O LE MAUA A PULE- THE MAU MOVEMENT

335 Hits

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer

 

O le faamatalaga sese ma le tau faaleaga na fai e Luxford e ala i lana faaiuga umi ma lona faanatinati e faatino.

Ae ui o lea –sa matua faigata lava ona talia le tulaga o Leoleo i lea taimi. Sa matua faaaogaina i latou i taua mata’utia e faasaga i le toatele o tagata Samoa-ia sa leai se tulaga faamaonia na tuuina atu ia i latou -e taofia ai mai le faatinoina o latou tiute-ia sa latou taumafai ma le tiga e o ese ai- mai se tulaga faigata-o le toatele lava o i latou na manunu’a.

O lea tulaga e pei ona vaaia mai le poletito o le nofoaga o Leoleo-na faamaonia ai le tafaina e Satini Waterson o tagata Samoa i lana fana taavili o le Lewis i luga a’e o latou ulu, faatasi ai ma ma’a sa to’ulu atu i luga o le taualuga o le ofisa o Leoleo ma faamalama na ta’ei i le itu i sasa’e o lea fale.

E toatasi se tagata Samoa na aga’i atu i sasa’e o le Market Hall-ma sa vaaia……ma se fana puupuu o ta’i atu i le ofisa o Leoleo. E tusa ai ma lea tulaga ma a’u faamaumauga auiliili-ua faigata lava ona fai se gaoioiga lea na aliali mai i lea taimi sa tatau ona fai-ae peitai o le taimi e tatau ai-sa le mautinoa-ae ina ua fai i ai se sailiga mulimuli ane ai-na maua ai sa tatau ona faatinoina lea tulaga.

O le faaaliga a Luxford- o fana ia sa faapa agai i le Ala i le Ifiifi-sa le tatau ona faia tusa lava pe o le a le tulaga e o’o i ai-ae o Leoleo e toatolu ia na vaaia e feoa’i solo ma ni fana- e tatau ona molia i le fasioti tagata pa’ivalea-ae peitai- e leai lava ni moliaga na faia-ma ua faamalieina lava le Malo e faapea sa tatau lava ona faamuta lea mataupu i le taimi na fai ai le faaiuga a Luxford ma faataatia i totonu o le Palemene. 

 

O GAOIOIGA A FU-VAATAU

O le Vaa Tau- e tau Fu’a o le HMS DUNEDIN o le Royal Navy a Niu Sila na folau mai i totonu o le Taulaga o Apia i le itula e 4 i le afiafi o le Aso Sa-12 Ianuari 1930, ma tagata o le Royal Marines ma se vaalele o le sami mai le malae vaalele o  Hobsonville-lea  sa i luga o lea vaa. O le pule o lea Vaa o Commodore Geoffrey Blake-lea e lei leva ona tofia e avea ma Commodore e pule i lo latou nofoaga i Niu Sila.

E le’i leva lava ona taunuu mai Blake i Samoa-ae auai loa i se fonotaga i le ofisa o le Pulega o Samoa ma Allen. O le manatu lautele e faapea -o le tagata Samoa, lea ua masani i le tulaga manuia ma le nofo lelei, e vave ona fiu i le una’i pea –talu ai -ua na le toe maua lana taumafa masani ma le tulaga saogalemu i lona lava fale. O upu ia na tusia e Blake i totonu o lana lipoti.

O le mea lea- o le faagaoioiga o le malo e tatau ona tilotilo i le taofia o ia mai le maua o mea’ai ma isi lava mana’oga, nonofo i totonu o nuu, osofa’ia o togalauapi i le vao ma saisai mai pagota.

O le itu e le  iloa e Blake-e ui lava ina toatele tagata Samoa o le a latou le maua le tulaga to’afilemu i o latou aiga-ae o alii na ia fuafuaina e o atu i le togavao- e saisai mai i latou o le Mau –e matua leai lava ma so latou iloa e uiga i lea tulaga. E tusa ai ma vaega o le togavao e latalata mai-e malamalama lelei lava le fuafuaga a Blake.

O Upolu ua na o se luasefulu-lima lava kilomita lona mamao i lona tuaoi ma o le vaega autu lea o loo lalafi ai le Mau ma e le sili atu i se kilomita le mamao mai nuu o Vaiusu, Le’auvaa, Faleasi’u ma Fasitoo-tai, o nuu ia o loo i luga o le talafatai o Upolu i le itu i sisifo o Apia. Ae o le mamao- e le o se faafitauli lea.

O le ogatotonu o Upolu e matua lavelave ma vanuvanu-ma o ona pito mauga e faigata tele-talu ai o maupu’epu’e ia o mauga-mu ma o vaaiga taatele ia i le motu atoa. O vaitafe tetele pe a tafe e motusia ai auala uma ma tifatŏ i auvae-mauga.

Ae o lona fili faigata-o le mafiafia ma le lavelave o le vaomaoa- ma tusa lava pe faamamā i agaese- e tuai lava ma faigata. O Ianuari na siitia ai le maualuga o le Tau Susū o Samoa.ua matua tele le suavai i le vaomatua ma e faafuase’i lava ona to timuga malolosi ma fe’emo uila.

O Ianuari 1930 na matua uiga ese ai le malosi o le tau susū o Samoa. Ina ua mavae le aso e tasi talu ona taunuu mai Blake-na ia auina atu ai ni vaega’au i le matafaga e faatutū ni pou i totonu o Apia, Le’auvaa ma Mulifanua.

O le vaiaso muamua lava na taunuu mai ai vaega-‘au i lalo o le vaaiga a Commander Robin Jeffrey lea foi na ia faatinoina ai lea galuega ina ua taunuu mai le Dunedin i Samoa i le 1928, na ia sailia faalilolilo nuu uma lava o i le itu i matū.

O le aso lava ma le faiga- ae a o’o i le po- ua fai osofaiga i totonu o nuu-ina ia mafai lava ona maua tagata o le Mau, atoa foi ma le sailia o pepa o faamaumauga a le Mau-aemaise ai lava tusi ma pepa faalauiloa mai ia Nelesoni.

O tamaitai ma tamaiti o Upolu sa masani lelei i faiga tau faafefe a alii faa-auupegaina ia e faafuase’i lava ona osofa’i o latou aiga i itula uma lava o le po-ma faaleaga o latou fala ma talepa a latou meaafale.

© Samoa Observer 2016

Developed by Samoa Observer in Apia