SE’I O TATOU TALANOA

08 May 2016, 12:00AM

O le  Pologa o Samoa-e le afua mai le Atua-a’o tatou Ta’ita’i

O le viiga o le Atua-e le mafai ona faaitiitia-aua o lenei ua tatou aulia mai i le manuia lenei vaiaso fou. E talitonu foi, e moni lava e lililo faiva o Fiti e pei o le upu a le atunuu-ae o le lumana’i lava ia o Samoa-o loo i aao o le Atua. 

O le mea lea-a’o tatou faasaga atu i le tatou faiga-malaga i lenei tausaga umi-e ao ina tatou tofu maua le lototele ma le faatoatoa, faamoemoe i le Atua i mea uma lava. Ia-o lenei ua tatou toe aulia manuia mai –le Aso Faapitoa o Tina uma o Samoa i lenei tausaga-ma o se tausaga foi e foliga mai-o se tausaga o le anoano o fuafuaga a le atunuu ma le Malo e pei ona masani ai. 

O lea foi ua mae’a le Faiga-Palota Lautele a le atunuu-e saili ai se faiga-malo-na te faatautaia le Sa o Samoa mo lenei lima tausaga-ma o lea ua faa-taumua-ava atu nei- i le vasa loloa o fesuiaiga tetele ma lu’itau-aemaise ai le ogaoga o suiga o le Tau-e faaono aafia ai Samoa i le lumana’i. 

O upu e masani ai Samoa i taimi faapenei-aemaise ai lava pe a foufou si’i se faiva-a ‘tapua’ia-e manuia! A mafa-totoga i faamanuiaga-e le pine ona a’e malo. Samoa-o lea ua tatou vaaia nei le lauamanu ua alu ane e tuli tatao le inafo o le tai loloto-le mafua i magoto ae le’i pa’i sami lo ta va’a. 

Ae ia manatua-ma ia ‘aua lava ne’i galo-tapena lelei lo ta vaa ma ia faaluaina lo ta malosi ne’i ta’a faali’i le mafua-ae ta te le’i o’o i ai, ona ua manumalo le galu ma le au ia te oe ma a’u.

Atonu Samoa ua lasi i lau faafofoga le mau a le malo ua pagatia le atunuu ona galuega a le Silisili Ese. Talofa e Samoa-ua tafitafia lou tamaoaiga faa-natura ona o Afā malolosi. Ou te le toe fai atu se upu aua o ia mea- ua uma ona tutupu-a’o silasila toto’a i ai le atunuu. Ae o la’u fesili-e te talitonu i lea faaupuga? E te talitonu o le pologa lea e pologa ai  nei le atunuu- e pogai mai ona o Afā malolosi ua mavae atu ma le Suiga o le Tau? Samoa –ou te le faatonuina oe-ae o a’u lava ia-e puupuu lava la’u tali. O la’u tali-ou te le mafai-le mafai ona ‘ou tuua’ia le Atua-pe afai ua pologa le atunuu. Afai ou te tuua’ia lea faaletonu i Afā fulifaō-o le tuua’ia lava lea o le Atua. 

O le mea lea ou te matua talitonu ai-‘aua le tuua’ia fua galuega a le Silisili Ese-leaga e le na o Samoa na mafatia i afā fulifaō. A tatou vaai ia Fiti ma le anoano o afā i le tausaga e tasi. Ua tupu i atunuu uma o le lalolagi ia mala-faapea foi ma lologa, malūlū ma isi faalavelave faale-natura. Afai la o lea, o lona uiga, e le o se Atua-e finagalo ia pologa Samoa-leaga o la e sili ona mafatia isi atunuu i fafo i faalavelave faigata. Afai foi e faapea mai se tasi, e lelei atunuu i fafo e lava ma totoe o latou tamaoaiga-ua lelei lea. 

Ae ia  manatua fo’i-o atunuu foi nei sa auina mai a latou fesoasoani ia Samoa e ui mai lo tatou Malo. A silasila foi i le moni o le mau e uiga i le pologa ua i ai nei Samoa-e le’i afua mai ia Ofa, Valelia ma Amosa talu ai nei-aua sa tatou vaai uma lava i le faagasologa o ia mea mata’utia.E ui la ina olo pala mea taumafa ma meatotino-ae sa tele pea taumafa  totonu o le atunuu. E le’i atoa se fa masina a ua toe ola lelei meatoto. 

E iva ane masina-a ua toe foi le atunu i le tulaga lelei sa i ai muamua. Ou te matua talitonu to’atasi Samoa-ua ala ona pologa le atunuu-ona o faiga a Ta’ita’i. A tatou tilotilo i faiga pi’opi’o a le faigamalo lea na maumau ai le faitau miliona ma miliona o tupe a le atunuu-e faapefea la ona tuua’i i galuega mata’utia a le Silisili Ese le mativa o le atunuu? 

O le fesili taua la-o ai e tatau ona gafa ma le faatinoina o le amiotonu ma le faamasinoga i lenei mataupu? Afai o taofiofi pea e le Malo-ia outou silafia la Samoa-o le atunuu e ou le Malo-ae le o se vaega faa-upufai! 

Afai la ua le mafai e le faigamalo ona fai le amiotonu ma le faamasinoga-o le fesili-o ai la na te faia? Ia manatua lelei la-o le umi ona faataatia lenei mataupu e aunoa ma le sailia o le amiotonu ma le faamasinoga-e mafai ona avea ma faatupu mala i le atunuu-ma faafaupu’e ai malala ola i luga o ulu o tupulaga lalovaoa o Samoa. Afai la ua saputu mai mala i le atunuu-e le o ni mala mai le Atua-a’o mala mai tagata faatautala ma le fiapule to’atasi i le tofi o le atunuu mai le Atua! 

Ia e manatua la Samoa “Suli o le Tautuana”na masa’a o latou toto i le sailiga o lou Malo Tuto’atasi. Ia manuia tele le Aso Sa Samoa ma ia faamanuia atu le Atua!

08 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>