O la’u tala fo’i

08 March 2016, 12:00AM

1. Ua toe ta’ua foi  i Tala Fou nisi foi o Faipule tuai ma Minisita ua toe filifilia mai e o latou itumalo.

O lona uiga la-ua mavae le isi lima tausaga talu ai-ia ma isi tausagaiI luma atu-ae o lenei foi ua toe filifilia foi e o latou lava itumalo e pei ona faaalia i le faaiuga o le Faiga-Palota Tele talu ai nei - E le o se mea fou la le toe fai o nisi folafolaga mo lenei 5 tausaga e pei ona fai i le 5 tausaga talu ai ma le tele o isi lava tausaga ua mavae.

Pe o mafai la ona faatino na fuafuaga ma fuafuaga fou ia ua toe folafola mai nei-o le matafaioi lava lea a le itumalo.

Ia manatua la- afai sa manuia ai le itumalo i le 5 tausaga ua alu e tusa ai ma na folafolagla- e tatau foi la ona toe manuia ai le itumalo i folafolaga fou ua tuuina atu! Ae afai lava e le o manuia ai le itumalo-o lona uiga- e toe inu lava i ai le itumalo- e tusa ai ma lana filifiliga ua fai nei.

Ae ui o lea- e lelei ona se’i o tatou mata’itu pea-ma e le oge auala le Atua i faiga e sili ona lelei-e manuia ai tagata uma o le atunuu!

Afai la e pei ona talitonu le toatele e leai se manuia o tatou maua mai le faiga-malo-o lo tatou tiute la-o lo tatou faasaga lea e gagau le vao-ma faaaoga eleele uma ua aumai e le Atua mo tatou-ona leai lava lea o se mea tatou te toe faamoemoe ai fua i le Malo-pe afai e le o maua ai so tatou manuia- ae tatou tagi  i o tatou lava lima ma le faamoemoe i le Atua-ona leai lava lea o se mea tatou te popole ai!

Tatou faasaga e fafaga moa ma fai lafu pua’a-fai pa-povi! Afai ua le toe aveina e le Malo a tatou faaeleeleaga i fafo-tatou taumafai e ave i Tutuila ma soo se nuu e manaomia a tatou oloa! O le a sou taofi? 

2. Matauina foi i le taunuuga o le Faiga-Palota a le atunuu le toatele o sui talenia ma le atamamai-sa galulue ma tautua i le atunuu lautele mo tausaga e tele-ma e le taumate-o i latou ia o loo malamalama lelei i le mativa ma le tulaga pagatia ua i ai nei le atunuu.

O le talitonuga la-o i latou tonu lava ia e mafai ona matua tula’i mai e fai se suiga lelei i totonu o le atunuu- e le gata i le tulaga tau a’oa’oga, a’o le tulaga tau le soifua maloloina ma isi.

E mafai foi ona matua tele so latou sao i le taofia o faiga pi’opi’o a le faigamalo, aemaise ai o taupulepulega leaga a tagata faigaluega o le Malo-ia ua maumau ai le faitau miliona ma miliona o tupe a le atunuu ua maumau.

O le suiga moni la e tatau ona faamuamua e sui faipule fou ua tulai mai- “o le tuuina atu lea o lenei mataupu tau faiga pi’opi’o a le faiga-malo i le Faamasinoga- e sailia ai le amiotonu ma le faamasinoga. O le upu moni- e faatoa mafai ona manuia Samoa- pe a uma ona faatino le amiotonu ma le faamasinoga i faiga pi’opi’o a le faigamalo o loo i ai nei.

O le pogai la e tatau ai ona faamuamua lea mataupu- ia ta’u atu ai e avea ma molimau i le atunuu atoa-o le faigamalo-ua na o se tausimea-ae o Samoa poo le atunuu atoa-e ou le Malo! E le tagata i lea-o le tausisia foi lea o faiga faavae faa-temokalasi –“E leai se tasi e i luga atu o le Tulafono” O le a la sou taofi? 

3. Matauina ma le faanoanoa tele le tulaga ua i ai nei le Ta’ito’afitu a le Manu Samoa. O le itu e faanoanoa ai- o le matua leai lava lea o se suiga mo le lelei o aliali mai. O taimi uma e o ai i luga o le malae-e foliga mai e matua leai lava ni a latou tapenaga na fai.

E fa’i o le sesela ma e le lava le malosi- ae le o malamalama tagata uma o le ‘au i gaoioiga ia o le a fai i lea taimi ma lea taimi o le taaloga! Matou te le o fai atu la e leagai-ona e le iloa taaalo; ae o le faalavelave-o le matua leai lava o se vaaiga e iloa ai –sa fai se latou tapenaga poo ni sauniuniga. O le fesili la-o ai ‘ea le faia’oga moni o lenei ‘Au Ta’ito’afitu?

O le tulaga e pei ona aliali mai- o lea ua Faia’oga le Papalagi-ae o le fesili-faamata o malamalama  tama taalo i faatonuga ma le mea tonu e manaomia e le faia’oga? A toe tilotilo la i tua-peiseai e leai lava se Taito’afitu a Samoa e pei o le Taitoafitu lea sa auai Alafoti, Simaika ma isi! O le tulaga mata’utia o lea Taitoafitu-ona pau lava lenei o le Taitoafitu a Samoa na o’o ai Samoa i le tumutumu o le Lalolagi! Aisea? Leaga o le ‘au sa kolenei faa-Samoa ma e loto Samoa uma! O le a la le taunuuga na o’o i ai? Na matua o’o lava Samoa i tululu’iga uma o le lalolagi.

A tu’u atu i le Sefululima i le taimi nei-oti; tu’u atu i le Taito’afitu- oti! O le fautuaga la-afai ua le mafai ona faatino e pei ona sau a’i- e manaia la ona avatu ni tama’ita’i latou te faatinoina! O le a sou taofi?

08 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>