O atunu’u i fafo lava e maua ai manuia

By Aruna Lolani 08 June 2017, 12:00AM

“O le olaga ai nei e faigofie lava,” o lea le manatu o Olegia Fuialo o Falefa. 

O le tamā e 42 tausaga le matua le soifua. 

Na maua le la fa’atalatalanoaga ma le Fofoga o Samoa le aso ananafi ae o lo’o feagai ma le tala fa’auma o apa lona fale. 

“O a’u nei ou te sau mai Falefa, sa matou nonofo muamua i nei ae ua matou o ese atu ma nei ma matou nonofo fa’atasi ma o’u matua i Falesa. 

“Ia o lo’o lelei mea uma i totonu si o matou aiga, o lo’o lelei lava le vai ma le eletise. 

“O a’u foi e to’a ono si a ma fanau, to’a fa o lo’o i Niu Sila o lo’o faigaluega ia. Sa taua e le tamā o fafo lava e maua ai manuia. 

“Ou te le’o fa’apea tau o se isi itu ma ou le fa’atauaina le atina’e  o Samoa ae o lo’u lava ia manatu o fafo lava e maua ai manuia. 

“O le ala foi lena o le ave o le fanau i fafo ina ia maua ai le manuia, aua e lelei totogi toe mafai foi ona fai mai atina’e i aiga ma maua mai ai fa’amanuiaga. 

O lo’o lelei foi si o tatou atunu’u le  nofo peitai o Atunu’u lava i fafo e vave ai ona manuia aiga ma atina’e. 

“Ioe e iai foi avanoa i Samoa ae e umi lava se taimi toa mautu se aiga ona o le tele o mea fai ae le gata foi i lea o totogi ma isi foi fa’alavelave a le aiga. 

“E faigofie lava le olaga i Samoa ae o le itu na e ao lava ona tatou titilo i le lumana’i. 

Sa taua e Olegia o ia se tama galue malosi ma o lo’o silafia lelei a fa’alagolago le tasi i le tasi e le mafai ona maua ai se mealelei pe aoga. 

“O le itu lava ia e faigata ai le olaga o le ola fa’amoemoe ma le fa’alagolago le tasi i le tasi. 

“A paie e faigaluega, ia  lo’o iai popo e  fa’aputu e fa’atau, a taugata foi le pasese e ave ai le maketi ia fa’atau autafa le fale e taulia ai lava. 

“E tele lava auala e maua ai le seleni i nei, pau lava le taimi e fa’alagolago ai le fanau i fafo o fa’alavelave tetele o le aiga.

By Aruna Lolani 08 June 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>