai lea o ‘Ilu; toe fanau Mamao (o le fafine lea); toe fanau le Niuao. Ona toe tautala foi lea o Tagaloa i le Papa-“Mavae ia”-ona fanau ai lea o le Lagi.

Ona toe tautala lea o Tagaloa i le Papa, ona fanau ai lea o Tui-te’e-lagi. Ona fanau ai foi lea o Ilu; toe fanau- o Mamao (o le fafine lea), ona toe tautala foi lea o Tagaloa i le Papa, ona fanau ai lea o Luavai (o le teine) Na tofia la’ua e Tagaloa-Sa-Tuālagi.

Ona toe tautala lea o Tagalo i le Papa ma ua toe fanau ai o le Aoalala (o le tama), ona toe fanau ai lea o le Gao-gao-o-le-Tai; (o le teine). Ona toe fanau ai lea, o le Tagata; toe fanau, o le Agaga, toe fanau, o le Loto; toe fanau o Finagalo; toe fanau o Masalo.

Ona gata ai le o le fanauga a Tagaloa i le Papa, ae na ona opeopea lava i le sami, ua leai se mea e mau ai.Ona fai ai lea o tofiga a Tagaloa ma le Papa, e faapea:- “O Loto ma Agaga ma Finagalo ma Masalo-“ina o ane ia, ia faatasi i totonu o le tagata, ona faatasi ane ai lea- o le mea lea ua atamai ai le tagata.

Na faatasi ane ma le Eleele-ma ua igoa ai o Fatu-ma-le-Eleele, o le ulua’i aiga lea-o Fatu le tane, ma Eleele o le fafine. Ona fai ane lea ia ‘Ilu ma Mamao-“O mai ia, ia faatasi i lugā ma la oulua tama lea o Niuao,” ona o a’e ai lea; ua na o le vanimonimo, ua leai se mea e taunuu i ai le vaai.

A’o Luaao ma Luavai, “O maia, ia lua faa-tagataina  le itu o le Vai. Ae tofia Aoalala ma Gaogaooletai i le Sami-la te faa-tagataina le Sami. Ae tofia Fatu ma Eleele, o i la’ua la te faa-tagataina lenei itu, o le itu tauagavale lea e faafesaga’i ma Tualagi. Ona fai atu lea o Tagaloa ia Tui-te’e-lagi-O maia, inā te’e le lagi.”

Ona te’e lea, ua o’o i luga. Ona pa’ū ifo ai lea, ua na le mafaia. Ona alu lea o Tuiteelagi i le Masoā ma le Teve-ona aumai lea te’e ai-ona mafai ai lea. (Na mua’i tutupu le Masoa ma le Teve, ae mulimuli isi la’au. Ona i ai lea o le Lagi i lugā-ma ua tau i ai le vaai, ae ua leai se mea e taunuu i ai le vaai.

Na o le vanimonimo ua ia Ilu ma Mamao. Ona fanau ai lea o le fanauga a ‘Ilu ma Mamao; ua fanau Ao, toe fanau Po-o le ulua’i aiga lea na tofia e Tagaloa-ina ia fanau- ia au i le Mata-o le- Lagi. Toe fanau Ilu ma Mamao, o le Lagi ua ta’ua o le Ao o le Lagi tualua; ona alu ane lea o Tui-tee-lagi, ua te’e-ua tualua ai Lagi.

Ona nonofo lea o Ilu ma Mamao ma le Lagi-tuatolu-lea ua faa-tagata foi Lagi- e Ilu ma Mamao. Ona toe fanau lea o le Lagi –ai o le Lagi-tua-fa foi lea. Ua alu ane Tui-tee-lagi, e te’e atu a ua faa-tagata foi lea Lagi e Ilu ma Mamao. Ona toe fanau lea o le Lagi; maua ai le Lagi-Tualima.

Ona alu ane lea o Tui-tee-lagi ua te’e, ua faa-tagataina foi lea Lagi-e Ilu ma Mamao. Ona toe fanau foi lea o le Lagi, ai o le Lagituaono lea. Ona alu ane foi lea o Tui-tee-lagi, ua te’e-ona faa-tagataina ai foi lea lagi- e Ilu ma Mamao.

Ona toe fanau foi lea e Ilu ma Mamao o le Lagi, ua ta’ua lea o le Lagituavalu. Ona alu ane lea o Tuite’elagi e te’e lea lagi- ua faa-tagataina foi e Ilu ma Mamao lea Lagi. Ona toe fanau lea o le Lagi-o Lagituaiva; na te’e foi e Tuiteelagi-ona faatagataina ai foi lea e Ilu ma Mamao.

Ua uma le fanau a Ilu ma Mamao-ua o’o lava ia Lagituaiva. Ona nofo lea o Tagaloa-lea ua ta’ua o Tagaloa Faa-tupunuu-ma faatupu e ia o Tagaloa-le-fuli ma Tagaloa-asiasi-nuu ma Tagaloa –tolo-nuu ma Tagaloa Savali; ma Tuli foi Logonoa. (E faaauau pea)