“…a ua ou momoli atu lo’u loto ia Ieova.”

By Petaia Setu 08 May 2016, 12:00AM

(I Samuelu 1: 15)

Ua fai ma ‘alofaaga o le toatele o nisi, ona faaaogaina o le ‘ava poo le uaina, e faamatalaina ai sona le malie poo sona loto tigā. E manatu o se malosi lea poo se auala foi e mafai ai ona faasasao atu ma faamasua uma ai ni ona le mălie i se isi tagata. Ae le o le ala lea na tatala ai le loto mafatia o Hana e pei ona maitauina ai e Eli. ‘A ua faapei o upu a failauga o le atunuu – “Ua ta’utino le solo a le tamaloa, a o a’u le fafine ua tigā le loto, ou te le i inu i se uaina poo se ‘ava, a ua ou momoli atu lo’u loto ia Ieova.”  

Manatu autu: “IA FAAMAONI I LAU TATALO” 

O le tatalo, o le ala sili lea ona faigofie ma tāūa e te talanoa ai i le Atua. E faamatalaina lou fiafia, lou faanoanoa, o ou moomooga, ma lou faamoemoe, e ui lava ina ua loa ona silafia mai e le Atua, a o lou loto o loo tulimata’i  e lona faamaoni.

O se mea tigā tele le mā. Ua oo lava foi ina ogaoga o nisi faalavelave ua alia’e mai ai. E faapea foi la i lagona faa-tinā. E māmā le tautua nofotane, nai lo le mafatia o le fafine ua le fanau. Sisina o le afu i le tautua i le ao ma le po, ae le mātū loimata (i le loto) i le le vaai i se taui (suli) o le ola tautua. Pagā lea, o moomooga le taulau, faanoanoa ai le loto. 

O Hana, o le fafine o loo nofo lua ma Penina ia Elikana. Ua iā Penina o ana fanau tama ma ana fanau teine. A o Hana, o le nofotane ua faasinosinomia, ma ua ulagia.

O le uiga o le igoa o Hana – o le tausaafia. Talofa e, e tausaafia Hana i mea uma i luma o le Atua. Peitai, e le i mafai e lona tausaafia ona punitia lona maasiasi. E le i lilo i lalō lona tigā.

A o le mau a le tusitala, o le pule a le Atua na le fanau ai o ia. Ua tagi le fafine; ua le ‘ai. Ua faamafanafanaina e lana tane. A o le fafine, ua tigā lona loto, ua matamuli ia Penina ma fafine uma, ua ole atu ia Ieova, ma ua tagi tele (f.10).

O lona faamaoni, o loo ua tino mai i lana tagi. E iai le maasiasi; e iai le loto tigā. Peitai o le tagi a Hana, o le faamaoni lea na te faamatalaina le faatuatua o lenei fafine, o loo i totonu o lana tatalo poo lona mana’o.

O le faamaoni, o le elemeni lea o le faatuatua. A leai se faamaoni, e le mafai ona ta’utonuina lou faatuatua. Ana le faamaoni le loto o Aperaamo i le mana’o o le Atua, po ua le ta’utonuina lona faatuatua. 

O le memu o Hana, na sesē ona faauiga e le faifeau (Eli). O le tali a le fafine, ou te le onā; ou te le i inu i se uaina poo se ‘ava. 

A o lana tagi, na faailo atu ai ia Eli le faamaoni o lona loto i lona Atua, “…a ua ou momoli atu lo’u loto ia Ieova.”

Samoa, e lolōto le tatalo a Hana! O le faanaunauga ua tuu tasi i le Atua, i le faamoemoe e tasi, a maua – e toe foi i le Atua (f.11). O le faamaoni lea o le tautoga, o loo ua fai nei lava ma lagi soifua o le tatalo a Hana, i lea tupulaga ma lea tupulaga. 

O lana tatalo, o lona ola lea. O le ola ua tuu i lona lima, e auauna ma tali mălie ai le pule faasoa a le Atua, ma toe ofo alofa ma fai taulaga atu ai i le Atua, o lē e pule aoao i le lagi ma le lalolagi; o lē na te faamasinoina lau tatalo; na te faasoa i le itu aso e finagalo ai; e faamaoni i lona lava finagalo; o le Atua e tausi mavaega i lau tautoga.

Ua iloa lelei e Hana e pule aoao le Atua. Manatua, o mea uma e pule ai le Atua, e tautalatala i le silisili ese o le Atua; e molimau i lona mamalu (Salamo. 145:3-7).

A o le tagata, o le tagata galue, finau, tauivi; auā e faaosoosoina, e lu’itauina, e tofotofoina i aso uma. O le ata lena o le tatalo a Hana – e finau, tauivi, e pei foi o le tatalo a le perofeta o Elisaia, e galue (II Tupu. 4:34).

O lona uiga, e mai le Atua ona lē fanau – ae mai le fafine ona ola finau (tatalo).

‘A faapea uma ō tatou fafine – oka se manaia o Samoa! E le toe faitala i ni mea leaga, ae tautalatala i le faaolataga. E le toe laulaufaiva faatupu oti, a o le gutu e memumemu i le upu moni ma tautalatala i le talalelei o le olioli. Semanu e le toe vevesi aiga ma ekalesia, ae soifua fealofani ma tapua’i saoloto tagata uma ma le fiafia.

Samoa, na o le tatalo tatou te fesilafa’i ai ma le Atua. Ae ou te ta’utino atu ma le faamaoni, e le o tatalo uma e faafofogaina e le Atua (Iakopo. 4:3; Faataoto. 28:9; Iakopo 1:5-7; Luka. 18:11,12,14).

O le isi lea vaaiga i Aso Sa. Ua faatuatuai tagata i le lotu seia uma le tatalo. Afai ua ila le faalogo a tagata, fiu i punou , gase e tootuli, lelava nofo i le umi o lau tatalo – se ā lona uiga? Fai mai Iesu – ‘Aua le tautū i upu o le tatalo; e le o le tele o upu e talia ai (Mat. 6:5-8). Fai mai le isi loomatua – short and sweet, ‘ia itiiti au upu’ (Failauga. 5:2). O le tautū o loo ta’ua e Iesu – o le faamamapo, teu lumāfale; o fausaga na o tatalo a le au faresaio. ‘Aua le taamilomilo, auā ua silafia e le Atua, e susua au upu, ae maaa lau amio; e suamalie lou leo, ae oti ia te oe agaga o tagata. Fai mai Solomona, afai e te le faalogo i le Atua ma tausi ana poloaiga, e inosia e ia lau tatalo (Faat. 28:9). O manatua le tatalo a le telona (Luk. 18:13)? Manatua le tatalo a Iopu? Manatua le tatalo a le pagota i luga o le satauro? O ‘e maitau maia le tatalo a Hana? Ta’u sa’o i le Atua. ‘Aua le faainuinu le tatalo e le o se tulafale o loo e tatalo iai. Tatalo ma le loto faatuatua; ‘aua le masalosalo , auā e le aumaia ai e le Atua se mea e tasi i lou mana’o (Iakopo. 1:7).

E tāūa le ola tatalo; ae sili ona tāūa lou faamaoni i lau tatalo. E le o le faavasegaina o vaega o le tatalo, poo le tau faapaleniina o vaega ole tatalo – LEAI. E le o oe poo a’u o loo tatalo iai tagata – a o le Atua, o lē na te silafia loto o tagata uma. Ua tuanai atu matagi ma afa o lenei vaitau o le tausaga; ae o loo feagia’i solo pea matagaivale ma afa i loto o tagata. O la tatou malaga i lenei tausaga, teu le va o oe ma le Atua. Ta’ u sa’o i le Atua lou tagata; e le o lilo foi i le Atua lo’u loto. Ave le mea e aoga i le malaga. Se mea e fiafia iai le Atua.

Ua uma ona momoli mai e le Atua lona faamaoni mo tatou Samoa – ua uma! O luga o le satauro! 

O le a faapefea nei a’u ma le Atua?

Ae faapefea ona momoli atu lou loto ia Ieova?

 Amene.

Petaia Setu

7737063

By Petaia Setu 08 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>