Lauga - O LE MANA O LE TOETU [“E le o iinei”]

Tusia Rev. Petaia Setu ,

100 Hits

Rev. Petaia Setu

Rev. Petaia Setu

E le siligia le usu i le tuugamau. O le usu e talitonu i le natura masani o mea. O le usu ma le faamoemoe mautinoa. E leai se poto na te toe sui le faasinomaga o mea ua uma ona faataoto i le pule a le Atua o le lagi ma le lalolagi. O le oti lava ia, o le tuugamau lona faavavau. Peitai le tala nei ma le leo mai totonu o le tuugamau, “E le o iinei” Auoi! Afai e leai, o fea la le isi mea e su’e iai le oti pe a le o i le tuugamau?

O le tala ofoofogia lea ua le gata ina galulu uma ai le lalolagi, fememea’i ai le toa sefulu ma le tasi, a ua fatu tala ai suli o Satani. O le ofoofogia, e le o iinei. O le fememea’i, “o fea ua e tuuina ai o ia?” (Ioa.20:15). O tala fatu, ua gaoi e le au soo (Mata.28:13).

A o le talalelei ma le moni, e le sailia i le mea o iai tagata oti Le ua soifua pea e faavavau (Luk.24:5). Ua moni a le agelu, e le o iinei. Muamua, e sese le nofoaga ua saili iai. Ua uma ona faailoa e Iesu i ona soo, e tatau ona alu o ia  i Ierusalema…e fasiotia foi o ia, ae toe tu i le aso tolu (Mata.16:21).

E le maua la i le tuugamau. E le o iinei. O iinei, o le tuugamau. O le nofoaga o tagata oti. E pala iai ivi ma ie o le lalolagi. E le toe iloa ai se malamalama. E nanamu ai i leaga o le lalolagi. E le o se nofoaga la lea o le Ola (Sal.16:10). Lua, ua taoto i paga le Tofa Foafoa. Ua maioio galuega taitasi o le foafoaga, o le mea ma lona natura.

A o le Atua, e pule aoao ia i mea uma. Ua manatu fafine i le natura  masani o mea, ae ua galo le faapogai o mea. E liua mea uma e le Mana o le Toetu. Ua fetalai  mai le Alii o le Toetu, “ou te faia ia fou mea uma” Faaali.21:5). Le mana lea, ua na aveesea le Alii o le Ola mai le pule a le tuugamau. Ua le mafai ai e le tuugamau ona taofiofimamau. Ua ge. Ua na o se nofoaga faasau!

Samoa, o tuugamau uma e ’ainā. E leai se tuugamau e tu faaatigi; auā e fale iai ponaivi. Ua loa ona valo’ia e Tavita, “e te le tuua a’u  i le tuugamau”; o lona uiga, e le o se faavavau lea o le Alii. “e te le tuu atu lou tagata paia ia oo iai le pala.”Ua le o lea lona mutaaga. (Sal.16:10). O le Alii, o le Alii ia o le Toetu. O le Mana o le Toetu, e aveesea ai o ia mai la lea nofoaga. Auā e moni lava; ua le oo ia te ia le pala. O lona tino, o le Tino Ola. O le Tino Saoloto. O le Tino Tu. O le Tino Faaola.

O lona tino, e le o iinei. Vaai siaula poo sa’o le nofoaga o su’e iai lou lumana’i! Se i faauta lelei poo agatonu lau sailiga mo le ola lelei ma le manuia o lou aiga ma lau fanau. Atonu ua e iloa le natura masani o mea taitasi. Ae o loo e soona masau le malamalama lava i le finagalo o lo tatou Tama o i le lagi. Ua uma ona faailoa atu e le Atua ia te oe e faapea ma faapea. Ae o loo e tautu pea lava i a tatou aga ma tu faavalevalea.

Samoa, ua silia ma le lua afe tausaga le tali lea a le agelu. Ua leva ona sau Iesu i fafo ma le tuugamau. Fai mai le agelu, e le o iinei. Ae le taumate oe o loo e alu lava i le tuugamau i aso uma. O loo e faaopeaopea lava pea i le pouliuli i aso uma, a ea? O le isi na e e fealua’i lava ma lona tuugamau. Ua fiafia lava e ola i mea sese ma mea valea. Ua fefe e pupula i le malamalama o le amiotonu ma le mea moni. Ua masani lava i le nanamu o tagata oti. E te fiafia iai? ’Aua le vaai lata mai.

A ia tuu tuu i le loloto. Ia sa’o le sini poo le pine e taula’i iai ou faiva. Fai mai le agelu, Se a le mea tou te saili ai le ua soifua i e ua oti? E sesē le sailiga. E vale le taula’iga. Ia e mautinoa, e soifua pea le Atua e faavavau. E le iuvale se faamoemoe ua tapena e le Atua. O lana Tofa, o le Ao ae le o le Po. E le o iinei. E le i afio mai Iesu e nofonofo iinei i le pogisa. O le Alii ia ole Malamalama. O le Malamalama ia o le Ola. O le Ola ia o e talitonu ma faatuatua i le Mana o le Toetu.

O le mau a le agelu, o le mau ta mau. O le mau faaauau. O le mau faavavau. E le o iinei. O le tali mautinoa. O le gagana e mamana. O le mau fagufagu (Mata.16:21). A o le mau e gagana; e pei ona  valaauina e agelu, O mai ina matamata i le mea  na tuu ai le Alii (Mata.28:6). E le o iinei; a o pine ia. O ie na tanuma’i ai ua tuu, ma le solosolo sa i lona ao, e le i tuu faatasi, a ua tuu ese, ma taataai i le tasi mea (Ioa.20:6,7). E manino lelei, e le o iinei o ia, na o ie ma le solosolo o loo taatitia.

Samoa, o le toe tu o Lasalo na sau i fafo o loo taataai pea lona tino ma lona ulu i ie e teu ai le tagata o le tuugamau. Auā foi e toe foi lava i le tuugamau le tagata ma faavavau  o le tuugamau. E te fiu e faafetefete  lou poto ma au mea e tele o le lalolagi nei, e ‘ai e le tuugamau. O le tuugamau lona faavavau. E le avea i le lagi. Fai mai le agelu, O mai e matamata; o lea lava e taatitia iinei a outou mea.

O lea ua faavasega lelei i le itu lea au sailiga faale tagata. A o Iesu, le Alii o le Ola, e le o iinei. Ua leai! Ua i fafo i le malamalama. Ua toe tu o ia. Ua toe tu i le tu mamā; tu pa’ia; tu e aloa’ia. i lona tino paia, tino mamā, tino pupula. Le tino e ifo iai le oti ma le tuugamau. Ua fefe ai Satani ma ana ‘au.

A o oe Samoa, na e iloa ua tuua le tuugamau, o le tuugamau avanoa? Na e faalogo ua magaegae ma ’opū, i le Mana o le Toetu? Poo e silafia ua leva ona leai Iesu ma le tuugamau? Se a sou taofi? Ni mea faalanu? Na gaoia le Moni? Pe na o ni tala e lelea i le matagi? O iai ni fua o le Toetu o Iesu i lou olaga? 

Uso e, Samoa ma outou uma o faitau ma faalogo i lenei feau, O mai ina matamata. Matamata i le Faamaoni o le Atua. Matamata i le Alofa o le Atua. O lona Faamaoni ua ia suia ai le natura o le tuugamau i lona soifua pea e faavavau. O lona Alofa ua ia le tuua ai oe ma a’u e faavavau i le pogisa o le tuugamau, a ua laga’ia e le Malamalama ina ia tatou iloa atu le Ola e Faavavau. 

Afai ua fai mai le agelu, e le o iinei, ua tatau. Ma ua tatau foi ona e talia ma talitonu iai. Ae sili atu ona tatau ona e malamalama ma savali ai, ma ola ai i se olaga fou o le toefuataiina. Olaga fou, Suiga fou, Mea fou. Auā o le finagalo manino lea o lo tatou Alii. Na te faia ia fou mea uma. Ioe, ina ia fai pea oe ma tagata fou. Le tagata ua tuu le nasu o le lalolagi, ae sau i fafo i le Malamalama o le Ola Fou. E fou ai mafutaga, ma maua ai pea Mafanafana. 

Uso, afai ua le maua Iesu i le tuugamau, ai lava se manaia  pe a maua sa’o atu ia te oe ma lou olaga, ua fai mou faavavau, a ea?

Amene.

7737063


© Samoa Observer 2016

Developed by Samoa Observer in Apia