Tina o le Aso o Tina

By Fa’aliliu e Maiava 08 May 2016, 12:00AM

Toe mafaufau tasi lava…Na matua tete’e le tina o Anna Jarvis ma finau, pe ‘aisea ua fai ai fa’apisinisi le Aso Fa’apitoa o Tina. Fai mai a ia: “O le Aso o Tina, e matua leai se so’otaga ma ni lole...

Aunoa fo’i ni fa’amanuia e fa’atau mai fale’oloa, ae aisea e te le tusia ai lava e ‘Oe ni au ‘upu, mo le tina e aupito tele atu lona sao mo ‘Oe nai lo ‘upu a le isi tagata? ‘Ave tina i se fale’aiga e fafaga lelei ai i se afiafi… pe ‘ave fo’i iai  se mea e aoga ma umi.

Atonu o lo’o ia mo’omia se va’aiga (tioata) fou,  po’o se moega e aupito manaia ai lana moe.”   

A iai se tasi e fa’aali sona lē-fiafia i le mau tupe fa’aalu ma faiga fa’aPisinisi mo le Aso o Tina, o le tama’ita’i lea o Anna Jarvis. Aisea? Ona o le Aso o Tina, o lona mafaufau na amatā lenei aso ua fa’ailogaina nei. E 42 tausaga o Anna ae maliu lona tina, i le Aso Sa lona lua o Me i le 1906. Ona mana’o lea ia fa’amanatu ma fa’atāuaina lona tina ma tina uma, i tausaga ta’itasi. 

Sa na tāpenā le ulua’i sauniga fa’aleLotu mo le Aso o Tina, i le Aso 10 o Me 1908, i le malumalu i Grafton, West Virginia, le falesa sa galue ai lona tina, o se faia’oga Aso Sa. 

Sa fa’aauau pea ona fa’atino le galuega lea a Anna e fa’alauiloaina ai ona mafaufauga ia, i so’o se nofoaga. I nai tausaga i luma atu, na sainia ai e Peresetene Woodrow Wilson, se poloa’iga mai le Konekelesi a le Iunaite Setete a Amerika, e avea ai le Aso Sa lona lua o le masina o Me, e aloa’ia, o le Aso o Tina – lea tatou te fa’amanatu e o’o mai i aso nei. 

E o’o ane i le taimi ua 50 ai ona tausaga, o lo’o talitonu pea Anna, e le o fa’amalieina le fa’amoemoe ‘autu o le Aso o Tina. Ona tu’ua loa lea o lana galuega ae ‘ave uma lona taimi - le isi 34 tausaga, alu uma ai ma ana tupe - e fa’atosina ai i se finauga, e tete’e ai i le sa’ilia o tupe-mamā ma faiga fa’aPisinisi mo lea aso, le aso sa na amatā, e fa’amanatu ai ma ‘ave lana fa’aeaea i galuega fa’aTina. 

E uma ane - ua ‘olomatua Anna ma vaivai, ua le mafai ona toe tautala, a ua leai fo’i sana tupe o totoe. Ua logonoa ma taulagi, ona ‘ave ai lea i se maota-gasegase e nofo ma tausia lelei ai, se’ia i’u lona soifua i le 84 o ona tausaga.

O le tala i le tama’ita’i na amatā le Aso o Tina, e mata’utia ma ofoofogia – ‘auā e le’i fa’aipoipo lava, ae sa avea o se tina. Sa ositaulaga e tu’u atu uma ona avanoa lelei, i feiloa’iga, o feso’ota’iga ma talanoaga, ina ia tatou manatua lelei ai le fa’amoemoe ‘autu ma le uiga o le Aso o Tina. 

Ae a lenei aso, ae le tatalo i Le na avatua lou tina mo ‘Oe, ina ia totō i lou fatu Lona Alofa le-fa’atua’oia. Ona mafai ai lea ona e alofa fa’amaoni ma fa’aaloalogia lou tina i le ala e finagalo iai Le Atua – i aso uma o le tausaga. Toe mafaufau tasi lava…

By Fa’aliliu e Maiava 08 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>