O LA’U TALA FO’I

227 Hits

1. Matauina i Tala Fou o lea ua faamaonia mai e le Palemia e faapea o Tuuga Fautasi lea sa masani ona faatino talu mai le faamanatuina o le Tuto’atai muamua o Samoa i le 1962-o le a le toe faia! O lona uiga-e le toe faatinoina lea vaega masani o le faamanatuina o le Malo Tuto’atasi o le atunuu!

O le mafuaga e pei ona faaalia- fai mai ua le o toe fiafia i ai ‘auvaa o ia fautasi! O le fesili la-“sa auai nuu uma o le atunuu i lea tuuga talu mai le Tuto’atasi muamua? Aisea o le a faamalosia ai le auai o ni fautasi se tele pe afai e le’i auai nuu uma o le atunuu poo ni fautasi se tele mai le amataga?

E pau lava vaa sa masani ona auai mai le amataga o le ‘Oti mai Sauano Fagaloa ma isi fautasi mai Manono! O lona uiga la-sa le faatauaina le numera o fautasi e auai- a’o le taua o lea fa’agā-tama i le faamanatuina faale-aganuu o le Malo Tuto’atasi o le atunuu-ma sa lelei foi ona taui le tautiga o ‘auva’a uma sa auai mai le amataga!

Afai la o le a leai se tuuga fautasi-ae o se tasi lea o vaega o le Tutoatasi sa mafua ai ona tumutumu le atunuu-o le a la le pogai e faamanatu toa’i ai? A ua leai ni tupe mo ‘auvaa ona ta’u sa’o mai lea! Afai la ua leai se Maota Fono Tuai-tala i lalo ma le Maota Fono talu ai nei-o a la mea o le a faamanatu?

Afai la e le o faatauaina Ta’ita’i o le Atunuu na tauasaina mai le sailiga o le Malo Tuto’atasi o Samoa-e manaia la ona tuu uma loa mea e tatau ona faamanatu-ae faamanatu loa na o le HRPP pe a ua leai ni tupe e faa-meaalofa mo auvaa! O le a sou taofi?

2. Matauina i Tala Fou o lea ua maua e Leoleo tamaiti a’oga o Avele ia na faia faasalalauga i luga o le Facebook ma ua taofia e Leoleo i le taimi nei. O lea faasalalauga i luga o le Facebook- na mafua ai ona fai le faaiuga a le Malo e tapuni le tumau lea a’oga- e faatali ai suesuega a Leoleo.

Fai mai e to’afa ni tamaiti a’oga o Avele ua molia i le faaaogaina o ia ala o fesootaiga e osofa’i ai isi aoga ma o latou tamaiti a’oga. O ia la tamaiti a’oga o Avele na pu’e e Leoleo i le Aso Gafua 02 o Me ma o loo taofia pea e Leoleo-ma o ia alii e 17 ma le 19 tausaga le matutua-o le a tula’i i luma o le Faamasinoga i le aso 17 o Me 2016.

Ia-o se tala uiga ese lea i Samoa nei-ona o ni fuafuaga na fai e ni tamaiti a’oga-ma o lea ua aliali mai-o le ‘au-faatupu faalavelave lea i le lumana’i-aua o lea ua latou maua uma faiga faatupu faalavelave a le ISIS. O le a sou taofi? 

3. Matauina ma le fiafia le faamanatuina o le 25 tausaga- talu ona faatu le Yazaki Samoa-lea e pei ona silafia- o loo maua ai galuega mo le to’atele o tatou tagata. O la matau atu la i lea sauniga-sa auai le Palemia o Tuilaepa Sailele Malielegaoi ma Minisita Sinia o le Kapeneta i le nofoaga o le Yazaki i Vaitele.

Fai mai na faafetaia foi e le Palemia le Yazaki-ona o le aumai o le latou Faalapotopotoga ma faatu i Samoa nei. Sa auai foi ma alii na faavaeina le Yazaki Samoa Eds-o Fe’esago George Fepulea’i, Afoa Vaai Kolone ma Tuala Farani Chan Tung!

Afai la ua aumai lenei kamupani i Samoa nei ma ua maua ai le tele o galuega a tagata o le atunuu-aisea ua le mafai ai e le Malo ona aumai nisi kamupani faapenei-mo le lalolagi o tupulaga talavou ia –ua na o le i’u mai a’oga-ona nofonofo lea i aiga- ona o le leai o ni galuega!

Afai la ua mafai e ia alii Samoa e to’atolu ona aumai le Yazaki i Samoa nei-aisea ua le mafai ai e le Malo ona fai se mea faapena? O le le kea i tagata matitiva o le atunuu e mafua ai- pe ona o le mea masani lava? O le a sou taofi?

© Samoa Observer 2016

Developed by Samoa Observer in Apia