TALA O FAIGA-FAIVA A SAMOA

723 Hits

O le Tala i le Alii Manono

Na alu lona faiva i le vaveao i le ava i le va o Manono ma Samatau. Ona lūlū lea o le pule ta’i-fe’e a le alii i le itu i Manono o lea ava, a’o i ai le isi alii i le itu-ava i Samatau. Ua fai le faiva o le alii na i le ituava o Manono, ua lūlū lana ma’a ta’ife’e; ona aga’i lea i le muā-ava, ae ua te’i le alii ina ua oso a’e le ave e tasi o le fe’e; o se fe’e e matua tele lava.

Ua matua pipi’i le ave o le fe’e i le ulu ma le tino o le alii, ma ua toso i lalo le alii, ae tafea lona vaa. Ua atoa le lua poo le tolu itula o i lalo pea o le sami lea alii ma le fe’e, ona ua taumafai le fe’e e gagali le alii ma nuti pala lona tino.

Ua vaai atu le isi tautai sa i le ituava i sasa’e o opeopea mai le vaa, ona faapea lea o lona manatu-ai lea alii ua ave i lalo o le muāava e se fe’e. Ona alu ane lea o ia i le vaa o lea tautai ma tilotilo i lalō; ma na iloa atu ai lea tautai ma le fe’e o loo i lalō.

Ua oso le alofa o le tautai i lea tautai-ona tago lea o le tautai i lana ‘o’e. Ua tofu o ia i lalo ma tago atu i le ulu o le fe’e, ae oso ane foi le isi ave o le fe’e ta’ai i le tino o le tautai, ae ua faasaga atu le tautai i lana ‘o’e ua fasi ai ma tasele ave o le fe’e.

Ua amata ona matala ave o le fe’e, ae ua matua faasaga lava le tautai e saga tatipi. Ua i’u ina mate le fe’e ma ua ava’e i luga ma faae’e i lona vaa, ae ua vaivai lava le tautai ma ua toeitiiti lava a goto le va’a i le telē o le fe’e. Ua alu lea tautai momoli le isi tautai i Manono, ona ua mafai ona toe faasaoina mai lea fe’e.

O le Tala i le isi Ta’igāfe’e i Siumu a le Alii o Taavao.

O le taeao po lava na alu ai i lona paopao e ta’ife’e; ua lūlū lana ma’a i le ava e ta ai le palolo. O se ava e matua loloto tele. Ua oso mai le fe’e telē lava; ua fusi lea alii ma ave i lalo. O lavalava o lea alii o le titi, ma ua ave lea alii i totonu o se ana.

Ua faanoanoa lea alii ona ua lē so’o lona titi, ae o lea titi ua ave lava e le fe’e i le ana. Ua faanoanoa le alii ua le soo lona titi, ae o le titi na lavalava ai lea alii- sa gaoioi pea ona o le feavea’i e le galu, ma e peiseai o loo ‘ene’ene e ave o le fe’e.

Ae sa faapuna pea lea alii. Ona faalogo atu lea ua tau mamulu ave o le fe’e mai lona tino, ae ua ita lava i le titi. Ua nutipala le titi a ua oso le tamaloa i luga o lona vaa ma sola i uta. Ona nofo lea o le alii o Fitiao ma mafaufau poo le a se togafiti e frasi mate ai lea fe’e.

Ona olo lea o ana ‘o’e (naifi) e lua ma faama’ai ma lona Tao matatolu e tasi. Ua alu o ia i le isi taeao e fasimate le fe’e. Ua le nofo lona vaa i se ‘auava o le ava, a ua nofo lava i totonu o le ava; ua lafo lana ma’a ma lūlū.

Ona vaai atu lea o le alii, ua sau le fe’e. Ua ta’ai faatasi le alii ma lona vaa i ona ‘ave, ona ua le au isi ‘ave i lalo ona o le loloto o le ava, ona tutu’i lea e le alii mata o le fe’e i le Tao, ae tago atu i lana naifi, ua tipi ai le ulu o le fe’e ma ona ‘ave. Ona mate ai lea o le fe’e na fai a goto ai lona va’a. 

O le Masina ma le Tai.

1. Fana’e- o le masina oso. 2.Fana’e-o le sua o le Tai. 3. Fana’eilele-O le masina pe a mavae aso e fa o le masina atoa lea e lamā ai tupa. 4. Fana’etutu’i-O le Tai O’o’o. 5.Fanoeleele-o le oso a’e o le masina a ua mavae le masina atoa.6. Fanolua-ua le vaaia le masina.

7.Fula poo le Tai Fula-o le Tai Pe. 8.Gaseeleele- O le gasetoto o le Masina poo le gasetoto o le La. 9. Li’opfigota-o li’o e si’omia ai le masina.10. Maluapeau-o le taoto mai o le masina I tafailagī. 11. Masalopa-o le Tai pe.

12. Masina poo le Mauli-o le Masina. 13.Masinaataalai-O le masina a ua lua aso ua mavae o le masina atoa.14.Masina Matuatua-O le kuata muamua. 15.Pa’ulaea- o le Tai Pe. 16.Masina Punifaga-Foliga o le masina I luma mai lava o le masina atoa. 17. Tai Susu’e-O le Tai Tutu’i. 18. Taiafiafi-Tai o le Afiafi.

O TAI- O le Tai Fanololo, Taiolefeiti, Taiualā, Taiualao, Taifula, Taigau, Taigulu, Tailelao, Tailelei, Tailoloto, Tailua, Taimaūi, Taimasa, Taipapa’u, Taipe, Taipo, Taisala, Taisua, Taisusu’e, Taitaeao, Taitau, Taitetele, Taitolopa, Taitu ma le Taivale.

© Samoa Observer 2016

Developed by Samoa Observer in Apia