O LA’U TALA FO’I

349 Hits

1. Matauina I Tala Fou le fesiligia e le toatele o le tamaitai o Toaipuapuaga Opapoo e tusa ai ma le mea na o’o ia te ia-e pei o faailoga o manu’a I ona lima –aemaise ai o mea na ia ta’ua e faapea na vaai tini I ai-aemaise ai o le si’ufofoga na faalogo ai.

O le mea la ua le malamalama ai-afai e na o lea tama’ita’I na tupu ai lea tulaga-ma faalogo I lea si’ufofoga-o le a le pogai o le saga fesiligia pea? O le a le ituaiga o faamaoniga lena o loo mana’omia-ae mana’omia mo ai?

E ofo le loto pe afai ua leva ona I Samoa nei le Tala Lelei-ae o lenei lava e tuufesili! Afai e na o lea tamaitai na o’o I ai le faaaliga-e noatia foi o ia pe afai na te ta’u fua le suafa o le Alii I se mea e le moni!

E a la pe a tuu pe I le Atua na te faamasinoina lea tama’ita’I ua na faia se tala pepelo? O ai na tofia tatou e fai ma faamasino o lenei tamaitai e tusa ai ma le mea na tupu ia te ia?

Afai o mana’omia e I latou o tuufesili nei pea I lenei mataupu se faamaoniga-ia outou manatua la- e ese lava auala a le Atua e faailoa mai ai lona finagalo ma e le faauiloaina foi faalaua’itele e pei ona fai e le tagata.

Ia manatua foi na soifua mai Iesu o le alo o le ATua ae le talitonu I ai tagata, fai vavega e le talitonu lava! Maliu ma Toe Tu-e le talitonu lava tagata e o’o mai I le taimi nei!

O le tuu-a-lalo I lea tama’itai o fesiligia nei-soia ona e amana’ia tagata e le talitonu-tausi pea oe I le si’ufofoga na e faalogo ai-ma e mulimuli ai pea! O le a sou taofi? 

2. Matauina I le Televise ma Tala Fou le tele o fuafuaga a le Matagaluega o Turisi mo le faamoemoe ina ia siitia le aofai o tagata tafafao mai fafo-e mafai ona faatosina mai I Samoa nei!.

O lea la fuafuaga e pei ona matauina- sa ta’imua ai le MInisita o Turisi-ma o ia fuafuaga uma-o ni mea ia ua leva ona tatau ona fai! Aisea? Afai o Samoa o le Penina o le Pasefika-o lona uiga tatou te le o faaaogaina lea tulaga o Samoa –e faatosina mai ai tagata tafafao.

O lona uiga- e leai ni fuafuaga mamao ua faatinoina mo ia fuafuaga.  Afai la o Samoa o le Penina o le Pasefika-o iina e tatau ona fai ma ta’iala o fuafuaga uma a Samoa.

O lea ua I ai fale talimalo tetele I Samoa nei-ae ia manatua foi- e le taitai ona paga ma fale talimalo o I fafo.

Ae a faapefea la ona fai? Ia tali a tatou malo mai fafo e tusa ai ma le aganuu ma le faa-Samoa-aua o le pogai lena ua taua ai Samoa o le penina- e ala ona penina- ona e uiga ese lava lana aganuu-e le maua I se isi lava nofoaga o le lalolagi!

Afai la o se faatosina lena mo turisi-aisea ua le tapena ai loa le Matagalueg mo se fuafuaga faapena?

O le a le mea e fai I le Eleele Fou-ae le fai ai sina atu-falega-ma ni tunoa-a taunuu mai turisi mai fafo- o le nofoaga lena e muamua ona tofo ai I le aganuu a Samoa-a uma le ‘ava o le feiloa’iga- soso’o ma fono o le ‘ava-a uma lena ona malolo lea pe malaga I soo se vaega o Samoa-a ua uma ona tofo I le faiga a Samoa e tali ai ana malo ma tagata eseese.

© Samoa Observer 2016

Developed by Samoa Observer in Apia